काठमाडौं । केहीदिन पहिले एमाले सिध्याउन कांग्रेससँग सहकार्य गर्नुपरेको खुलासा गरेका नेकपा माओवादी केन्द्रका अध्यक्ष पुष्पकमल दाहाल प्रचण्डले बुधबार ‘टाउकाको मोल तोक्ने’ बलिया भएको भन्दै कांग्रेसप्रति खनिएका छन् ।

काठमाडौँको बबरमहलमा अखिल क्रान्तिकारी को एकताको २१ औँ राष्ट्रिय सम्मेलनको उद्घाटन सत्रमा उनले माओवादी आन्दोलन विभक्त हुँदा प्रतिक्रान्तिकारी र प्रतिगमनकारी शक्तिले मुन्टो उठाउन थालेको टिप्पणी गरेका हुन् ।

“पहिले यथास्थितिवादीहरू माओवादी भन्ने वित्तिकै डराउँथे, बीचमा हेप्न थाले,” उनले विद्यार्थीहरूलाई उत्साहित बनाउँदै भने, “माओवादी ध्रुविकरण र एकीकरणको दिशामा अघि बढेपछि तिनीहरूको सात्तो उडेको छ । यो खुसीको कुरा हो ।” 

उनले गणतन्त्र, धर्मनिरपेक्षता, संघीयता, संविधानसभामार्फत नयाँ संविधान माओवादी आन्दोलनको उपलब्धी भएकाले यसको रक्षाका लागि पनि तितरवितर भएको माओवादी आन्दोलन पुनःसंगठित हुनुपर्ने औँल्याए । र, त्यसैको लागि एकता प्रक्रिया सुरू भएको उनको जोड थियो ।

‘विचलन, विभाजन विकृतिको दोषी मै हुँ’
पूर्वप्रधानमन्त्रीसमेत रहेका अध्यक्ष प्रचण्डले पार्टीभित्र विचलन, माओवादी आन्दोलनको विभाजन क्षयीकरण र विकृतिको भागिदार आफैँ भएकाले एकीकरणको अध्याय पनि आफैँले सुरू गरेको स्वीकारोक्ति दिए । “विद्यार्थीहरू पछिल्लो समय हामीले विभाजन र खण्डिकरण व्यहोर्‍यौँ । यसमा तपाईंहरूको दोष छैन । नेतृत्वको हिसाबले यसको कारक मै हुँ, त्यसैले एकीकरणको नेतृत्व पनि म आफैँले गरिरहेको छु,” उनको भनाइ थियो । उनले पार्टी विभाजनको नैतिक जिम्मेवारी आफैँ एक्लैले लिनेसमेत बताए ।

पद, प्रतिष्ठा र व्यक्तिगत लाभको प्रतिष्पर्धाले आन्दोलन कमजोर बनेको उनको धारणा थियो । उनले एकीकरण प्राप्त उपलव्धीको रक्षा र अर्को क्रान्तिको तयारी भएकोसमेत बताए ।

‘एकवर्षभित्रै पुनः प्रचण्ड बन्छु’
उनले प्रचण्डलाई कमजोर बनाउने षड्यन्त्र भइरहेको भन्दै एकवर्षभित्रै पुनः प्रचण्ड बन्नेबाटोमा आफू अघि बढेको बताए । “प्रचण्ड आन्दोलन हो, अहिले कमजोर भएको प्रतीत भएको छ । तर, एकवर्षभित्र पुनः प्रचण्ड बन्नेछु,” उनले दृढता व्यक्त गरे ।

पार्टीभित्र लाइन छैन
उनले माओवादी केन्द्रभित्र लाइनको सङ्घर्ष सकिएको भन्दै मोर्चा र भ्रातृसंगठनमा लाइनको कुनै सम्भावना नरहेको जिकिर गरे । अखिल क्रान्तिकारीको नयाँ नेतृत्व चयनसँग जोडिएको सम्मेलनसमेत भएकाले उनल  सकेसम्म विधिसम्मत हिसावले नेतृत्व चयनको दिशामा अघि बढ्न सुझाए । पार्टी एकताको प्रक्रिया चलेकाले सकेसम्म सर्वसम्मत नेतृत्व चयन गर्नुपर्ने उनको सुझाव थियो । यदि त्यो सम्भावना नरहे लोकतान्त्रिक प्रक्रियाद्वारा नेतृत्व छनोट गर्ने विधि पक्रन उनले बाटो खुला गरिदिए । तथापि कांग्रेस, एमालेको जस्तो ‘गाइजात्रे विधि’ नअपनाउनसमेत उनले सुझाए ।

“विद्यार्थीहरू नेतृत्व चयनमा पार्टीलाई हस्तक्षेप गराउन बाध्य नपार्नूस्,” उनको आग्रह थियो, “सकेसम्म सर्वसम्मत नभए प्रतिस्पर्धामार्फत नेतृत्व चयन गर्नुहोस् । तर, कांग्रेस एमालेकोजस्तो चर्तिकला नदेखाउनूहोस् ।”

‘राजपाका नेतासमेत माओवादीमा आउँदैछन्’
एकीकरणबाट उत्साहित बनेका प्रचण्डले केहीसमयभित्रै राष्ट्रिय जनता पार्टीका महत्त्वपूर्ण नेताहरू माओवादी केन्द्रमा आउन लागेको दोस्रो पटक खुलासा गरे । मंगलबार पार्टी एकीकरण सभामा पनि उनले केहीदिनभित्रै ठूलो संख्यामा मधेसी नेताहरू पार्टी प्रवेशको तयारी गरिरहेको र आफू मधेस जान लागेको बताएका थिए ।

त्यस्तै उनले एकवर्षभित्र सबै विभक्त माओवादी मूल घर फर्किइसक्ने र पार्टी एकीकरण प्रक्रिया सकिने दाबी गरे ।

अध्यक्षका दावेदार पाँचजना
आजबाट सुरु भएको अखिल क्रान्तिकारीको राष्ट्रिय सम्मेलनमा पाँच जना अध्यक्षका प्रत्यासी छन् । वर्तमान उपाध्यक्षहरू अनील शर्मा,  रामचन्द्र अधिकारी (आरसी), रञ्जित तामाङ, पञ्चा सिंह, र महासचिव वीरेन्द्र बस्नेतले अध्यक्षमा दाबी गरिरहेको क्रान्तिकारीका नेताहरूले जानकारी दिएका छन् ।

तीनदिनसम्म चल्ने सम्मेलनमा देशभरबाट २६ सय प्रतिनिधि काठमाडौँ आइपुगेका छन् ।