पोखरा । आइतबार बिहान सम्पर्कविहीन भएको तारा एयरको जहाज कहाँ छ, समाचार तयार पार्दासम्म भेटिन सकेको छैन ।

पोखरा क्षेत्रीय विमानस्थलबाट जोमसोमको लागि उडान भरेको तारा एयरको ९एन एइटी जहाज मुस्ताङको आकाशबाटै सम्पर्कविहीन भएको थियो ।

नियमित उडानमा १८ मिनेटसम्ममा पोखरा जोमसोम उडान एकतर्फी सकिन्छ । 

तर, बिहान ९ः५५ बजे जोमसोमतर्फ लागेको जहाज जोमसोम विमानस्थलको टावरसँगको सम्पर्क विच्छेद भएसँगै अहिलेसम्म भेटिएको छैन । जोमसोम विमानस्थल ल्यान्ड गर्नुअघि बिहान १० बजेर ७ मिनेटमा अन्तिमपटक टावरसँगको सम्पर्कमा जहाज आएको थियो ।

त्यसपछि जहाजको अवस्थाबारे सबै अज्ञात छन् ।

अनुभवी पाइलट क्याप्टेन प्रभाकर घिमिरेसहित जहाजमा चालक दलका दुईजना अन्य सदस्य र १९ यात्रु थिए ।  जहाजमा २ जना जर्मन, चार भारतीय र १३ नेपाली यात्रु थिए ।

तीनै यात्रु र हराएको जहाज खोज्न अहिले काठमाडौंबाट नेपाली सेनाको टोली पनि जहाजको खोजीकार्यको लागि मुस्ताङमा छ । 
सेनासहित फिस्टेल एयर गरी दुइवटा हेलिकोप्टरले आकाशबाट र नेपाली सेना, नेपाल प्रहरी, सशस्त्र प्रहरीले जमिनबाट खोजी कार्यलाई अगाडि बढाएका छन् ।

मुस्ताङको मौसम खराबीका कारण खोजीकार्यमा ढिलाई भएको छ । बाक्लो हुस्सु र कुहिरोका कारण हेलिकोप्टरबाट खोजीकार्य पनि प्रभावित बनेको छ भने आइतबारलाई खोजीकार्य स्थगित गरिएको मुस्ताङ जिल्ला प्रशासनले जानकारी दिएको छ ।

तारा एयरले आइतबार तीनपटक विज्ञप्ति जारी गरेर खराब मौसम तथा जटिल भूगोलको कारण उक्त वायुयानको स्थिति हालसम्म अज्ञात रहेको जनाएको छ । 
...

पहिलो दिनको खोजीकार्य स्थगित भएपछि सोमबारको खोजीकार्य कसरी हुन्छ त ? आइतबारको खोजीकार्यबारे के के भए ?

उद्धारको लागि खटिएको नेपाली सेनासँग हामीले निरन्तर सम्पर्क गरेका छौँ । त्यही खोजीकार्यमा सहभागी एक सैनिक अधिकारीको भनाई यस्तो छ :–
हामी जोमसोम ब्यारेक आएका छौँ । स्थलगत खोजमा लागेको टोली नौरीकोटमा टेण्ट बाँधेर बसेको छ ।

सोमबार बिहान अर्लि इन द मर्निङमा फेरि खोजीकार्य सुरु हुनेछ । हामीले बिहानै हेलिकप्टरबाट पनि सर्च गर्नेछौँ । दुइवटा हेलिकप्टर छन् । बिहानमा मौसम पनि अलि खुला होला भन्ने हाम्रो आशा छ । बिहान ५ बजेदेखि नै हामी काममा लाग्छौँ ।

हाम्रो आधार भनेकै स्थानीयबासी हुन् । चौँरी चराउने र भेँडीगोठ हेर्नेहरुले हामीलाई ठूलो आवाज आएको भनेर भनेका छन् ।

भेँडा चराउने, च्याङ्ग्रा चराउनेहरुले दिएको सूचनालाई आधार मानेर मानापाथी हिमालको फेदलाई पोइन्ट गरेर सर्च अगाडि बढाएका छौँ । उनीहरुले पनि आवाज सुनेका हुन्, देखेका होइनन् ।
 

एकठाउँबाट चढे अर्को ठाउँमा पुगिन्छ, शृङ्खला त्यस्ता छन् । अनुमानको भरमा एउटै डाँडा चढ्न एक डेढघण्टा लाग्छ । हिउँ नै हिउँले भरिएको ठाउँमा तत्कालै पुग्न सकिँदैन । सेफ्टी म्यानेजमेन्ट गरेर बिस्तारै अगाडि बढ्ने हो ।
 

हामी त्यो ठाउँमा पुग्न सकेका छैनौँ । त्यसकारण यही हो भन्ने आधार पनि छैन ।
 

मुस्ताङका अन्य ठाउँ खुलेका छन्, तर, जुन आशंका गरिएको छ, त्यही ठाउँ खुलेको छैन । मानापाथी रेञ्ज एकदमै बाक्लो कुहिरोले ढाकेको छ । साँझमा त्यो कुहिरो झनै बढेको छ । बिहानमा खुल्ला भन्ने आशा छ ।
 

बिहानै आकाशबाट हेर्छौँ, देखिनासाथ आकाशबाटै टोली झर्छ । पैदलबाट पनि टोली जान्छ नै । जताबाट छिटो हुन्छ, त्यही गर्छौँ । कताबाट छिटो हुन्छ, त्यही गर्छौँ ।
 

जहाजसँगै हराउनेमा चालक दलका तीन जना सहित १३ नेपाली, ४ भारतीय र २ जना जर्मन नागरिक छन् ।

जहाज हराएको भन्ने सुन्नासाथ आफन्तहरु पोखरा विमानस्थलमा आइपुगेका थिए । जहाज कहाँ छ, पत्ता नलागेता पनि आफन्तहरु चाहिँ सकुशल उद्धारको कामना गर्दै थिए । प्रार्थना गर्दैथिए । विमानको उडान, अवतरण जारी रहिरहँदा पोखरा विमानस्थल भावविह्वल बन्न पुग्यो । कोहीले आफन्तलाई स्मरण गर्दैथिए । कोही चालकदलका सदस्यको संघर्ष सम्झँदै थिए ।

उनीहरुले अब सोमबारको बिहान पर्खेका छन् । जतिसक्दो छिटो आफन्तको खुसीको खबर सुन्न पाऊँ भनि प्रार्थना गरिबसेका छन् ।