काठमाडौं । नेपाल क्रिकेट संघ (क्यान)ले महिला क्रिकेटर अप्सरी बेगमलाई निलम्बन गरेको छ ।

बिहीबार बसेको क्यानको केन्द्रीय कार्यसमितिको बैठकले अप्सरीलाई निलम्बन गर्ने निर्णय गरेको हो । क्यानका नवनियुक्त प्रवक्ता छुम्बी लामाका अनुसार अप्सरीले नेपाली महिला क्रिकेट टिमको बन्द प्रशिक्षणका दौरान प्रशिक्षक र व्यवस्थापकमाथि अभद्र व्यवहार गरी आचारसंहिता उल्लंघन गरेकी थिइन् ।

“बन्द प्रशिक्षणका दौरान प्रशिक्षक र व्यवस्थापकमाथि अभद्र व्यवहार गरेको कारण तत्कालका लागि उनलाई निलम्बन गर्ने निर्णय भएको हो । अब क्यानको अनुशासन समितिले यस घटनाबारे छानबिन गर्नेछ । त्यसपछि मात्रै क्यानले अप्सरीबारे आगामी निर्णय गर्नेछ,” बिहीबारकै कार्यसमितिबाट प्रवक्ता चुनिएका लामाले बाह्रखरीसँग भने ।

अप्सरी महिला एसिया कपमा लागि बन्द प्रशिक्षणमा रहेको नेपाली टिममा रहे पनि राष्ट्रिय टिममा भने अटाउन सकेकी थिइनन् ।