काठमाडौं । जर्मन बुन्डेसलिगा फुटबलमा शनिबार राति बोरुसिया डर्टमन्डले हेर्था बर्लिनमाथि १–० को संघर्षपूर्ण जित निकाल्दा युनियन बर्लिनले साल्केलाई ६–१ को सहज नतिजामा हरायो ।

पाहुना टोली डर्टमन्डको जितमा एन्थोनी मोडेस्टेले ३२औँ मिनेटमा हेडमार्फत गरेको गोल निर्णायक बन्यो । बुन्डेसलिगाको चौथो खेलमा डर्टमन्डको यो तेस्रो जित हो । हेर्था बर्लिन भने एक अंक जोडेर १७औँ स्थानमा छ ।

शनिबारै राति अर्को खेलमा आरबी लाइपजिगले उल्फ्सबर्गलाई २–० ले हरायो । लाइपजिगको जितमा दुवै गोल क्रिस्टोफर एनकुनकुले गरेका थिए । उनले पाँचौँ मिनेटमा पेनाल्टीमा गरेको गोलबाट लाइपजिगले अग्रता लिएको थियो । एनकुनकुले अन्तिम मिनेटमा अर्को थप्दै क्लबको जित पक्का गरे ।

यस्तै, बायर लेभरकुसेनले मेइन्जमाथि ३–० को विजय हासिल गर्‍यो । लेभरकुसेनको जितमा एक्जिक्युयल पालासियोसले एक र जेरेमी फ्रिमपोङले दुई गोल गरे । जारी सिजन लेभरकुसेन र लाइपजिगको यो पहिलो जित हो । 

अप्रत्यासित नतिजा निकाल्ने क्रमलाई निरन्तरता दिएको युनियन बर्लिनले साल्केलाई ६–१ ले हरायो । युनियन बर्लिनको जितमा मोर्टेन थोर्सबाई र जानिक हाबेररले एक/एक गोल गरे । शेराल्डो बेकर र स्भेन मिचेलले समान दुई गोल गरे ।

जितसँगै युनियन बर्लिन चार खेलबाट १० अंक जोड्दै दोस्रो स्थानमा छ । साल्के दुई अंकका साथ १६औँ स्थानमा छ ।

अर्को खेलमा होफेनहेइमले औसबर्गलाई १–० ले हरायो ।