काठमाडौं । हुम्लाको सिमकोट विमानस्थलमा हवाई टिकट नपाउँदा २५० भन्दा बढी यात्रुहरू अलपत्र परेका छन् । दसैँ, तिहार मनाउन गाउँ गएका विद्यार्थी र सर्वसाधारणले लामो समयदेखि टिकट नपाएका हुन् ।

नेपालगन्ज, सुर्खेत र काठमाडौंमा पढ्ने विद्यार्थीहरूले लामो समयदेखि टिकट नपाउँदा होटेलमा बस्नुपरेको हवाई भाडा समेत सकिएको गुनासो गरेका छन् । सर्केगाड गाउँपलिका–१, जैरका वसन्त बुढा १५ दिनदेखि टिकट नपाउँदा अलपत्र परेको बताउँछन् ।

‘‘हवाई टिकट काउन्टरहरूले आफ्ना–आफ्ना मान्छेलाई मात्रै टिकट बिक्री गरिरहेका छन् । टिकट काउन्टरका कर्मचारीलाई भेट्नै गाह्रो छ । सहरमा पढाइ सुरु भइसक्यो,” उनले भने, ‘‘गाउँबाट तीन दिन हिँडेर सदरमुकाम पुगियो । बाटोमै तीन–चार हजार रुपैयाँ खर्च भइसक्यो । टिकट काट्ने रुपैयाँ १५ दिन होटेलमा बस्दा सकियो ।”

लगातार १५ दिनसम्म धाउँदा पनि टिकट नपाइएको स्नातक तहमा अध्यनरत सर्केगाड गाउँपालिकाकी मालती रावतले बताइन् । ‘‘टिकट काउन्टरका कर्मचारीहरूले टिकट कालोबजारी गरिरहेका छन् । सर्वसाधारणलाई दुई सातादेखि झुलाइरहेका छन् । भित्रैभित्रै टिकट बेचिरहेका छन्,” रावतले भनिन्, ‘‘पावर र पहुँचका आधारमा टिकट बिक्री भइरहेको छ । हामी पावर, पहुँच नभएकाले के गर्ने ? कसले मिलाइदिने टिकट ? टिकट काउन्टरमा टिकट बुझ्न जाँदा प्रहरीले रोक्छ ।”

सुरक्षाकर्मीले विद्यार्थी र सर्वसाधारणलाई टिकट काउन्टरसम्म जान समेत रोक लगाएको विद्यार्थीहरूको भनाइ छ ।

आउँदो मंसिर १३ गतेदेखि सञ्चालन हुने स्नातकोत्तर तह दोस्रो सेमेस्टरको परीक्षा दिने तयारीमा रहेका नन्ददेव कार्की पनि टिकट नपाउँदा चिन्तित छन् । ‘‘कैयौँपटक जिल्ला प्रशासन कार्यालय गुहारिसकेँ । परीक्षा प्रवेशपत्र देखाउँदा पनि टिकट पाउने अवस्था मिलेन । झन् प्रशासनले टिकट काउन्टरमा प्रहरी खटाएर असहयोग गरेको छ,” कार्कीले भने, ‘‘१३ गतेदेखि काठमाडौंमा परीक्षा हुँदै छ । अब महिनौँसम्म यस्तै भयो भने कसरी काठमाडौं जाने ? गाउँबाट ल्याएको खर्चपानी सकिसक्यो ।”

दैनिक बिहान ४ बजेदेखि लाइन बसे पनि टिकट नपाएको उनीहरूले बताएका छन् । आफूहरू मर्कामा पर्दा पनि स्थानीय सरकार, जिल्ला प्रशासन कार्यालय र सरोकारवाला निकायहरू मौन बसेको भन्दै विद्यार्थीहरू आक्रोशित छन् ।

सर्केगाड गाउँपालिका–१ का वडाध्यक्ष गोकुल बुढा यातायातको अर्को विकल्प नहुँदा यस्तो अवस्था आएको बताउँछन् । ‘‘पछिल्लो समय जहाजमा समस्या आएर टिकट नपाइएको भन्ने खबर आएको छ । मेरै वडाका १४ जना विद्यार्थीहरू होटेलमा बस्न नसक्ने अवस्था भएपछि मेरो घरमा बसिरहेका छन्,” वडाध्यक्ष बुढाले भने, ‘‘म आफैँ पनि एमाले महाधिवेशन विशेष कामको लागि काठमाडौं जानुपर्ने थियो । जहाजले कम फ्लाइट भरिरहेका छन् । टिकट काउन्टरमा बुझ्दा पहल भइरहेको जानकारी आएको छ ।”

तारा एयरका कर्मचारी नुर्ब लामा प्राथमिकताका आधारमा विद्यार्थीहरूलाई उडाउने गरिएको बताउँछन् । वायुसेवा निगमले नै कम फ्लाइट भर्दा समस्या आएको उनको भनाइ छ ।

‘‘यात्रुको चाप अत्यधिक छ । हामीले बढी फ्लाइट भर्न समन्वय गरिरहेका छौँ । टिकट कालोबजारी गरेर बेचेका छैनौँ । भित्रभित्रै टिकट किनबेच भएको छैन । पहिले गम्भीर किसिमका बिरामी आउँदा उडाउन सकिने अवस्था थिएन,” उनले भने, ‘‘अहिले यो अवस्था छैन । सकेजति सर्वसाधारण र विद्यार्थीहरूलाई नै पठाइरहेका छौँ ।”

जिल्ला प्रशासन कार्यालय हुम्लाका अनुसार अहिले करिब २५० जनाभन्दा बढी यात्रुहरू टिकटको खोजीमा छन् । यात्रुहरूको मागानुसार एयरलाइन्सले फ्लाइट भर्न नसकेको प्रशासनले जनाएको छ ।

हुम्लाका प्रमुख जिल्ला अधिकारी गणेश आचार्य यात्रुको सहजताका लागि विमानस्थलमा सुरक्षाकर्मी खटाइएको बताउँछन् । ‘‘टिकट नपाएको गुनासो आएको हो । यात्रुलाई टिकट काउन्टरले मनोमानी भाडा असुलिरहेका छैनन् । गुनासो लिएर आउने यात्रुहरूलाई सिफारिस गरेर पढाइरहेका छौँ,” उनले भने ।

प्रशासनका अनुसार आज चार फ्लाइट भएको छ । ‘‘अबका केही दिनमा सहज हुँदै जान्छ । पहल र समन्वय गर्ने प्रक्रियामा छौँ,” प्रजिअ आचार्यले भने ।

तत्काल उडान थप्ने तयारी भइरहेकाले अबका केही दिनमा टिकट सहज रूपमा उपलब्ध हुनसक्ने सम्भावना देखिएको प्रशासनले जनाएको छ । यद्यपि, परीक्षा छुट्नै लागेका विद्यार्थी, बिरामी र सर्वसाधारणलाई प्राथमिकताका आधारमा टिकट बिक्री–वितरण गरिरहेको प्रशासनले जनाएको छ ।