काठमाडौं । नेपाल मेडिकल काउन्सिलले काउन्सिलको अनुसन्धान समितिको सिफारिसबिना कुनैपनि चिकित्सक तथा स्वास्थ्यकर्मीलाई पक्राउ पुर्जी जारी नगर्न अनुरोध गरेको छ । काउन्सिलले उपचारको क्रममा भएका कुनैपनि घटनाका बारेमा काउन्सिलको अनुसन्धान समितिले काम कारबाही गर्ने भएकाले आरोपितविरुद्ध पक्राउ पुर्जी वा मुद्दा दर्ता नगर्न आग्रह गरेको हो ।

काउन्सिलले आज एक विज्ञप्तिमार्फत कुनैपनि चिकित्सक तथा स्वास्थ्यकर्मीले उपचारको क्रममा कुनै लापरबाही गरेको शंका लागेमा पीडितले काउन्सिलको अनुसन्धान समितिमा उजुरी गर्नुपर्ने र काउन्सिलकै तर्फबाट अनुसन्धान हुने कानुनी व्यवस्था रहेको स्पष्ट पारेको छ ।

जिल्ला अदालत जुम्लाले अनुसन्धानका लागि भन्दै कर्णाली स्वास्थ्य विज्ञान प्रतिष्ठानका मेडिकल अफिसर डा. करण साहलाई पक्राउ पुर्जी जारी गरेको सन्दर्भमा काउन्सिलले विज्ञप्ति जारी गरेको हो ।

डा. साहमाथि यही भदौ २ गते प्रतिष्ठानकै प्रशासनतर्फका कर्मचारी धनबहादुर शाहीले इमर्जेन्सी कक्षमा कुटपिट गरेका थिए । धनबहादुरका छोरा चन्दननाथ नगरपालिका–२ जुम्ला भण्डारीबाडाका छ वर्षीय पृथकविक्रम शाहीको उपचारमा डा. साहले बाल हिंसा गरेको जनाउँदै बालककी आमा आशा हमाल (शाही)ले जुम्ला प्रहरीमा यही भदौ १३ गते उजुरी दिएकी थिइन् ।

यता नेपाल चिकित्सक संघ (एनएमए)ले डा. साहका नाममा जारी गरिएको पक्राउ पुर्जी तत्काल खारेज गर्न माग गरेको छ । मंगलबार संघले एक विज्ञप्ति जारी गर्दै पक्राउ पुर्जी ७२ घण्टाभित्र खारेज नभए कडा आन्दोलनका कार्यक्रम घोषणा गर्ने अल्टिमेटम सरकारलाई दिएको छ ।