काठमाडौं । दोस्रो चरणमा निर्वाचन भएको ३ सय ३४ तहमध्ये तीन तहको परिणाम आउन बाँकी छ । हालसम्म एमालेले १ सय ४८ तहमा विजय हासिल गरेको छ । मतगणना भइरहेका तीनै तहमा एमाले अगाडि रहेको छ । 

तर, यो परिणामलाई भने एमालेले अपेक्षाकृत मानिरहेको छैन । एमाले सचिव प्रदीप ज्ञवालीले दोश्रो चरणको निर्वाचनमा एमालेले सन्तोषजनक परिणाम ल्याए पनि अपेक्षाकृत भने नभएको जिकिर गर्छन् । “हामीले बहुमत स्थान (५५ प्रतिशत) जित्ने आँकलन गरेका थियौँ,” उनले भने, “हामीले ४६ प्रतिशत बढी जितेर पहिलो भएका छौँ । परिणामबाट सन्तोष गर्ने ठाउँ त छ तर अपेक्षाकृत होइन ।”

एमालेका अडानहरू जनअनुमोदित

पहिलो र दोस्रो चरणको निर्वाचनको परिणामले एमाले उठाएका विषयहरू जनअनुमोदित भएको एमालेको बुझाइ छ । विशेष गरेर एमाले मधेस विरोधी, थारू, जनजाति विरोधी भन्ने आरोपको खण्डन गरेको र राष्ट्रियता, संविधान संशोधनका विषयमा एमालेले राख्दै आएको अडान पुनः पुष्टि भएको ज्ञवाली बताउँछन् । पहाड–मधेसबीच एकता कायम गर्ने विषयमा पनि पार्टीको बाटो सही भएको एमालेको विश्लेषण छ ।
“मधेसी बहुल भएको ठाउँमा पनि एमालेले जितेको छ । थारु, जनजाति बहुल भएको ठाउँमा पनि हामीले जितेका छौँ, यसले एमालेको बाटो सही भएको जनमतद्वारा पुष्टि भएको छ,” उनले भने ।

५४ सालको प्रभाव

२० वर्षपछि एमाले मुलुकको पहिलो शक्तिको रूपमा स्थापित भयो । ०५४ सालको स्थानीय निकाय निर्वाचन पछाडि एमाले पहिलो शक्ति बनेको थिएन । त्यसो त स्थानीय स्तरमा ०५४ पछि निर्वाचन पनि भएन । त्यही ०५४ सालमा एमाले सुरु गरेको विकास निर्माणको प्रभाव यो निर्वाचनमा परेको ज्ञवालीको बुझाइ छ । “एमालेले त्यसबखत सुरू गरेका लोककल्याणकारी कामको प्रभाव पनि यो निर्वाचनमा परेको हो, स्थानीय तहमा एमाले नेतृत्वमा आए विकासको लहर आउनेमा मतदाता आशावादी थिए,” ज्ञवालीको ठम्याइ छ ।
त्यसबाहेक एमालेले उमेदवार चयनमा पनि बुद्धिमता पु¥याएको उनले दाबी गरे  । “हामीले स्थानीय स्तरमा भिजेका, विकास निर्माणमा अगुवाइ गरेका र लोकप्रिय उमेदवारलाई उठाएका थियौँ,” उनले प्रष्ट पारे ।

कांग्रेसको एक्लो पौरख होइन

सचिव ज्ञवालीले कांग्रेसलाई जनताले चुनावमा दण्डित गरेको प्रतिक्रिया दिएका छन् । उनले कांग्रेसले अहिले ल्याएको मत परिणाम उसको एक्लो पौरख नभएर माओवादी केन्द्रको बुइ चढेर ल्याएको आरोप लगाए । एक्लै लडेको भए कांग्रेसले दुःखद् परिस्थितिको सामना गर्नुपर्ने उनको निष्कर्ष छ ।
“इतिहासमा कसैसँग तालमेल नगरेको पार्टीले यसपटक तालमेल गर्न कसैलाई बाँकी नराख्नु पतनको बाटोमा छ भन्ने पुष्टि हुन्छ,” उनले ठोकुवा गरे ।
संविधान कार्यान्वयनका लागि वृहत्तर सहमतिको वातावरण सिर्जना गर्नुपर्नेमा १६ बुँदे सहमति लत्याउनतिर लागेपछि जनताले कांग्रेसलाई दण्डित गरेको विचार उनले व्यक्त गरे ।
त्यस्तै संविधान कार्यान्यवन गर्न छाडेर संशोधनको प्रस्ताव पेश, लोकमानसिंह प्रकरणमा ढुलमुले चरित्र, प्रधानन्यायाधीशविरुद्ध महाभियोग प्रस्ताव, आइजी प्रकरणका कारण पनि कांग्रेस खुम्चन पुगेको ज्ञवालीको आँकलन छ ।
त्यस्तै एमालेलाई कमजोर बनाउन अर्काको चुनाव चिह्नमा कांग्रेस पार्टीले कार्यकर्तालाई चुनाव लड्न बाध्य बनाएको भन्दै जनताले सबक सिकाएको टिप्पणी समेत उनले गरे ।