1648183746.jpg)
काठमाडौं । प्रकृति थापा र श्रेया बिसी दिदीबहिनी हुन् । उनीहरूको दैनिकी मोबाइलबाट सुरु हुन्छ ।
बिहान उठ्नेबित्तिकै मोबाइलमा ग्राहकले पठाएका म्यासेजको रिप्लाई दिने, अर्डर लिने, ग्राहक घरमै आउँछन् कि डेलिभरी गर्नुपर्ने हो भनी यकिनमै उनीहरूको दैनिकी बितिरहेको छ ।
कोरोना महामारीपछि ३३ वर्षीया प्रकृति र २९ वर्षीया श्रेया मात्रै नभएर डिजिटल व्यवसायमा थुप्रै युवायुवती व्यस्त छन् । विगत ६ वर्षदेखि यी दिदीबहिनी ‘करिज्मा फेसन’नामक अनलाइन व्यवसायमा संलग्न छन् ।
उनीहरू लाखौँ पर्ने ‘हिरा’जस्तै देखिने, तर ‘हीरा’को विकल्पमा आएका आभूषण अनलाइन व्यवसायका सर्जक हुन् । झट्ट हेर्दा हिराजस्तै देखिने यी आभूषणलाई कतिपयले ‘अमेरिकन डायमन्ड’ र ‘रेप्लिका’ भन्ने गर्छन् ।
सुनको विकल्पमा सुनजस्तै देखिने आभूषणको प्रयोग हुन थालेको धेरै भइसक्यो । तर, नेपालमा पनि विगत केही वर्षयता डायमन्ड (हिरा) को विकल्पमा हिराजस्तै चमक दिने आभूषणको माग बढेको छ । जसमध्ये एक आभूषण हो अमेरिकन डायमन्ड ।
के हो अमेरिकन डायमन्ड ?
प्रकृतिका अनुसार डायमन्ड भनेको हीराजस्तै चम्किने, तर हिराभन्दा सस्तो स्टोन हो ।
“जसलाई अमेरिकन डायमन्ड र रेप्लिका पनि भनिन्छ । अमेरिकन डायमन्डको पनि ग्रेड हुन्छ,” उनले भनिन्, “हामीले व्यवसाय गरेको डायमन्ड ५ ए–ग्रेडको स्टोन हो ।”
हस्तशिल्पका कारण अन्य आभूषणभन्दा ए–ग्रेडको अमेरिकन डायमन्ड ग्राहकको पहिलो रोजाइमा पर्ने गरेको प्रकृति बताउँछिन् ।
ह्यान्डक्राफ्टेड भएकाले अमेरिकन डायमन्डको फिनिसिङ रामो हुने श्रेयाको अनुभव छ ।
“यो रियल डायमन्डजस्तो देखिन्छ । बजारमा पाइने यस्ता डायमन्ड स्टोन गमले मात्रै टाँसेका हुन्छन्, “उनले भनिन् “तर, हामीले ह्याडवर्क गरेर रियल लुक्स्का लागि क्ल्पिङ गरेका छौँ ।”
घाम र पसिनाबाट नबिग्रने ‘५ ए–ग्रेडको अमेरिकन डाइमन्ड’को स्टोनमा लाइफटाइम र प्लेटिङमा पाँचवर्षको वारेन्टी हुने बताउँछिन् श्रेया ।
पर्फ्यूम, क्रिम, हेयर स्प्रे, साबुनपानीबाट बचाउन सके वारेन्टी सकिएको लामो समयसम्म चमक र गुणस्तरमा ह्रास नआउने प्रकृतिको भनाइ छ ।
५ ए–ग्रेडको अमेरिकन डाइमन्डलाई रियल हिरा भनी धेरै झुक्किने गरेको श्रेयाको अनुभव छ । “कतिपय ग्राहक सक्कली हिरा भन्दै हामीकहाँ आउनुहुन्छ । तर, मूल्य बताएपछि अचम्ममा पर्नुहुन्छ,” श्रेया भन्छिन् ।
आमग्राहकमा अमेरिकन डायमन्ड भन्नेबित्तिकै अमेरिकाबाटै आएको भन्ने बुझाइ रहेको बताउँदै यी आभूषण अमेरिकाबाट नभएर भारतबाट आउने उनीहरू बताउँछन् ।
रहर भएर पनि हिराका आभूषण प्रयोग गर्न नसक्नेहरूलाई लक्षित डायमन्ड पछिल्लो समय धनाढ्यको रोजाइमा परेको श्रेया बताउँछिन् ।
केकी अधिकारी, ऋचा शर्मा, स्वेता खड्का, दिया मास्केलगायतको रोजाइमा आफ्नो प्रोडक्ट परेको बताउँछन् यी दिदीबहिनी ।
पछिल्लो समय विदेशमा बस्ने नेपाली ग्राहकको रूपमा जोडिने क्रम बढेको अनुभव छ ।
ग्राहकको मागबमोसिजम कस्टमाइज सेट उपलब्ध हुने भन्दै करिज्मा फेसन’ सँग टिआरा, नेक्लेस, एयररिंग, ब्याङ्गल, ब्रुचेज र औंठी उपलब्ध रहेको उनीहरूले जानकारी दिए ।
नेपालमा अनलाइन व्यवसायलाई पार्टटाइम जबको रूपमा हेरिने गरेको बताउँदै यी दिदीबहिनी आफूहरू पूर्णकालीन रोजगारको रूपमा अघि बढ्ने योजनामा रहेको बताउँछन् ।
पसल खोल्दा पसलको भाडा र कर्मचारीको तलबका कारण सामानको मूल्य बढ्न जाने श्रेयाको अनुभव छ ।
“हाम्रो चिनारी गुणस्तरीय सामान भरपर्दो मूल्यमा दिन सक्नु हो,” उनले भनिन् ।
उपत्यकाका ग्राहकले डेलिभरी सुविधा पाउने बताउँदै उपत्यकाबाहिरका ग्राहकले केही शुल्क तिर्नुपर्ने बताउँछन् उनीहरू ।
ग्राहकको चित्त नबुझे आफूहरूले सामान फिर्ता लिने गरेको उनीहरूले बताए । “अनलाइन व्यवसाय भनेर हुँदैन । यसमा पनि उत्तिकै समय दिनुपर्छ,” उनीहरूले भने ।
आफूहरूले भित्र्याएको ए–ग्रेडको अमेरिकन डायमन्डले लोकप्रियता पाइरहेको बताउँदै उनीहरूले धेरै आभूषण भित्रिए पनि यो गुणस्तरका आभूषण नभित्रिएको दाबी गरे ।
हाल बेल्जियम, अस्ट्रेलियन डायमन्ड पनि रियल डायमन्डको विकल्प भएको भन्दै मूल्यका दृष्टिले तिनीहरू अमेरिकन डायमन्डभन्दा महँगो हुने गरेको उनीहरूले बताए ।
“हामीले सुरु गर्नुअघि यसको त्यति लोकप्रियता थिएन, उनीहरूले भने “तर, अहिले धेरै यसखालका गहना पाउन थालेका छन् । ती कम गुणस्तरका छन् ।”
यसरी सुरु भएको थियो ‘करिज्मा फेसन’
‘करिज्मा फेसन’को सुरुवात हुनुमा प्रकृतिको अठोट र निडर स्वभावले काम गरेको छ । एसएलसी सकिएपछि कुनै कन्सल्टेन्सीमा काम गरेकी उनले पछि आफ्नै कन्सल्टेन्सी खोलिन् ।
फेसबुक स्क्रोल गर्ने क्रममा उनको नजर एकदिन अनलाइनमा आएका गरगहनाको विज्ञापनमा पर्यो । उनले त्यही अर्डर गरेर साथीको जन्मदिनमा दुई जोर गहना उपहार लगिन् ।
त्यसपछि यसअघि खरिद गरेको अनलाइन र बाहिरका निर्माण कम्पनीसँग कुरा गरेर ‘करिज्मा फेसन’नामक फेसबुक पेजमार्फत् गरगहनाको व्यवसाय सुरु गरिन् ।
सुरुसुरुमा उनले फेसबुक पेजमा फोटो राख्ने र अर्डर आए मात्र सामान ल्याउने गरिन् ।
तर, विस्तारै ग्राहक बढ्दै गए । जसले उनमा हौसला बढाउँदै लग्यो । दुई वर्षसम्म उनले अमेरिकन डायमन्डकै कम गुणस्तरका गरगहना बेचिन् ।
यतिञ्जेलसम्म उनको यसअघिको व्यवसाय चलिरहेको थियो । पहिलो प्राथमिकता कन्सल्टेन्सी भएकाले उनले यसमा ध्यान दिन सकिरहेकी थिइनन् । तर, उनलाई अनलाइन व्यवसाय बन्दै गर्न पनि मन थिएन ।
यसैक्रममा उनी बहिनी (श्रेया उनको बुबाको साथीकी छोरी हुन् ) सँग सुस्ताएको डायमन्ड व्यवसाय व्यवस्थित गर्ने प्रस्ताव लिएर पुगिन् ।
डिजास्टर म्यानेजमेन्ट (विपद् व्यवस्थापन)मा स्नातकोत्तर सकेकी श्रेयालाई आफ्नै क्षेत्रमा काम गर्ने चाहना थियो । तर, अप्लाई गर्दा काम गरेको अनुभव खोज्ने भएकाले उनी दिक्क मानिरहेकी थिइन् ।
पढाइ र काम सँगसँगै लैजाने सपना पूरा हुन नसकिरहेको अवस्थामा दिदी (प्रकृति)को प्रस्तावलाई सहर्ष स्वीकार गरेर यसमै केन्द्रित भएको उनले बताइन् ।
“दिदीको प्रस्तावपछि म बाहिरका राम्रा ब्रान्ड खोज्न लागेँ । यसै क्रममा मैले ए–ग्रेडको अमेरिकन डायमन्डबारे पत्ता लगाएँ । त्यसपछि यही ग्रेडको प्रोडक्ट मात्रै बेच्न थाल्यौँ,” श्रेयाले सुनाइन् ।
इच्छाविपरीत डायमन्ड व्यवसायमा प्रवेश गरेकी श्रेया अहिले यसैमा रमाउन चाहन्छिन् । बुवाआमाले जागिर खान सुझाव दिए पनि आफू अनलाइन व्यवसायलाई नै राम्रो बनाउने योजना रहेको बताउँछिन् ।
कतिपयले एक विषय पढेर अर्कै काम गर्ने भनी उडाउने गरेको बताउँदै उनी आफूले पढेकै विषयबमोजिम काम गर्नुपर्छ भन्ने नरहेको उनको धारणा छ ।
तस्बिर ः हरिश क्षेत्री
-1714657152.jpeg)
