पोखरा । प्रमुख प्रतिपक्ष दल नेकपा (एमाले)का ‘हेभिवेट’ नेताले पनि मुख्यमन्त्रीको लालसामा प्रदेशसभा रोजेका छन् । गण्डकी सरकारका मन्त्रीद्वयदेखि सत्तारूढ नेपाली कांग्रेसका प्रदेश सभापति शुक्रराज शर्मा समेतले मुख्यमन्त्री बन्ने इच्छाका साथ प्रदेशसभा रोजिसकेका छन् ।

कांग्रेस गण्डकी सभापति शर्माले आफ्नो नाम समानुपातिकमा हालेका छन् । एउटै वडा, एउटै निर्वाचन क्षेत्रका मन्त्रीद्वय विन्दुकुमार थापा र कुमार खड्काले कास्की निर्वाचन क्षेत्र नम्बर–२ ‘ख’बाट प्रदेशसभा सदस्यका लागि प्रतिस्पर्धा गर्ने इच्छा देखाएका छन् ।

गण्डकीका संस्थापक मुख्यमन्त्री एवं एमाले उपमहासचिव पृथ्वीसुब्बा गुरुङको इच्छा पनि प्रदेशसभामा नै देखिएको छ । तत्कालीन नेकपाको दुईतिहाइ र एमालेको एकलसहित गुरुङले दुई कार्यकालमा गरी करिब साढे तीन वर्ष गण्डकी सरकार चलाएका थिए ।

उनै गुरुङको नाम लमजुङ ‘ख’बाट सिफारिस भएको छ । गुरुङ यसअघि पनि सोही क्षेत्रबाट निर्वाचित भएका हुन् । गुरुङसँगै पार्टी जिल्ला अध्यक्ष कृष्णप्रसाद अधिकारीको नाम पनि उमेदवारका लागि सिफारिस भएको छ ।

प्रतिनिधिसभा सदस्यका लागि प्रतिस्पर्धा गर्ने चर्चाबीच गुरुङको नाम प्रदेशसभा सदस्यमा सिफारिस भएको हो । यद्यपि, अन्तिम निर्णय केन्द्रीय कमिटीले गर्नेछ ।

एमालेले अघिल्लो निर्वाचनमा गण्डकीमा १७ प्रत्यक्ष र १० समानुपातिक गरी २७ सिट जितेको थियो । गुरुङसँगै तनहुँका किरण गुरुङ पनि प्रदेशसभामा नै विजयी भएका थिए ।

मुख्यमन्त्रीका लागि संसदीय दलको नेता बन्नुपर्ने प्रावधान छ । त्यतिखेर एमालेभित्र संसदीय दलको नेता को बन्ने भन्ने विषयमा यी दुईबीच प्रतिस्पर्धा नै थियो । अन्तिम समयमा एमालेका तत्कालीन महासचिव तथा वर्तमान वरिष्ठ उपाध्यक्ष ईश्वर पोखरेल आएर पृथ्वीसुब्बालाई संसदीय दलको नेतामा सहमति गराएका थिए ।

त्यति बेला मुख्यमन्त्रीमा दाबी गरेका किरण अर्थमन्त्री बनेका थिए । योपटक उनले प्रतिनिधिसभामा इच्छा देखाएका छन् । पृथ्वीसुब्बा र किरणबीच उमेदवार बन्ने विषयमा छलफल समेत भएको एमाले स्रोतको दाबी छ । पृथ्वीसुब्बा फेरि प्रदेशमै आउने भएपछि किरण प्रतिनिधिसभा सदस्यका लागि प्रतिस्पर्धा गर्ने तयारीमा रहेको एमाले स्रोतले बतायो ।

गण्डकीमा आसन्न निर्वाचनपछि एमालेको सरकार बन्ने उक्त पार्टीका नेताहरूको जिकिर छ । उपमहासचिव गुरुङले यही भदौ ३ गते म्याग्दीको एक कार्यक्रममा सम्बोधन गर्ने क्रममा ‘एमाले एक्लै भारी हुने’ बताएका थिए ।

गएको स्थानीय तह निर्वाचनको परिणाम हेर्दा गण्डकीमा एमाले अघिल्लोपटकको तुलनामा झन् बलियो देखिएको छ । ०७४ को निर्वाचनमा पनि एमाले पहिलो दल बनेको थियो । त्यति बेला एमालेले समानुपातिकमा आफ्ना १० सांसद जिताउन सफल भएको थियो ।

अहिले पनि समानुपातिक मत नघट्ने एमाले नेता बताउँछन् । हिमाली जिल्लामा एक्लैले चुनाव जित्न सक्ने आकलन तथा हरेक जिल्लाबाट केही न केही सिट जितिने विश्लेषणका आधारमा गण्डकीमा सरकार बनाउन सक्ने आसमा एमाले छ । सोही कारण पृथ्वीसुब्बा पुनः प्रदेशमा नै आउन खोजेको विश्लेषकहरूले भनाइ छ ।

प्रदेशसभामा नाम टिपाउने हेभिवेट नेतामा गुरुङ मात्र होइन, एमालेकै संगठन विभाग प्रमुख खगराज अधिकारी पनि छन् । प्रदेश राजधानी कास्कीका अधिकारी कास्की–३ बाट प्रतिनिधिसभामा निर्वाचित सांसद हुन् ।

एमाले वृत्तमा गण्डकीको राजनीति आफ्नो प्रभुत्वमा पार्न शक्तिसंघर्षका बेला गुटबन्दी गर्ने नेताका रूपमा गुरुङ र अधिकारीको नाम जोडिन्छ । चाहे त्यो कास्कीको महानगर कमिटी होस्, चाहे जिल्ला कमिटी वा स्थानीय तह निर्वाचनमा टिकट सिफारिसदेखि लिएर अन्तर्घातको आरोपसम्म । यी दुई नेताका कार्यकर्ताहरूले एकार्कालाई ‘अन्तर्घाती’ भन्दै आएका छन् ।

नेता अधिकारीको नाम पनि प्रदेशसभामा नै सिफारिस गरिएको छ । शनिबार अधिकारीको निर्वाचन क्षेत्र कास्की–१ ‘क’को क्षेत्रीय कमिटीले अधिकारीको नाम सिफारिस गरेको हो ।

अधिकारी हाल जापान भ्रमणमा छन् । वारिसनामार्फत उनको मनोनयन परेपछि सिफारिस गरिएको बताइएको छ ।

“मुख्यमन्त्री बन्ने अवस्था आयो भने हाम्रो क्षेत्रबाट किन नबन्ने भनेर शुभेच्छुकले नाम हालिदिएका हुन् । मुख्यमन्त्रीबाहेक अरू भन्नेचाहिँ हुँदैन,” अधिकारीनिकट एक कार्यकर्ताले भने । तर, अधिकारीको इच्छा संघमा नै रहेको उनले बताए ।

क्षेत्रीय कमिटीले नाम सिफारिस गरेता पनि अन्तिम निर्णय केन्द्रीय कमिटीले गर्ने हुँदा यी दुवै नेताले प्रतिनिधिसभाका लागि प्रतिस्पर्धा गर्ने सम्भावना पनि सकिएको छैन ।

पार्टीको उपमहासचिव भएकाले पृथ्वीसुुब्बा चुुनाव नलडी संघमा समानुुपातिकतर्फबाट सांसद हुुन सक्ने चर्चा पनि छ । त्यस्तो भएमा संघमा लमजुुङबाट अर्का एमाले नेता जमिन्द्रमान घले लड्न सक्छन् ।

लमजुङको प्रदेशसभा ‘क’तर्फ धनञ्जय दवाडी, राजकुमार विष्ट र जितबहादुर गुरुङको नाम सिफारिस भएको छ । ०७४ मा यहाँबाट दवाडी विजयी भएका थिए ।

लमजुुङमा एउटा मात्र प्रतिनिधिसभा सदस्य निर्वाचन क्षेत्र छ । त्यहाँबाट ०७४ मा नेकपा (माओवादी केन्द्र)का देव गुुरुङ निर्वाचित भएका थिए । माओवादी महासचिव गुुरुङ योपटक कास्की–१ बाट प्रतिस्पर्धा गर्ने चर्चा छ ।

कास्की–१ ‘क’बाट अधिकारीसँगै टिकाराम पंगेनी, विष्णुु पुुन र तिलकुुमारी थापाको नाम पनि सिफारिस गरिएको छ । अधिकारीले प्रदेशमा सरकार बन्दा मुुख्यमन्त्री नपाउने हो भने प्रतिनिधिसभाकै लागि लड्ने सर्त पार्टी नेतृत्वसमक्ष राख्ने बताइएको छ ।

गण्डकीबाटै एमाले केन्द्रीय कमिटी सचिव रहेकी स्याङ्जाकी पद्या अर्यालले भने प्रतिनिधिसभामा नै दोहोरिने इच्छा राखेकी छन् ।