काठमाडौं । हुम्लामा उपल्लो जात (मल्ल) थरकी युवतीसंग प्रेम विवाह गरेको भन्दै एक युवालाई बेपत्ता पारिएको खुलेको छ ।

गत मंसिर २९ गते रातिबाट सर्केगाड गाउँपालिका वडा नम्बर १ जैर गाउँका १९ वर्षीय चन्द्रे कामीलाई बेपत्ता पारिएको खुलेको हो । 

चन्द्रेले दुई महिनाअघि मुगुको सोरु गाउँपालिका वडा नम्वर ४ लिपु्र गाउँकी १९ वर्षीया सुन्तली मल्लसँग प्रेम सम्बन्ध हुँदै अन्तरजातीय विवाह गरेका थिए । उनीहरु विवाहपछि भागेर सर्केगाडस्थित रिप गाउँमा आफन्तकहाँ लुकेर बसेका थिए । 

युवतीका माइतीपक्षले सुरुदेखि नै चन्द्रेको खोजी गर्दै आएको खुलेको छ । दुई महिनापछि चन्द्रेसँग माइतीपक्षको सम्पर्क भएको र आफूहरुले केही नगर्ने भन्दै सम्पर्कमा बोलाएको खुलेको छ । 

उनीहरु सम्पर्कमा आएपछि केटालाई युवती पक्षले निर्घात कुटपिट र अमानवीय शैलीमा लगेको वडाध्यक्ष गोकुल बुढाले बाह्रखरीलाई बताए । सोही दिनदेखि चन्द्रे बेपत्ता छन् । युवती भने माइतीघरमा छन् । 

बेपत्ता भएको चार दिनसम्म चन्द्रेको अवस्था अज्ञात रहेको र घटनालाई तोडमोड गर्न लागिएको वडाध्यक्ष बुढाले बताए । 

उनका अनुसार घटनाको सत्यतथ्य पत्ता नलाग्दै हुम्ला र मुगुका नेताहरु मिलेर घटना मोड्न खोजिँदैछ । 

‘‘केटी पक्षकाले केटा लुकेको होला भन्छन् । गत २९ गते राति १२–१ बजेतिर केटी पक्षकाले केटा र केटीलाई लिएका थिए । केटाको केही कपडा तलको डाँडामा भेटियो भन्ने खबर आएको छ । केटी पक्षका २०–२५ जनाले पछाडि हात बाँधेर लिएर गएको भन्ने सुन्नमा आएको छ । कसरी लुकेको वा भागेको भन्ने ?,” वडाध्यक्ष बुढाले भने । 

अन्तरजातीय विवाह गरेकै कारण केटीपक्षले केटालाई बेपत्ता परेको स्थानीयको आरोप छ । 

वडाध्यक्ष बुढाले भने ‘‘अहिलेसम्म केटाको अत्तोपत्तो छैन । केही नेताहरु मिलाउनु पर्छ भनेर लागेका लाग्यै छन् । मान्छे भेटिएकै छैन । कसरी मिलाउने ? वारि पारीका नेताहरु त्यसै मिल्नुपर्छ भन्छन् । त्यस्तो हुँदैहुँदैन ।”

बेपत्ता कामीले मंसिर ५ गते मल्लको घरबाट केटा र केटीको राजीखुसीमा केटीलाई भगाएर विवाह गरेका थिए । मंसिर २९ गते राति केटी पक्षका २०–२५ जनाको हुलले निर्घात कुटपिट गर्दै चन्द्रेलाई लिएर गएका थिए । 

घटनाको अर्कोदिन कामीका बुवा धनजय कामीले प्रहरीलाई खबर गरेका थिए । निर्घात कुटपिट गर्ने २०–२५ जनाको टोली अहिलेसम्म सम्पर्कमा आएका छैनन् । 

बेपत्ता चन्द्रे कामीका भिनाजु धुनि भियालले अहिलेसम्म अवस्था अज्ञात हुँदा परिवार चिन्तामा रहेको बताए । 

‘‘घटनालगत्तै प्रहरीलाई खबर गरेका थियौँ । हामी केही पनि जान्दैनौँ । बेपत्ता केटा नभेटिँदै भित्रभित्रै मिलाउन खोजिँदैछ । हामीले कहाँबाट न्याय पाउने ?,” भियालले भने । 

सर्केगाड गाउँपालिकाका उपाध्यक्ष जोशी धामीले घटनाको छानबिन गर्न सर्केगार्ड प्रहरी चौकी, श्रीनगर प्रहरी चौकीको टोली, सोरुकोट प्रहरी टोली र हुम्ला प्रहरी डीएसपीको टोली सक्रिय रहेको बताए । 

‘‘अहिलेसम्म पनि केटा बेपत्ता छ । आज केटीका बुबा र केटाका बुबाबीच प्रहरीले छलफल गराउँदैछ । केटीले केटालाई लुकाएको हो भने बाहिर ल्याउनु पर्‍यो । घटनाको अवस्था सार्वजनिक हुनुपर्‍यो,” उपाध्यक्ष धामीले भने । 

जिल्ला प्रहरी कार्यालय हुम्लाले शनिबार डीएसपीको टोली पनि परिचालित गरेको जनाएको छ । प्रहरी नायब उपरीक्षक (डीएसपी) हेरम्ब शर्माले अनुसन्धान जारी रहेको जानकारी दिए । 

‘‘केटी माइतीघरमै छिन । केटा बेपत्ता रहेका छन् । केटीको बयानअनुसार केटालाई मारिएको छैन । यद्यपी बेपत्ता पारिएको केटाको खोजीकार्य जारी छ,”डीएसपी शर्माले भने । 

हुम्लाका प्रमुख जिल्ला अधिकारी गणेश आचार्यले प्रहरीले युवतीको बयान लिएको जानकारी दिए । 

‘‘बेपत्ता केटालाई उसैको घरतिर छोडिदिएको केटीले बयान दिएकी छन् । चार दिनसम्म पनि घटनाबारे सत्यतथ्य बाहिर नआउँदा जिल्लाबाटै डीएसपीको टोली खटाएका छौँ । डीएसपीको टोली आज घटनास्थलमा पुग्छ । त्यसपछि थप अनुसन्धान हुनेछ,” प्रजिअ आचार्यले भने ।