काठमाडौं । आइतबारदेखिको वर्षाका कारण देशका विभिन्न ठाउँमा गएको बाढीपहिरोमा परी १०० जनाभन्दा धेरैले ज्यान गुमाइसकेका छन् । बाढीपहिरो र डुबानले भित्र्याउन ठिक्क पारेको किसानको अन्नबाली बगाएको छ । 

सहरमा पढ्ने विद्यार्थी सडक अवरुद्ध हुँदा गाउँमै रोकिएका छन् । कोरोना महामारीका कारण लामो समय विद्यालय गएर पढ्न नपाएका विद्यार्थीलाई बेमौसमी वर्षाका कारण गाउँमै रोकिएका छन् । बिहीबारदेखि काठमाडौं उपत्यका लगायतका सहरहरूमा विद्यालयहरू भौतिकरूपमा सञ्चालनमा आइसकेका छन् । तर, गाउँ गएका विद्यार्थी आइपुगेका छैनन् ।

नेपाल प्रहरीका अनुसार अविरल वर्षाका कारण नेपालका १९ भन्दा बढी जिल्लामा बाढीपहिरोले ठूलो क्षति पुर्याएको छ । अधिकांश जिल्लामा ठूलो मानवीय तथा भौतिक क्षति भएको छ ।

चार दिनसम्मको अविरल वर्षाका कारण देशभरका धेरै सडक अवरुद्ध भए । सडक विभागका अनुसार आइतबारदेखिको अविरल वर्षासँगै आएको बाढीपहिरोका कारण प्रदेश नम्बर १ सुदूरपश्चिम प्रदेशका पहाडी भेगका दर्जनौँ सडक अवरुद्ध भएका छन् । 

सडक डिभिजन कार्यालयका प्रमुख कुवेर नेपाली अवरुद्ध भएका सडक पुनः सञ्चालनमा ल्याउन कम्तीमा तीन दिनदेखि हप्तादिनसम्म लाग्नसक्ने बताउँछन् । ‘‘देशभरका धेरै सडकहरू अवरुद्ध भएका छन् । यी सडक मर्मतसम्भार गरी तीन दिनदेखि हप्तादिनसम्ममा पुनः खुलाउन सकिएला,” उनले भने ।

उनका अनुसार अछाम–मार्तडी, धरान–धनकुटा, स्याउले–डोटी, बझाङ–खोड्पे लगायतका सडकखण्डहरू अवरुद्ध भएका छन् । यता गण्डकी प्रदेशको बेँसीसहर–मनाङ सडकखण्ड पनि अवरुद्ध छ । मध्यपहाडी राजमार्ग सिन्धुली–ओखलढुंगा सडकखण्ड अवरुद्ध हुँदा पूर्वमा इलाम–पाँचथर सडकखण्ड पनि अवरुद्ध रहेको उनले बताए 

सबैभन्दा बढी क्षति सुदूरपश्चिम प्रदेशले बेहोर्नु परेको उनले बताए । 

नेपालीका अनुसार बिहीबार मौसममा सुधार आएसँगै सडक मर्मतको काम अघि बढिसेकेको छ । ‘‘सामान्यरूपमा सडक भाँसिएको वा पहिरो मात्रै खसेर पन्छाउनु पर्ने ठाउँका सडक एकदुई दिनमै खुलाउन सकिन्छ । यो बेमौसमी वर्षाले क्षति पुर्याएका सडकमा अधिकांश माथिबाट पहिरो खसेको देखिएको छ । धेरै ठूलो क्षति भएको छैन । छिट्टै सडक खुल्छ । हामी त्यसमै लागि परेका छौँ,” नेपालीले भने ।

कर्णाली नदीको एक ठाउँमा नदीले धार परिवर्तन गरेर अर्को ठाउँमा बग्दा हुलाकी राजमार्ग राजापुर र टीकापुर जोड्ने सडकखण्डमा धेरै क्षति पुगेको छ । यस्तो अवस्थामा अवरुद्ध भएका सडक मर्मत सम्भार गर्न महिना दिनसम्म लाग्नसक्ने विभाग प्रमुख नेपालीको भनाइ छ । 

नेपाल प्रहरी प्रधान कार्यालयले अहिले देशभरका विभिन्न सडकखण्डहरू मर्मत गरिरहेको जनाएको छ । प्रहरी प्रवक्ता वसन्त कुँवरले केही मर्मतको क्रममा रहेका र केही सडकखण्ड मर्मत हुन बाँकी रहेको जानकारी दिए । ‘‘बिहीबारदेखि मौसम सफा हुँदैछ । केही सडक मर्मत भइरहेका छन् । केही सडक मर्मत गर्न बाँकी छन् । पूर्वमा इलाम–पाँचथर सडकखण्डमा मर्मत गर्न समय लाग्छ । अरू सडक खण्डहरू दुईदेखि पाँच दिनसम्ममा मर्मत भइसक्छन्,” उनले भने ।