काठमाडौं । कोरोना महामारीका कारण जारी लामो समयको लकडाउनमा धेरै बेरोजगार बने । तर, सीता न्यौपानेका लागि भने लकडाउन अवसर पनि बन्यो ।

लामो लकडाउन अरूलाई जस्तै सीताको लागि पनि ‘डिप्रेसिङ’ समय थियो । तर, सोही समयमा उनले नयाँ यात्रा सुरु गरिन् । “पहिलो लकडाउनमा मैले आफूलाई चिन्ने मौका पाएँ । एकदम डिप्रेसिङ मोमेन्ट थियो । लाइफमा केही पनि भइरहेको थिएन । यही समयमा अब लाइफलाई कसरी अगाडि लैजाने भन्ने सोच्ने क्रममा आफ्नो सानैदेखिको खुबीलाई बुझेँ, आफ्नो क्षमतालाई चिने र अघि बढेँ,” उनले आफ्नो स्ट्यान्ड अप कमेडियनको यात्राको सुरुवात सुनाइन् ।

सीता सानैदेखि हँस्सीमजाक गर्ने, साथीहरूमाझ हरेक कुरालाई ह्युमरस शैलीमा प्रस्तुत गर्ने गर्थिन् । उनले साथीहरूबीच ‘इन्टटेनर’को छवि बनाएकी थिइन् ।

स्कुल, कलेजमा साथीहरूलाई हँसाउने सीता नेप–ग्याजमसँग आबद्ध भएदेखि लाखौँ दर्शकलाई हँसाउने भइसकेकी छन् । दुई वर्षदेखि नेप–ग्याजमको युट्युब च्यानललाई फलो गरिरहेकी सीताले यसअघि भारतीय स्ट्यान्ड अप कमेडीहरू पनि हेर्थिन् ।

अहिले सीता ‘प्यासन’लाई ‘प्रोफेसन’ बनाउन मिहिनेत गर्दै छिन् ।

छोटो समयमै चर्चा
स्ट्यान्ड अप कमेडियनको रूपमा सीताले हँसाउन थालेको सात महिना मात्रै भएको छ । तर, उनको चर्चा भने पहिलो पर्फोमेन्सबाटै भइसकेको थियो । सात महिनाअघि नेप–ग्याजमको युट्युब च्यानलमा ‘के हेरेको बे ?’ शीर्षकमा जब उनको पहिलो भिडियो अपलोड भयो, उनलाई ‘राष्ट्रिय दिदी’ समेत भनियो ।

‘पन्चलाइन’का कारण उनी पहिलो प्रस्तुतिबाटै चर्चामा आएकी हुन्, त्यो कुरा उनी आफैँ पनि स्वीकार्छिन् । उनको उक्त भिडियो अहिलेसम्म सात लाख ७६ हजारले हेरिसकेका छन् ।

अडिसन पास हुन व्रत
स्ट्यान्ड अप कमेडियन बन्ने सपना पूरा गर्न नेप–ग्याजममा अडिसनका लागि जान लागेकी थिइन् । व्रत बसिन् । किनभने, सीतालाई अडिसन जसरी पनि पास हुनु थियो ।

“व्रत बसेर भनौँ कि को–इन्सिडेन्ट भनौँ कि मिहिनेत भनौँ, अडिसन पास भएँ र आज यहाँसम्म आइपुगेको छु,” उनले भनिन् । प्यासन, मिहिनेत र रुचिले छोटो समयमा धेरै दर्शकको माया पाएको उनको बुझाइ छ ।

हक्की स्वभाव 
स्ट्यान्ड अप कमेडियन सीतालाई धेरैले दिने प्रतिक्रिया भनेको ‘बोल्डनेस’ अर्थात् ‘हक्की स्वभाव’ हो । दर्शकको प्रतिक्रिया उनी स्वीकार पनि गर्छिन् ।

उनी आफ्नो प्रस्तुति तयार बनाउँदा समसामयिक विषय, आफ्नै भोगाइ, युवती–महिलाहरूको भोगाइलाई समेट्ने गर्छिन् । पछिल्लो समय उनले राजनीतिक विषयमा पनि प्रस्तुति दिन थालेकी छन् ।

“पढे–लेखेको देशको युवा पिँढीको रूपमा राजनीतिको प्रभाव आफूमा अनि समग्र युवायुवतीमाझ कस्तो छ भनेर देखाउन पनि मैले यो विषयलाई छोएको हुँ” सीताले बताइन् ।

सीतालाई व्यक्तिगत रूपमा मनपरेको आफ्नो प्रस्तुति ‘जय नारी’ हो । त्यसमा ‘बिग्रेको छोराहरू सुधार्ने सुधार केन्द्र हौँ र हामी ?” भन्ने उनको लाइन अत्यधिक रुचाइरहेको छ । महिला, मध्यमवर्गीय परिवारको अभाव, राजनीतिक व्यंग्यलाई ह्युमरस शैलीमा दर्शकसामु प्रस्तुत गर्न सक्नु उनको खुबी हो ।

एमएसी माइक्रो बायोलोजीकी विद्यार्थी उनी पढाइ र कमेडी दुवैलाई सँगसँगै ‘ब्यालेन्स’मा लैजाने योजनामा छिन् ।

डर
सीतालाई जानीनजानी कसैलाई मन नपर्ने कुरा केही भन्छु कि, मानवताको सिद्धान्त बिर्सन्छु कि, जात, रङ, धर्ममा झुक्किएर केही बोलिएला र कसैको चित्त दुखाउँछु कि भन्ने कुराले भने एकदमै डर लाग्छ । त्यसैले उनी आफ्नो कन्टेन्टमा विशेष ध्यान दिन्छिन् ।

एक जिम्मेवारी युवा पिँढीको रूपमा समाजमा र देशमा भइरहेको गलत कुरालाई सकेसम्म परिवर्तन गरौँ भनेर उनी आफ्नो तर्फबाट सक्दो प्रयास गरिरहेकी छन् । “सम्बन्धित ठाउँसम्म पुग्नु नपुग्नु अर्को पाटो हो,” सीता भन्छिन्, “तर, पहिलो पाटो भनेको मैले आफूले सक्दो कोसिस त गरेको छु नि भन्ने कुराले आत्मसन्तुष्टि मिल्छ ।”

नेप–ग्याजम 
लेखमणि त्रिताल, एकजना कमेडियनबाट सुरु भएको नेप–ग्याजममा अहिले ६ जना स्ट्यान्ड अप कमेडियनहरू छन् । सुरुमा भिडियो रेकर्ड गरेर युट्युबमा अपलोड गर्ने सोचले मात्रै सुरु गरिएको थियो । तर, अहिले यसको उचाइ निकै चुलिएको छ ।

“यो लेभलसम्म पुग्छौँ होला भनेर हामीले सोचेकै थिएनौँ । एकजनाबाट सुरु गरेका थियौँ । हामीले कहिले पनि नयाँ कमेडियन चाहियो भनेर भनेका थिएनौँ । तर, उहाँहरू आफैँ नै आउने इच्छा राख्दै हामीसम्म आउनुभयो । त्यसपछि हामीले अडिसन गर्न थालेका हौँ,” नेप–ग्याजमका निर्देशकमध्ये एक शरद श्रेष्ठले भने ।

नेप–ग्याजमको कोर टिममा अहिले शरदसँगै आशिष शाही, लेखमणि त्रिताल, ज्ञानेन्द्रराज मिश्र, रुपेश श्रेष्ठ र सन्तोष देवकोटा गरी ६ जना सदस्य छन् ।

सन् २०१७ को फेब्रुअरीदेखि सुरु भएको यसले चार वर्षको अन्तरालमा नै नेपालमा स्ट्यान्ड अप कमेडी विधालाई नै स्थापित गर्न सफल बनिसकेको छ ।