बुटवल । कपिलवस्तुमा डेंगु संक्रमित भेटिन थालेका छन् । साउन लागेयता डेंगु संक्रमित भेटिन थालेका हुन् ।

अहिले जिल्लाका विभिन्न स्थानीय तहमा डेंगुका बिरामी भेटिएका छन् ।

बाणगंगा नगरपालिकामा ४६ जना संक्रमित भेटिएकाे नगरपालिकाले पुष्टि गरेकाे छ । कृष्णनगर नगरपालिकामा २ जना र विजयनगर गाउँपालिकामा १ जना संकमित भएकाे भनिएपनि पुष्टि भएकाे छैन । 

बाणगंगा नगरपालिकाका ६ जना संक्रमितको अवस्था गम्भीर रहेकाले उपचारका लागि बुटवल पठाइएको छ । बाँकी संक्रमितहरूको नगरका विभिन्न स्वास्थ्य संस्थामा उपचार भइरहेको जनाइएको छ ।

बाणगंगाका स्वास्थ्य शाखा प्रमुख ठगराज पौडेलले नगरभित्र डेंगुका बिरामी बढेपछि मंगलबार नगरका विभिन्न स्थानको निरीक्षण गरेको बताए ।

मंगलबार नगरका सबै सरकारी स्वास्थ्य संस्थाका स्वास्थ्यकर्मीलाई बोलाएर बाणगंगाले यस विषयमा सक्रियतापूर्वक काममा लाग्न निर्देशन दिए पनि जिल्ला जनस्वास्थय कार्यालयले चासो देखाएको छैन ।

जिल्ला जनस्वास्थ्य कार्यालयका प्रमुख हेमराज पाण्डेले भने बाणगंगा नगरपालिकामा ३९ जना बिरामी भेटिएको स्वीकार गरे । उनले स्थानीय तहमा रहेको स्वास्थ्य शाखासँग सम्पर्क, समन्वय गरी जनसमुदायमा चेतनामूलक कार्यक्रमलाई तीव्रता दिने बताए ।

गत वर्ष हैजाको सूचना लुकाउँदा आम नागरिकहरूमा हैजा फैलिँदा ठूलो समस्या सिर्जना भएको थियो ।