काठमाडौं । अन्तरजातीय विवाह गरेका कारण चन्द्रे कामीलाई बेपत्ता पार्ने कार्यमा संलग्न भनिएका फरार रहेका युवतीका बुवा पक्राउ परेका छन् ।  मुगुको सोरु गाउँपालिका ४ लिप्रु गाउँकी १९ वर्षीया सुन्तली मल्लका बुवा वीरबहादुर मल्ल पक्राउ परेका हुन् ।
 
जिल्ला प्रशासन कार्यालय हुम्लाका अनुसार सुन्तलीका बुवालाई आज पक्राउ गरिएको हो । जिल्ला प्रशासन कार्यालय हुम्लाका प्रमुख जिल्ला अधिकारी गणेश आचार्यले घटना लगत्तै फरार युवतीका बुवालाई पक्राउ गरेको जानकारी दिए । 

‘‘बेपत्ता चन्द्रेको खोजीकार्य जारी छ । दुबै पक्षबाट अनुसन्धान भइरहेको छ । युवती पक्षको बयान अनुसार केटालाई उसैको गाउँ आसपासमा छोडिएको छ,” प्रजिअ आचार्यले भने । 

सुन्तली मल्लसँग सर्केगाड गाउँपालिका १ जैर नात्ताका चन्द्रे कामीले दुई महिना अगाडि पे्रम विवाह गरेका थिए । उनीहरु अन्तरजातीय विवाह गरेकै कारण दुईमहिनासम्म लुकेर बसेका थिए । पछि युवती पक्षले केही नगर्ने भन्दै घर आउन राजी बनाएको थियो । 
 
चन्द्र र सुन्तली घर फर्किएपछि युवतीपक्षले चन्द्रेको गाउँलेलाई धम्क्याएर  सबै घरका ढोका बन्द गराएर चन्द्रेलाई नग्न बनाएर कुटपिट गरी बेपत्ता बनाइएको थियो । 

बेपत्ता बनाउने २०–२५ जनाको समूह फरार थियो । सोही समूहमा युवतीका बुवा पनि रहेको प्रहरीको प्रारम्भिक अनुमान छ ।  

हुम्लामा अन्तरजातीय बिहे गरेको भन्दै दलित युवालाई घरबाटै बेपत्ता बनाइयो !

बेपत्ता छोराको खोजीमा छटपटाइरहेका बुवा भन्छन्– छोराले ठकुरानीसँग नगर्नु बिहे गरेछ, कहाँ गएर न्याय मागौँ ?