पोखरा । गण्डकी प्रदेशसभा सांसद तथा राष्ट्रिय जनमोर्चा संसदीय दलकी नेतृ पियारी थापाको विवाहमा १० हजारबाट सुरु गरिएको अक्षय कोषलाई गण्डकी सरकारले एक करोड ३० लाख रुपैयाँ बजेट छुट्याएको छ ।

२०६६ सालमा उनले जनमोर्चाको सांस्कृतिक समूह रक्तिमका प्रशिक्षक हेमराज आश्रमसँग विवाह गरेकी थिइन् । रक्तिमकै माध्यमबाट चिनिएका हेमराज र थापाले आफ्नो विवाहमा गाउँमैत्री अक्षयकोष (जिमाक) खडा गर्ने निर्णय गरे ।

त्यही १० हजारको अक्षयकोषलाई गण्डकी सरकारले पछिल्ला तीन वर्षमा एक करोड ३० लाख बजेट दिएको छ । यो बजेट थापा सांसद भएपछि मात्रै सरकारले छुट्याएको हो ।

रक्तिमका सांगीतिक गीत उत्पादनमा जिमाकले लगानी गर्दै आएको छ भने ट्यालेन्ट अफ भिलेज भन्ने प्रतिभा छनोट लगायतका काम पनि गर्दै आएको छ ।

यो कोषको संरक्षकमा स्वयम् थापा दम्पती नै छन् । सांसद थापा कोषको संरक्षक हुन् भने उनका पति आश्रम चाहिँ अध्यक्ष ।

कोषको संरक्षक रहँदा नै सांसद थापाले पछिल्ला तीन आर्थिक वर्ष २०७७/०७८, चालु आर्थिक वर्ष २०७८/०७९ र आगामी आर्थिक वर्ष २०७८/०७९ मा गरि कुल एक करोड ३० लाख रुपैयाँ बजेट छुट्याएकी हुन् ।

पहिलो आर्थिक वर्षमा १० लाख रुपैयाँ छुट्याएपछि चालु आर्थिक वर्षमा ५० लाख रुपैयाँ अक्षयकोषलाई विनियोजन भयो ।

आगामी आर्थिक वर्षमा चाहिँ दुई भिन्नभिन्न शिर्षकमा ६० लाख र १० लाख गरि कुल ७० लाख रुपैयाँ अक्षयकोषको नाममा विनियोजन भएको छ ।

यही कोषलाई देखाएर तत्कालीन पृथ्वीसुब्बा गुरुङ नेतृत्वको नेकपा सरकारले आफ्नो तीनवर्षे कार्यकालमा काठेखोला ४ मा रहेको जिमाक संग्रहालयको स्थापना एवम् स्तरोन्नती गरिएको भनेर पुस्तकमा समावेश गरेको थियो ।

कोषले पहिलो वर्षमा छुटिएको बजेटबाट देशकै ठुलो नगरा बनाएको थियो । चालु आर्थिक वर्षमा चाहिँ भवन बनाइएको उल्लेख गरिएको छ । संग्रहालय बनाउने र त्यसमा विश्वभरका बाजा राख्ने बताइएको छ ।

सांसदका पति आश्रम पछिल्लो एक दशकदेखि उक्त कोषको अध्यक्ष छन् । स्थानीय चाहिँ सांसदले विकासमा नभई यही कोषलाई बढी प्राथमिकता दिएको बताउँछन् ।

जिमाक त्इख् नामक फेसबुक आइडीमा पछिल्लो समय जिमाककै भवनको तेश्रो तला ढलान गरिएको उल्लेख गरिएको छ । यो कार्यमा काठेखोला गाउँपालिकाका ३, ४, ५, २, ७ र ८ का ७० जनाले सहयोग गरेको उल्लेख गरिएको छ ।

यसको लागत चाहिँ ५३ लाख ३६ हजार १४२ मध्ये सामाजिक विकास कार्यालयले ४८ लाख र बाँकी रकम चाहिँ जनश्रमदानमार्फत बेहोर्ने उल्लेख गरिएको छ ।