काठामाडौं । पछिल्लो समय नेपालमा दक्षिण भारतीय चलचित्रको हाइप बढ्दो क्रममा छ । कोरोनाका कारण बन्द हललाई भारतीय चलचित्र ‘सूर्यवंशी’ले यसअघि दर्शक फर्काएको थियो ।

त्योसँगै दक्षिण भारतीय चलचित्र ‘पुष्पा : द राईज’ ले ह्वात्तै दर्शक बढाएर राम्रो व्यापार गर्न सफल भएको थियो । 

त्यसपछि हलमा दर्शकको चहलपहल केही मत्थर भएको थियो । चलचित्र रिलिज भए । तर, फाट्टफुट्ट मात्रै दर्शक हल पुगे । 

तर, दक्षिण भारतीय चलचित्र ‘आरआरआर’ले हलमा दर्शकको ओइरो लागेको छ । सुपरहिट चलचित्र ‘बाहुबली’ का निर्देशक एसएस राजमौलीको बहुप्रतीक्षित चलचित्र रिलिजअगावै दर्शक व्यग्र प्रतीक्षामा थिए । 

एकैसाथ विश्वका आठ हजार स्क्रिनमा रिलिज भएको यो चलचित्र नेपालका १५० हलमा प्रदर्शन भइरहेको छ । यो चलचित्रले कोरोना महामारीयताकै उच्च शो पाएको वितरक मनोज राठीले बताएका छन् । 

“क्रेज राम्रो छ, बुकिङ पनि राम्रो छ, दर्शक आउन थालेपछि हलवाला खुसी छन्,” वितरक राठीले भने, “रिलिजको पहिलो दिन शुक्रबार र दोस्रो दिन शनिबार देशभरका हलमा फुल अकुपेन्सीमा शो सञ्चालन भएको छ । र, हल अझै हाउसफुल हुने क्रम जारी छ ।”

चलचित्रले ओपनिङ दिन र दोस्रो दिन गरेर कुल साढे दुई करोडको ग्रस कलेक्सन गरेको अ एट फिल्म्सका सञ्चालक निरज पौडेलले जानकारी दिए । 

यसले राजमौलीकै सुपरहिट चलचित्र बाहुबलीभन्दा बढी कमाइ गरेको पौडेल बताउँछन्, “आरआरको पहिलो दुई दिनको कलेक्सन बाहुबली–२ भन्दा माथि छ । यसले नेपाली साढे दुई करोडको ग्रस कलेक्सन गरेको छ ।” 

उनका अनुसार ‘बाहुबली–२’ ले रिलिजको पहिलो दिन शुक्रबार र दोस्रो दिन शनिबार नेपाली दुई करोड २५ लाख जतिको मात्रै ग्रस कलेक्सन गर्न सफल भएको थियो । 

‘आरआरआर’लाई नेपालमा गोपीकृष्ण मुभिजको सिस्टर कम्पनी अ एट फिल्म्स प्रालिले भित्र्याएको हो । भारु दुई करोडमा नेपाल ल्याएको निरज पौडेलले बताए ।

“हामीले आईसी तीन करोडमा ६ महिनाको सम्झौतामा यो चलचित्र नेपाल ल्याएका हौँ । विश्वबजारमा यसले बाहुबलीभन्दा माथिकै कमाइ गरेको देखियो । दुई दिनभित्र र यसको समीक्षा पनि राम्रै आएको छ । जसका कारण यो फिल्म एक महिनासम्म राम्रो चल्ने देखिन्छ,” पौडेलले भने ।

आरआरआरका प्रदर्शनका लागि सोमबारदेखि नै प्रिबुकिङ (स्पोट बुकिङ) खुला गरिएको थियो । आरआरआरका लागि पहिलोपटक स्पोट बुकिङको सिस्टममा टिकट बुकिङ सिस्टम ल्याएको पौडेल बताउँछन् । 

“हामीले सोमबारबाट आइतबारसम्मका लागि स्पोट बुकिङ खुला गरेका थियौँ । अर्थात्, अनलाइनबाट आफू कुन सिटमा बस्ने त्यो बुकिङ गर्ने व्यवस्था थियो । तर, टिकट भने हलमा नै गएर किन्नुपर्ने थियो । यो हामीले पहिलोपटक गरेका हौँ ।”

तर, रिलिजको तेस्रो दिन आइतबारबाट पहिलाजस्तै तीन दिनसम्मको अनलाइनबाटै टिकट बुकिङ गर्न मिल्ने भइसकेको छ । तेस्रो दिन आज आइतबार काठमाडौंका मल्टिप्लेक्समा स्क्रिननजिकै अगाडि रोका केही सिटबाहेक सबै टिकट बुक भइसकेका छन् । त्यसैगरी, सोमबारसम्मका लागि टिकट प्रायः फुल भइसकेका छन् । 

काठमाडौंका केही मल्टिप्लेक्सले शनिबार सबै शो ‘आरआरआर’ का लागि दिएका थिए ।

जुनियर एनटीआर, रामचरण, आलिया भट्ट र अजय देवगन मुख्य भूमिकामा रहेको यो चलचित्र १०० भन्दा बढी हलमा आइम्याक्स स्क्रिनमा प्रदर्शन भइरहेको छ । चलचित्र जम्मा तीन घण्टा एक मिनेटको रहेको छ ।

यति बेला हलमा आरआरआरका साथै भारतीय चलचित्र ‘द कश्मिर फाइल्स’, ‘बच्चन पाण्डे’ र नेपाली चलचित्र ‘चिसो एस्ट्रे’ प्रदर्शनमा छन् । तर, हलहरूले अरू चलचित्रको शो घटाएर आरआरआरको प्रदर्शनलाई प्राथमिकता दिएका छन् ।