सत्ताका लोभमा नैतिकता र मर्यादा उल्लङ्घन गर्नेहरू अस्थिरताका लागि अहिले ‘भूराजनीति’लाई सराप्दै छन् । नेपालका राजनीतिक दलका नेता गतिला भए विदेशी र बिचौलियाले केही लछार्न सक्थे होला त रु 
 
चुनाव नजिक आएपछि दलका नेताहरू जनतालाई कसरी झुक्याउन सकिन्छ भनेर छटपटिने गर्छन् । चुनावका बेला उनीहरू जे बोल्न र गर्न तयार हुन्छन् । भनिन्छ, पैसा त उनीहरू जस्तो पनि लिन्छन् ।
 
आगामी निर्वाचनको चिन्ता नेताहरूमा बढी नै देखिन थालेको छ । नेपाली कांग्रेसका नेता आपसी आरोपप्रत्यारोपमा संलग्न देखिन्छन् भने कम्युनिस्टहरू आफ्ना कर्तुत लुकाउन विदेशी शक्तिलाई दोष दिन थालेका छन् । 
 
विदेशीले विशेषगरी छिमेकीले मौका पाउँदा आफ्नो हित रक्षाका लागि घुसपैठ र सके हस्तक्षेपको पनि प्रयास गर्न सक्छन् । तर, मिरजाफर र क्विसलिङ नभएको देशमा तिनको प्रयास सफल भएको उदाहरण छैन ।
 
नेपालमा पनि विदेशीले राजनीतिक नेतृत्वमा रहेका वा पुग्ने महत्त्वाका‌ंक्षा भएकालाई नै क्विसलिङको अवतारमा जन्माउने हुन् । यसैले विदेशी हस्तक्षेपको डर देखाउनेहरू पनि ‘चील आयो भनेर गाउँलेलाई आकाशतिर हेर्न लगाएर कुखुरा चोर्ने स्याल’ कै नयाँ अवतार हुन् ।
 
देशमा व्याप्त कुव्यवस्था र भ्रष्टाचारका लागि विदेशी वा कुनै भूराजनीतिक शक्तिलाई दोष दिएर अहिलेका राजनीतिक दलका नेता अब उम्कन सायद पाउने छैनन् । भ्रष्टहरूको भाष्य अब नपत्याउने संकेत जनताले स्थानीय निर्वाचनमै दिएका छन् ।
 
वास्तवमा अहिले शीर्ष नेतृत्वमा रहेकाहरूले जनता झुक्याउन नयाँ नयाँ फट्याइँ रच्न लाग्नुभन्दा राजनीतिबाटै पन्छिदिए देशको भलो हुने देखिन्छ । यद्यपि, सत्ता लिप्सामा लिसो झैँ टाँसिएकाबाट इमानदारीको अपेक्षा गर्नु भने मूर्खता हुन्छ । 
    
विडम्बना, भ्रष्टाचार र कमिसनखोरीका भकारीहरूलाई देश बिग्रेको दोष अरूलाई दिन लाज मान्दैनन् । यस्ता कुनै दलको गठबन्धन वा एकताले सम्बद्ध नेताहरूकै सत्ता स्वार्थ पूर्तिबाहेक अरू कसैको भलो नहुने पुष्टि २०७४ को चुनावबाटै  भइसकेको छ ।  

दुर्भाग्य, अहिलेका कुनै दलका पनि शीर्ष भनिएका नेतामा नैतिकता र इमानदारी लेसमात्र पनि देखिँदैन । यिनलाई देश लुट्ने ‘लाइसेन्स’ बन्द गर्न भने जनताले यो यथार्थ बुझ्न जरुरी छ ।
 
यसैले अहिले देश र जनताको हितका लागि कुनै कसैको एकता वा गठबन्धन होइन राजनीतिक नैतिकता र इमानदारीको खाँचो छ । अहिलेका अनैतिक र बेइमान नेताहरूलाई जनताले नै पन्छाउन नसके देश लुटिन र जनता चुसिन रोकिनेछैन ।