काठमाडौं । हुम्लामा कथित माथिल्लो जातको युवतीसँग विवाह गरेका भनिएका एक युवक एक सातादेखि बेपत्ता छन् ।

स्थानीय चन्द्रे कामी बेपत्ता भएको एक सातासम्म पनि अत्तोपत्तो नलाग्दा परिवार चिन्तित छ । केटाले आफूलाई दुई महिनासम्म लुकाइछिपाइ राखेको र ‘टुनामुना गरी विवाह गरेको’ बयान ती युवतीले प्रहरीसमक्ष दिएकी छन् ।

छोराको चिन्ताले चन्द्रेकी आमा पिरोलिएको चन्द्रेका भिनाजु धुनी भियालले बताए । ‘‘छोरा बेपत्ता भएको दिनदेखि चन्द्रेकी आमाले केही पनि खाना खाएकी छैनन् । पहिलेदेखि कमजोरी खाना नखादा बिरामी परेकी छन् । घरमा रातदिन रुवाबासी छ । युवती पक्षले उसैको घरतिर छाडिदिएको भन्दै टारिरहेको छ । हाम्रै घरतिर छोडेको भए बेपत्ता चन्द्रे किन घर आएन ? लामो समयको प्रेमपछि भागी विवाह भएको सबैलाई थाहा छँदै छ । कहाँबाट कसले लगायो टुनामुना ?,” भियालले भने ।

युवतीलाई ललाइफकाइ ‘टुनामुना’को बयान दिन लगाएको कामी पक्षको दाबी छ । उनको परिवारका अनुसार विवाहपछि दुवैजना राजीखुसी लुकेर बसेका थिए ।

गएको मंसिर ५ गते सर्केगाड गाउँपालिका–१, जैर नात्ता गाउँका १९ वर्षीय चन्द्रे कामी र मुगुको सोरु गाउँपालिका–४, लिपु्र गाउँकी १९ वर्षीया सुन्तली मल्लको ‘भागी विवाह’ भएको बताइन्छ । कथित उपल्लो जातसँग दलित युवकको विवाह युवती पक्षलाई मञ्जुर थिएन ।

त्यसपछि उनीहरू युवतीको परिवारको डरले सर्केगाड गाउँपालिका–२, रिप गाउँमा लुकीछिपी बस्दै आएका थिए । त्यस समयमा वडाध्यक्ष गोकुल बुढालाई विवाह दर्ताका लागि आग्रह पनि गरेका थिए । तर, वडाध्यक्ष बुढाले उमेर नपुगी विवाह दर्ता गर्न नमिल्ने बताए ।

पछि युवती पक्षले केही नगर्ने भन्दै उनीहरूलाई घर आउन मञ्जुर गराइएको थियो । गएको मंसिर २९ गते राति करिब २० जनाको समूहले चन्द्रे कामीलाई नग्न बनाएर निर्घात कुटपिट गर्दै आफूसँगै लगेको चन्द्रेका बुवा धञ्जय कामीले बताउँदै आएका छन् ।

उक्त समूहका व्यक्तिहरू अहिले पनि फरार छन् । सोमबार प्रहरीले युवतीका बुवालाई प्रक्राउ गरेर सोधपुछ गरिरहेको छ । घटनापछि उनी पनि फरार थिए ।

युवतीका आफन्तले युवकले ‘टुनामुना लगाएर’ मल्ललाई लिएर गएको र प्रेम सम्बन्ध नभएको बताउँदै आएका छन् । युवती पक्षले चन्द्रे कामीलाई बेपत्ता नपारिएको दाबी पनि गर्दै आएको छ ।

युवती पक्षले ‘टुनामुना’लगायत अन्धविश्वासजन्य कुरा गरेर घटना मोड्न खोजिएको सर्केगाड गाउँपालिका–१ का वडाध्यक्ष बुढाले बताउँछन् । ‘‘युवतीले अर्थ न व्यर्थको बयान दिएकी छन् । दलितको छोराले ठकुरीको छोरीलाई ‘टुनामुना’ लगाएर विवाह गरेको असम्भव हो । केटाकेटीको लामो समयको प्रेम सम्बन्धकै कारण बिहे भएको हो । आज चन्द्रे बेपत्ता भएको एक साता भइसक्यो । केटाको आमा घरमा बिरामी हुनुहुन्छ,” बुढाले भने ।

परिवारले कुटपिट घटनाको भोलिपल्ट पुस १ गते स्थानीय डाँडामा चन्द्रेको टिसर्ट फेला पारेको थियो । चन्द्रेका भिनाजु भियाल भन्छन्, ‘‘हाम्रो पावर–पहुँच छैन । अहिलेसम्म चन्द्रेको कुनै अत्तोपत्तो छैन । कहाँ गएर के गरौँ ?”

कुटपिट घटनाकै राति कामीलाई उनकै घर आसपास छोडिएको बयान पनि युवतीले दिएको प्रहरी स्रोतले जनाएको छ ।

जिल्ला प्रहरीका कार्यालय हुम्लाबाट खटिएको डीएसपी नेतृत्वको टोली हाल घटनास्थलमा सक्रिय छ । घटना अनुसन्धानकै क्रममा रहेकाले थप जानकारी दिन नसकिने प्रहरीले जनाएको छ ।

डीएसपी हेरम्ब शर्माले बेपत्ता कामीको अहिलेसम्म केही पत्ता नलागेको बताए । ‘‘प्रहरीको प्रारम्भिक अनुसन्धानमा ५० प्रतिशत लुकाइएको र ५० प्रतिशत मारिएको भन्ने छ । यद्यपि, बेपत्ता कामीको खोजीकार्य जारी छ । लुकाइएको र मारेको कुनै पनि प्रमाण अहिलेसम्म भेटिएको छैन । अहिले केही भन्न सकिने अवस्था छैन,” डीएसपी शर्माले भने ।

डीएसपी शर्माले बयानभन्दा बेपत्ता कामीको खोजीकार्य तीव्र पारिएको जानकारी दिए ।

यी पनि पढ्नोस्–

हुम्लामा अन्तरजातीय विवाह : फरार रहेका युवतीका बुवा पक्राउ 

बेपत्ता छोराको खोजीमा छटपटाइरहेका बुवा भन्छन्– छोराले ठकुरानीसँग नगर्नु बिहे गरेछ, कहाँ गएर न्याय मागौँ ?

हुम्लामा अन्तरजातीय बिहे गरेको भन्दै दलित युवालाई घरबाटै बेपत्ता बनाइयो !