काठमाडौं । पर्दा पछाडि केही लजालु र शान्त स्वभावका ‘प्रकाश सपूत’ कम बोल्न रुचाउँछन् । उनलाई विश्वास गर्ने हो भने प्रकाशले व्यक्तिगत रुपमा समाजलाई आँच पुग्ने वा कुनै वर्गलाई ठेस पुग्ने काम गरेका छैनन् । तर, उनै प्रकाशका सिर्जनाले भने बेला–बेला विवाद तानिरहन्छ । कहिले गीतमा प्रयोग भएका शब्दका कारण त कहिले भाका मिल्न गएका कारण । अनि कहिले गीतको भिडियोमा प्रयोग भएका दृश्यका कारण । उनको पछिल्लो ‘पिर’ गीतको विवादको कारण भिडियो बन्यो । 

प्रकाशको शब्द, स्वर र निर्देशन रहेको ‘पिर’को भिडियोमा तत्कालीन माओवादी जनयुद्धको समय र त्यसपछिको अवस्थालाई चित्रण गरिएको छ । तर, त्यसमध्ये केही दृश्यमा आपत्ति जनाउँदै चर्को आलोचना भयो । दर्शकको समर्थन पाए पनि नेकपा माओवादी केन्द्रका केही भगिनी संस्थाहरूको आलोचनापछि उनले गीतको भिडियो हटाएर पुनः अपलोड गरे । 
 
“कहिले काँही मेरा सिर्जनाहरूले, समाजलाई प्रतिबिम्बित गर्दा, समाजका गीतहरु गाउँदा त्यसमा दर्शक/स्रोता पक्ष/विपक्षमा आउँनुहुन्छ । यसलाई मैले विवादभन्दा पनि समीक्षाको रुपमा लिएको छु,” उनले भने ।
  
सिर्जना हटाउन अप्रत्यक्ष दबाब आए पनि व्यक्तिगत रुपमा प्रत्यक्ष भने कुनै दबबा नआएको प्रकाश बताउँछन्, “सिर्जनामाथि आएका थुप्रै टिकाटिप्पणीलाई मैले मनन् गरेँ । व्यक्तिगत रुपमा कुनै थ्रेट आएर वा कसैको आग्रहमा दृश्य हटाएको होइन ।  कसैको आफ्नो आत्मसम्मानमा ठेस पुग्यो भने सर्जकका हिसाबले म असफल हुन्छ,” उनी भन्छन्, “मैले जुन समूहको कथा उठाउन खोजेको थिएँ । जसको बेदना पोख्न खोजेको थिएँ । उहाँहरुले नै केही दृश्यमा आफूलाई रिलेट गर्न सक्नुभएन । उहाँहरुले त्यो रिलेट गर्न नसकेपछि हटाएको हुँ ।”

समाजको यथार्थलाई कलामार्फत पोख्न खोज्दा विवाद अनि दबाब आउँदा प्रकाशलाई कहिले दिक्क पनि लाग्छ । “अहिलेको समयमा म केही निरुत्साहित छु । मलाई अहिले अब यस्ता गीत नगरुँ कि भन्ने पनि लागिरहेको छ । अब गलबन्दी गाउने रमाइलो गर्ने हो भन्ने लागिरहेको छ,” प्रकाश केही हतास सुनिन्छन्, “तर म यही समाजको एउटा हिस्सा भएकाले र मेरा सिर्जनाको रुचीका हिसाबले मलाई समाजका लुकेका पक्षहरुबाट भाग्न सक्दिन होला । अब त्यस्ता गीत निकालिरहँदा म लिरिक्समा १० पटक हेर्छु होला । दृश्यमा ५० पटक हेर्छु होला । आफैंले आफैंलाई अंकुश लगाउँछु होला ।”

देशमा गणतन्त्र आइसक्दा प्रकाश भने आफ्नै सिर्जनामाथि अंकुश लगाउनुपर्ने यथार्थ पोख्छन् । उनका अनुसार नेतृत्त्व पंक्तिले जनयुद्धलाई गलत चित्रण गरियो भनेर मात्रै बुझे । तर, युद्धको राम्रो र नराम्रो दुबै पक्ष हुन्छ भन्ने तथ्य बुझेर पनि त्यसलाई उजागर गर्दा स्वीकार्न नसकेको आफूले अनुभूत गरेको उनी सुनाउँछन् ।

गीत अनि भिडियोमार्फत राजनीति गर्न खोजेको भन्ने आरोपको खण्डन गर्दै उनी आफूले राजनीति नगरेको स्पष्ट पार्छन् । उनै गायक प्रकाशसँग उनको ‘पिर’ गीतको विवाद, त्यसमा आएका प्रतिक्रिया र त्यसपछिको अवस्था तथा चलचित्रमा उनको डेब्यू र निरन्तरतालगायतमा केन्द्रित रहेर गरिएको भिडियोवार्ता ।