काठमाडौं । ‘फूलबुट्टे सारी सपक्कै पारी पछ्यौरी मलमलको...’ फिमेल भर्जन, चाइल्ड भर्जन र लिजेन्डरी भर्जन आएसँगै युट्युब, टिकटकदेखि सामाजिक सञ्जालमा 'भाइरल' भयो ।

हालै यो गीतले फेरि नयाँ हाइप बनाएको छ । युगान्डाकी द क्याप्टेन बियोन्से फाम्सीले यो गीत गाएसँगै  पुनः चर्चामा आएको हो । यो गीतमा उनी आफैँ फिर्चड छिन् । 

लिजेन्डरी भर्जन गाएका मदनकृष्ण श्रेष्ठले उनको तारिफ गर्दै उनीसँग भेट्ने ईच्छा व्यक्त गरेका छन् । बियोन्से यो गीत रेकर्ड गराउनुको कारण पनि मदनकृण्ण नै भएको बताउँछिन् । “मलाई उहाँ (मदनकृष्ण श्रेष्ठ)ले गाउनुभएको तरिका, उहाँको आवाज निकै मन पर्‍यो । मैले यो गीत गाउनुको मुख्य कारण भनेको उहाँ नै हो,” उनी भन्छिन् ।

नेपालका क्लब, रेस्टुरेन्ट जाँदा, बाटोमा हिँड्दा उनले यो गीत सुनेकी थिइन् । धेरै ठाउँमा सुनेपछि एक दिन युट्युबमा यो गीत सर्च गरिन् र यसका विभिन्न भर्जन सुनिन् । तर, उनलाई मदनकृष्णको स्वरले बढी प्रभावित गर्‍यो र यो गीत गाउने निधो गरिन् ।

त्यसपछि गीत गाउन स्टुडियोतिर धाउन थालिन् । उनी डिका स्टुडियो पुगिन् । “मैले उनीहरुसँग यो गीतसँग सम्बन्धित व्यक्तिमध्ये कुनै एकजनाको नम्बर दिनु भनेर भनेँ,” उनले भनिन्, “त्यसपछि उनीहरुले मलाई मार्मिक लामाको नम्बर दिए ।” यो गीतको मेल भर्जन मार्मिकले नै गाएका हुन् । त्यसपछि मार्मिकलाई फोन गरेर आफूलाई यो गीत निकै मन परेको र गाउने ईच्छा व्यक्त गरिन् । अनुमति पनि पाइन् । बियोन्सेका अनुसार उनलाई गीतको अडियो र स्क्रिप्ट मार्मिकले नै दिएका हुन् ।

नेपाली भाषा बुझ्नुहुन्छ ? भन्ने प्रश्नमा उनले भनिन्, “म तपाईंहरुको भाषामा लेखेका कुराहरु पढ्न सक्दिनँ । तर, त्यही कुरा अंग्रेजी शब्दमा (रोमनाइज्ड) लेखेर दिनुभयो भनेचाहिँ पढ्न सक्छु ।” मार्मिकले गीतको स्क्रिप्ट रोमनाइज्ड गरेर नै दिएका थिए ।

चार दिन लगातार अभ्यास

यो गीत गाउन आफूले लगातार चार दिन अभ्यास गरेको उनी बताउँछिन् । “मैले ननस्टप चार दिन यो गीत गाउने अभ्यास गरेँ । खान बस्दा होस् वा कतै जाँदै गर्दा होस्, म मेरो मोबाइलमा यही गीत मात्रै बजाउथेँ,” उनले सुनाइन् ।

उनले थपिन्, “म पहिले नै यो गीतको मायामा परिसकेको थिएँ । र, जब गीतका सर्जकले (ओनर)ले मलाई गीत गाउन अनुमति दिनुभयो, गीतप्रति मेरो माया र गाउने चाह झनै बढ्यो ।”

उनको गीत र भिडियोको चर्चा चुलिएपछि अहिले उनी निकै खुसी छिन् । “म कति खुसी छु भनेर तपाईंले मेरो गीतमा एक्सप्रेसन हेरेर पनि अनुमान लगाउन सक्नुहुनेछ । अहिले मलाई हरेकले चिन्छन् । बाटोमा वा कतै जाँदा सबैले मतिर हेरेर फूलबुट्टे सारी... भन्दै देखाउँछन् ।”

संयोग...

पछिल्लो एक वर्षदेखि नेपालमा रहेकी बियोन्सेको नेपाल बसाइँ एउटा संयोग मात्रै हो । उनी जापान जानेक्रममा नेपाल आएकी थिइन् । तर, बीचमै लकडाउन भयो । उनी यतै अड्किइन् । लकडाउन खुलेपछि आफ्नो देश फर्कन खोज्दै थिइन्, उनको भेट राजेन्द्र खड्गीसँग भयो । उनले राजेन्द्रको नेपाल भाषाको चलचित्र ‘चिकन्चा यु धेबा ने ठाकु’मा पनि काम गरेकी छिन्, त्यो रिलिज हुन बाँकी छ ।

“मेरो मनसाय यहाँ बस्ने थिएन । तर, म यहाँ अड्किएँ,” उनले बताइन् । यसबीचमा उनले केही नेपाली सर्ट चलचित्र (पाहुना, भाइरस)मा पनि अभिनय गरिन् । “राजेन्द्रसँग भेट्नुअघि मैले चारवटा नेपाली सर्ट चलचित्रहरुमा काम गरिसकेकी थिएँ,” उनले भनिन् । उनले राजेन्द्र खड्गीको सोही चलचित्रमा गीत पनि गाएकी छिन् ।

०००

उनले गाएको फूलबुट्टे सारी... ले लाखौँ भ्युज पाएको छ । तर, यसबाट आम्दानी नभई खर्च मात्रै भएको उनी बताउँछिन् । “मैले यो गीतको लागि ६० हजार खर्च गरेँ । तर, एकैचोटि होइन । पहिलोपटक मैले स्टुडियोलाई भिडियोका लागि भनेर २० हजार दिएँ । पछि रेकर्डिङको लागि भनेर २५ हजार दिएँ,” उनी भन्छिन्, “त्यसपछि छायांकनको लागि जाँदाको यातायात र खानेकुराको गरेर ६० हजार मेरो खर्च भयो ।”

०००

युगान्डाको कम्पाला सहरकी बियोन्से पेसाले सिभिल इन्जिनियर हुन् । सांगीतिक क्षेत्रमा पनि सक्रियता बढाउँदै छिन् । उनले यसअघि युगान्डामा आफ्नो भाषामा केही गीतहरु गाइसकेकी छिन् । संगीतमा उनको विशेष रुचि छ । उनी भन्छिन्, “संगीतको कुनै भाषा हुँदैन । यसले मान्छेमा माया जगाउँछ । त्यसैले नै होला, मैले आज यो नेपाली गीत गाएँ ।”

उनका देशका साथीले भाषा नबुझे पनि गीत सुन्दा एकदमै राम्रो लागेको र मन परेको प्रतिक्रिया दिएको उनको भनाइ छ । उनको एकजना भाइ याकुब नेपालमै फुटबल खेल्छन् । उनी संकटा क्लबबाट पछिल्लो दुई वर्षदेखि फुटबल खेलिरहेका छन् ।

बियोन्से आफ्नो देश फर्कने तयारीमा छिन् । “नेपालको बसाइँ निकै रमाइलो लाग्यो । यहाँको मानिसले देखाएको मायाप्रति म निकै कृतज्ञ छु । तर, अब चाँडै नै आफ्नो देश फर्कँदै छु,” उनी अगाडि थप्छिन्, “म मेरो परिवारलाई धेरै याद गरिरहेको छु । त्यसलै म छिट्टै नै फर्कँदै छु ।” समय–समयमा नेपाल आउने पनि उनले बताइन् ।

तस्बिर : हरिशजंग क्षेत्री/बाह्रखरी