काठमाडौं । अमेरिकी राष्ट्रपति डोनाल्ड ट्रम्पले चीनसँगको चलिरहेको व्यापार युद्ध अन्त्य गर्ने संकेत दिएका छन् । साथै, उनले सामाजिक सञ्जाल टिकटकको भविष्यसम्बन्धी सम्झौता गर्न अझै केही समय लाग्न सक्ने बताएको समाचार संस्था रोयटर्सले जनाएको छ ।

ट्रम्पले चीनविरुद्ध लगाएको अत्यधिक आयात करका कारण सेयर बजारमा व्यापक असर परिरहेको छ ।

ट्रम्पले ह्वाइट हाउसमा भेला भएका पत्रकारहरूसँग भने, “म यो आयात कर अझ बढोस् भन्ने चाहन्नँ किनभने एक निश्चित सीमापछि मानिसहरूले खरिद नै गर्न सक्ने छैनन् ।”

“त्यसैले म कर बढाउन वा त्यो स्तर भन्दामाथि लैजान पनि चाहन्नँ । म कम मात्र कर लगाउन चाहन्छु किनभने मानिसहरूले खरिद गरुन् भन्ने चाहनुपर्छ । एउटा निश्चित विन्दुमा पुगेपछि त उनीहरूले खरिद गर्ने छैनन्,” ट्रम्पले थप भने ।