काठमाडौं । पछिल्लो समय चर्चामा रहेको नेपाली चलचित्र ‘प्रेमगीत ३’ मा भारतका चर्चित गायक जुबैन नौटियाल जोडिएका छन् । जसले यसको चर्चा अझै चुलिएको छ । 

जुबैनले ‘प्रेमगीत ३’ को हिन्दी भाषाको गीतका लागि आफ्नो आवाज दिएका छन् । उनले आफ्नो आवाजमा ‘कोही ना कोही’ शीर्षकको गीत रेकर्ड गराइसकेका छन् । 

अमर मोहीको संगीत रहेको यस गीतको रचना भने हिन्दी संस्करणका निर्माता सुवास कालेले गरेका हुन् । 

चलचित्रमा आफ्नो पहिलो रोजाइका गायक जोडिएपछि निर्देशक सन्तोष सेन खुसी छन् । तर जुबैनलाई टिममा सहजै ल्याइएको भने होइन । 

पहिलो प्रस्तावमा आनाकानी गरेका उनले दोस्रो प्रस्तावमा मात्रै ‘प्रेमगीत ३’ मा जोडिन तयार भएका हुन् । 

“उहाँलाई पहिले नै हामीले टिममा जोड्न खोजेका थियौँ । हामीले पहिलो प्रस्ताव लिएर उहाँसम्म पुग्दा समयको व्यस्तता देखाउँदै र नेपाली चलचित्र पनि भएर त्यति रुची देखाउनु भएन,” निर्देशक सेन भन्छन्, “तर मलाई एउटा गीत जुबैनकै आवाजमा राख्ने मन थियो । किनभने उनी भारतलगायत नेपालमा पनि उत्तिकै लोकप्रिय छन् । पछि हाम्रो चलचित्रको हिन्दी टिजर आइसकेपछि हामीले पुनः प्रस्ताव राख्यौँ र उक्त टिजर हेरेर उहाँ गाउन तयार हुनुभयो ।”

यस गीतमा जुबैनको एकल आवाज रहेको छ । 

चलचित्रमा जम्मा ४ वटा गीतरु छन् । त्यसमध्ये गीतकार/संगीतकार कल्याण सिंहको कम्पोजिसनमा तयार भएको एउटा नेपाली गीतबाहेक बाँकी सबै उतै गीत भारतकै कलाकारबाट तयार पारिएको सेनले बताए । 

“कल्याण सिंहको कम्पोजिसनको एउटा गीत उहाँहरूले मनपराउनुभयो त्यसैले त्यो एउटा दुवै भाषामा हुन्छ, बाँकी तीनवटा चाँही त्यहाँकै टिमबाट तयार पारिएको हो,” सेनले बताए । 

सिंहको कम्पोजिसनमा तयार भएको गीतलाई भने हिन्दी भाषामा उल्था गरेर रेकर्ड गराइएको हो । 

यस चलचित्रमा जुबैनका साथै भारतका अरू चर्चित गायक/गायिका अंकित तिवारी, राहत फत्तेअली खान, पालक मुछाल, र देव नेगीले पनि आवाज दिएका छन् । 

चलचित्र नेपाल र भारतमा नेपाली र हिन्दी दुवै भाषामा एकसाथ २३ सेप्टेम्बर (असोज ७) मा रिलिज हुँदैछ ।