काठमाडौ । ललितपुर महानगरपालिकाका मेयर चिरिबाबु महर्जन सबैभन्दा धेरैपटक विदेश भ्रमणमा जाने मेयरहरूको सूचीको अग्रस्थानमा पर्छन् । विदेश भ्रमणलाई ‘ठूलो उपलब्धि’ मान्ने गरेका मेयरले आलोचना पनि खेप्दै आएका छन् । 

तर, उनले महानगरवासीको घरदैलोमा भोट माग्न जाँदा व्यक्त गरेका कैयाैँ चुनावी प्रतिवद्धता भने अझै पूरा गर्न सकेका छैनन् । मेयर महर्जन २०७४ जेठ १० गते नेपाली कांग्रेसबाट ललितपुर महानगरपालिकाको मेयरमा निर्वाचित भएका थिए ।

चुनावताका मेयर महर्जनले सडक सुविधा र व्यवस्थापन, बजारको पूर्वाधार विकास, पशुजन्य संकलन तथा प्रशोधन केन्द्र व्यवस्थापन गर्ने, तेल मिल निर्माण गर्ने, थापाथलीदेखि पुल्चोकसम्म फ्लाइओभर निर्माण, निःशुल्क प्री स्कुल बनाउने प्रतिवद्धता जनाएका थिए । त्यतिमात्र होइन, उनले महानगरीय पुस्तकालय सञ्चालन गर्ने, पर्यटन बसपार्क निर्माण गर्ने, खुला कसिङ्गर मुक्त महानगर बनाउने योजनादेखि प्लास्टिक झोला मुक्त गर्नेसम्मका वाचा मतदातासमक्ष गरेका थिए । 

त्यतिबेला उनले आफ्नो कार्यकालभित्र आफूले गरेका बाचा पूरा गरेरै छाड्ने बताएका थिए । तर, पछि उनी कोरोना महामारी र सार्वजनिक खरिद ऐन ‘झण्झटिलो’ भन्दै पन्छिए । 

महानगरले थापाथलीदेखि पुल्चोकसम्म फ्लाइओभर निर्माण गर्न सम्भाव्यता अध्ययन थाल्ने जनाएको थियो । तर, बीचमै अलपत्र पर्यो । यस्तै, उनले कृषि पकेट क्षेत्र घोषणा, सांस्कृतिक सम्पदा पुननिर्माण, एक वडा एक शौचालय बनाउने प्रतिवद्धता व्यक्त गरेका थिए । तर, कार्यान्वयनको पाटो भने निकै कमजोर रह्यो ।

महानगरले भने सांस्कृतिक सम्पदा पुनर्निर्माणमा ठूलो सफलता हाँसिल गरेको बताउने गरेको छ । मछिन्द्रनाथको मन्दिर, हरिसिद्धिलगायत ठूला सम्पदा पुनर्निर्माण गरेर देखाएको मेयर महर्जनको भनाइ छ । आफूले गरेका चुनावी प्रतिवद्धताहरू पूरा भइसकेको उनको दाबी छ । 

महानगरका प्रवक्ता राजु महर्जन मेयर महर्जनले उदाहरणीय काम गरेको बताउँछन् । ‘‘विदेश भम्रण गर्न जाँदा केही मानिसहरूले नबुझेरै आलोचना गरेका थिए । मेयर महानगरपालिकाको कामले नै विदेश जाुनभएको हो । वास्तवमा विद्युतीय बस सञ्चालन, सम्पदा पुनर्निर्माण, साइकल लेन, हरियाली महानगर प्रवद्र्धन गर्न प्रत्यक्ष रूपमा मेयरको विदेश भ्रमणले योगदान पुर्याएको छ । यद्यपि महानगरवासीले ललितपुरको विकास भए नभएको महसुस गरेकै छन्,” प्रवक्ता महर्जनले भने ।  

मेयर महर्जन पनि आफूले जनताबीच विवाद नआउने गरी काम गरेको बताउँछन् । ‘‘मेयर भइसकेपछि मैले कस्तो खालको काम गरेको छु भनी महानगरवासीले देखेकै छन् । चुनावमा व्यक्त गरेका अधिकांश प्रतिवद्धताहरू पूरा गरिसकेको छु,” मेयर महर्जनले भने । 

मेयर महर्जनका अनुसार चुनावी प्रतिवद्धता मात्रै नभएर विदेश भम्रणको प्रत्यक्ष प्रभाव महानगरवासीलाई परेको छ । ‘‘सार्वजनिक खरिद ऐन प्रक्रियाका कारण रोकिएका केही योजनाहरू मात्रै बाँकी छन् । अन्य पूरा गर्नुपर्ने प्रतिवद्धताहरू पूरा भइसकेका छन्,” महर्जनले भने । 

ऐतिहासिक सांस्कृतिक सम्पदाहरूलाई परम्परागत शैलीमै निर्माण गरिएको महानगरले जनाएको छ । अन्य निर्माणाधीन सम्पदाहरू पुननिर्माणको अन्तिम चरणमा रहेका छन् । 

योसँगै महानगरले ठाउँको अभावले पशुसेवा केन्द्र बनाउँन नसकिएको स्वीकार गरेको छ । वडा स्तरीय सार्वजनिक शौचालयअन्तर्गत अहिलेसम्म १६ भन्दा बढी कार्यालयमा शौचालय निर्माण भइसकेका छन् । 

कृषि पकेटका लागि बजेट विनियोजन गरी उत्पादनमूलक बिउबिजन वितरण गर्दै आएको महानगरले जनाएको छ । योसँगै महानगरपालिकाका सबै वडा कार्यालय अन्तर्गत प्री स्कुल सञ्चालन भइसकेका छन् ।
 
पहिलो र दोस्रो लहरको कोरोना महामारीका कारण केही कामहरू गर्न बाँकी नै रहेको पनि महानगरले जनाएको छ ।