काठमाडौं । बालबालिकाहरू सहभागी अहिले चलिरहेको सांगीतिक रियालिटी शो ‘सारेगमप लिटिल च्याम्पस’ नियालेर हेर्ने दर्शकले एउटा अनुहार सम्भवतः पटक–पटक देखेको हुनुपर्छ । नौजना म्युजिसियनमध्ये गोरो–गोरो गोलो फेसको मंगोल अनुहारको व्यक्ति किबोर्ड बजाइरहेका देखिन्छन् । यी व्यक्तिलाई क्यामेराले हमेसा मार्क गरिरहेको हुन्छ । एडिटरले उनलाई फुत्त–फुत्त बच्चाहरूले गाइरहेका बेला देखाइरहेको हुन्छ । ती व्यक्ति हुन्, किबोर्डडिस्ट प्रज्ज्वल लामा ।

घरमा बुवा गिटारिस्ट थिए । घरमा गिटार त हुने नै भयो । गिटारसँगै किबोर्ड पनि थियो । कारण, बुवा म्युजिसियन पनि हुन् । बच्चैदेखि किबोर्डमा प्रज्ज्वलका औँला डुल्न थाले । थाहै नपाई उनलाई किबोर्डमा करिब–करिब लत बस्यो । आमा हिन्दी सिरयल र गीतहरू हेर्थिन् । सिरियलका जिंगल र गीतको सुरुको धुनमा प्रज्ज्वलले किबोर्डको धुन मिसाउन थाले । विस्तारै मिले–मिलेजस्तो हुन थाल्यो ।

सायद धेरै मिल्यो वा सम्भावना देखियो । बुवा (सुरेश लामा)ले छोरालाई दुई कक्षामा पढ्दै गर्दा किबोर्डको क्लासमा राखिदिए । बेसिक आइडिया बुवाबाट सिकेका उनले त्यहाँ नोटेसन सिके ।

पहिलो गुरु बनाए प्रदीप श्रेष्ठलाई । उपेन्द्र सिंहलाई पनि गुरु थापेका प्रज्ज्वलले थुप्रै विदेशीबाट पनि किबोर्डको शिक्षा लिए । अहिले कुनै पनि कुरा सिक्न कुनै शिक्षालय गएर गुरुकै अगाडि बस्नुपर्ने समय रहेन । युट्युब र अनलाइनबाट किबोर्डबाट थप राम्रो धुन निकाल्न सिकिरहेका छन् ।

अक्सर मान्छे गीत गाउन रुचि राख्छ । किनकि, त्यो ग्ल्यामर फिल्ड हो । तर, प्रज्ज्वललाई गायनको ग्ल्यामरले तानेन । खै किन–किन उनी किबोर्डमै रमाइरहे । भलै, उनले क्लालिकल शास्त्रीय संगीत प्रभुराज ढकालसँग चार वर्ष सिकेका छन् । तर, सांगीतिक ज्ञानका लागि मात्रै । त्यसैले त उनी कसैले दिएको नोटेसन हेरेर मेसिनरी भएर बजाउँदैनन् मात्रै । सुर र ताल मात्रै होइन सरगम, गमक र खिड्का पनि उनलाई थाहा छ । यही कारण त उनी गायक/गायिकाको स्वरानुसार छिनमै किबोर्डमा आफ्ना औँलाहरूलाई ‘डाइभर्ट’ गर्न सक्छन् । बिग्रिन लागेको गायनलाई बचाइदिन्छन् ।

किबोर्डको धुनमा जीवन खोजिरहेका उनले थुप्रै गीतमा किबोर्ड बजाइसकेका छन् । न्युह् बज्राचार्यका ‘सयौँ काँडा...’, ‘टाढाटाढा...’ लगायत डेढ दर्जनभन्दा धेरै गीतमा उनले किबोर्ड मात्रै बजाएका छैनन्, म्युजिक एरेन्ज पनि गरेका छन् ।

अधिकांश म्युजिकल रियालिटी शोमा किबोर्ड बजाइसकेका उनले सुरु ‘सुरसाला आइडल’बाट गरेका थिए । त्यसयता ‘नेपाल आइडल’ पहिलो सिजनमा किबोर्ड बजाएका प्रज्ज्वलले ‘भ्वाइस अफ नेपाल’का तीनवटै सिजनमा आफ्नो कला प्रस्तुत गरिसकेका छन् । अहिले उनी सारेगमप लिटिल च्याम्पसमा किबोर्ड बजाइरहेका छन् ।

उनको जिम्मा किबोर्ड बजाउने मात्रै होइन । आवश्यक परे र अप्ठ्यारो हुने अवस्था आए म्युजिकको कर्ड लेखेर अन्य म्युजिसियनलाई सहजता प्रदान गर्नु पनि हो ।

म्युजिकल रियालिटी शोमा मात्रै होइन, उनले थुप्रै कन्सर्टहरूमा पनि किबोर्ड बजाएका छन् । एड्रियन प्रधान, सबिन राई, नरेन लिम्बू, सत्य–स्वरूप, कालीप्रसाद बास्कोटा, इन्दिरा जोशीलगायत थुप्रै गायक/गायिकाको कन्सर्टमा उनले किबोर्डमा आफ्ना औँलाहरू चलाएका छन् ।

नेपाली कलाकार मात्रै होइन, भारतीय कलाकारहरूसँग पनि प्रज्ज्वलको कला मिसिएको छ । आशा भोस्ले, साधना सर्गमलगायत भारतीय गायक/गायिकाको गीतमा पनि उनले आफ्नो कला मिसाए ।

रियालिटी शोमा काम गर्न जति रमाइलो हुन्छ त्यति नै चुनौती पनि । “रियालिटी शोमा ब्लकमा गीत आउँछ । ६० देखि सयवटासम्म गीत एकैपटक आउँछ, त्यो बेला निकै प्रेसर हुन्छ,” प्रज्ज्वल सुनाउँछन्, “त्यस्तो बेला सबै याद गर्छु भनेर हुँदैन, नोटेसन गर्नुपर्छ । ब्यान्डसँग प्राक्टिस गर्नुपर्छ । जसका लागि निकै छोटो समय हुन्छ ।”

एक दिन अगाडि गीत आउँछ । त्यसमा पनि एउटा सुरको गीत हुन्छ, तर गाउने व्यक्तिको स्वरको रेन्जानुसार अर्कै सुरमा बजाउनुपर्छ । कसैको भोकल गीतभन्दा लो अथवा हाइ हुन्छ, आफू त्यसमा पलभरमै ढल्नुपर्छ । यसमा आफूलाई तत्काल ढाल्न सक्ने अब्बल ठहरिन्छ, नसक्ने कमजोर ।

ठूलो शोमा धेरै पेमेन्ट हुन्छ, सानोमा थोरै । तर, जे होस् प्रज्ज्वलको मूल्यांकन आजसम्म आयोजकले राम्रै गर्दै आएका छन् । उनी हाइएस्ट पेड म्युजिसियन हुन् । त्यसैले त उनलाई किबोर्डसँग खेलिरहँदा यसको विकल्प खोज्नुपरेको छैन ।

आकर्षक पारिश्रमिककै कारण उनले आफूले चाहेको किबोर्ड किन्न सकेका छन् । रहर गरेको किबोर्डको किमा आफ्ना औँलाहरू डुलाउन पाएका छन् ।

उनलाई एउटा किबोर्डले मन खिचेको थियो । तर, त्यो थियो अमेरिकामा मात्रै । उक्त किबोर्ड वर्ल्डमै जम्मा ५० पिस थियो । तर, उनको रहर त्यही किबोर्डमा अड्किएको थियो । त्यसैले दुई वर्ष अगाडि उनले कर्ड कम्पनीको उक्त एउटा किबोर्ड अर्डर गरे । यूएसबाट सिंगापुर र सिंगापुरबाट चाइना हुँदै किबोर्ड नेपाल डेलिभर भयो ।

“विश्वका ठूलठूला आर्टिस्ट र ठूलठूलो रियालिटी शोमा अहिले बजाउने किबोर्ड यही हो,” उनी भन्छन्, “अहिले सबैले हेर्ने कम्फर्ट र क्वालिटी हो । त्यसैले पनि यसले मलाई लोभ्यायो । यो किबोर्ड म कहिले–कहिले सारेगमप शोमा पनि लगेर बजाइरहेको हुन्छु ।”

किबोर्डबाट सुमधुर धुन त उनी निकालिरहन्छन्, तर त्यसका लागि कति घण्टा साधना गर्छन् ? यसमा यति नै बिताउँछु भनेर उनी समय छुट्ट्याउँदैनन् । तर, जब उनी युट्युबमा कसैले गज्जबले किबोर्ड बजाएको देख्छन्, उनलाई त्यस्तै धुन सिर्जना गर्ने हतारो हुन्छ । र, किबोर्ड अगाडि बसिहाल्छन् अनि सुरु गर्छन् नयाँ धुन निकाल्न ।

अब्बल किर्बोडिस्ट उनी भइसके । त्यसैले त प्रज्ज्वललाई अधिकांश फ्रेन्चाइज शोहरूले खोजिरहेका छन् । तर, उनलाई यतिमै सीमित हुनु छैन । किबोर्डभित्र अझै धेरै नौला धुनहरू खोज्ने चाहले प्रज्ज्वल आफ्नो अध्ययनलाई थप फराकिलो बनाउन खोज्दै छन् ।

किबोर्डको ग्रेड ८ सम्मको अध्ययनमध्ये रोयल लन्डन कलेज अफ म्युजिकबाट उनले क्लासिकल पियानोको ग्रेड फाइभ उत्तीर्ण गरिसकेका छन् । रोयल एबीआरएसएममा पनि अध्ययन सकिसकेका छन् । काठमाडौं युनिभर्सिटी अफ म्युजिकोलोजीबाट ब्याचलर्स गरिसकेका प्रज्ज्वल यसमै मास्टर्ससम्मको अध्ययनका लागि विदेशी विश्वविद्यालय जाने तयारीमा छन् ।