काठमाडौं । स्थानीय तहको चुनाव अघि एक नम्बर प्रदेशमा एमालेले दुई तिहाइ जित्ने आँकलन गरेको थियो । ८८ गाउँपालिका, ४६ नगरपालिका, २ उपमहानगरपालिका र १ महानगरपालिका रहेको एक नम्बर प्रदेशमा कुल १ सय ३७ तह छन् । यसमा एमालेले झन्डै सय तह विजयी हुने लक्ष्य राखेको थियो ।

तर, हालसम्म ६७ तहमा विजयी भयो भने दुई तहमा अग्रता कायम राखेको छ । त्यस्तै नेपाली कांग्रेस ४८ तहमा विजयी भएको छ भने तीन तहमा अगाडि छ । माओवादी केन्द्र ९, राप्रपा ३, संघीय समाजवादी फोरम ३ र नेपाल लोकतान्त्रिक फोरम २ तहमा विजयी भएका छन् ।

झापाको शनिअर्जुन नगरपालिकामा एमालेले अग्रता लिएको छ । मेचीनगरमा कांग्रेस अगाडि छ भने सुनसरीको धरान पनि छिनोफानो हुन बाँकी छ । त्यहाँ एमालेले अग्रता लिएको छ । १ नम्बर प्रदेशको एकमात्र महानगरपालिका विराटनगरमा पनि चुनावको अन्तिम परिणाम आउन बाँकी छ । त्यहाँ कांग्रेस अगाडि रहेको छ । यता मोरङको धनपाल गाउँपालिकाको पनि परिणाम आइसेकेको छैन, त्यहाँ कांग्रेस नै अगाडि छ ।

झापामा खुम्चियो एमाले
१५ तह रहेको झापा एमालेको पकड मानिन्छ । त्यसो त एमाले अध्यक्ष केपी ओलीको गृह जिल्लासमेत हो त्यो तर, झापामै एमालेले अपेक्षाकृत परिणाम ल्याउन सकेन । शतप्रतिशत जितको आँकलन गरेको एमाले प्रमुख र उपाध्यक्ष गरी ६ तहमा विजयी भएको छ भने एक तहमा अग्रता लिएको छ । उपमेयरमा भने एमालेले बाजी मार्‍यो, उपप्रमुख र उपाध्यक्ष गरी १० तहमा जित्यो । कांग्रेसले ४ तह जितेको छ र एकमा अग्रता लिएको छ भने राष्ट्रिय प्रजातन्त्र पार्टीले ३ तहमा जित हासिल गरेको छ । झापामा माओवादी केन्द्रले शून्य तहमा चित्त बुझाउनुपर्‍यो भने संघीय समाजवादी फोरम र नेपाल लोकतान्त्रिक फोरमले पनि खातै उघारेनन् ।

सुनसरीमा त झनै कमजोर
भीम आचार्य सुनसरीबाट प्रतिनिधित्व गर्ने एमालेको ठूला नेता र प्रदेश नम्बर एकका संयोजक समेत हुन् । एमालेका सचिव पनि हुन् उनी । प्रदेश नम्बर १ का दुई उपमहानगरमध्ये इटहरी उपमहानगरपालिकामा एमालेले जित हासिल गरिसकेको  छ भने धरानमा जित नजिक छ । जिल्लाभरीको तथ्यांकलाई केलाउने हो भने एमाले सुनसरीमा कमजोरै देखियो । १२ तह रहेको सुनसरीमा एमालेले जम्मा २ तहमा जित हासिल गरेको छ र एक तहमा अग्रता लिएको छ ।

जहाँ कांग्रेसले ६ तह जितेको छ । नेपाल लोकतान्त्रिक फोरमले २ तह र संघीय समाजवादी फोरमले १ तह जित्दा माओवादी केन्द्र यहाँ पनि ‘निल’ भयो ।

मोरङ पनि उछिन्न सकेन !
१७ तह रहेको मोरङमा एमालेले हालसम्म ५ तहमात्रै जितेको छ भने कांग्रेस ७ तह जित र २ तहमा अग्रता लिएर पहिलो दल बनेको छ । माओवादी केन्द्रले एक तह जितेको छ भने संघीय समाजवादी फोरम र नेपाल लोकतान्त्रिक फोरमले १÷१ तहमा जित हात पारेका छन् ।

किन पछि पर्‍यो एमाले ?
उमेदवार समयमै टुंग्याउन नसक्नु, आन्तरिक विवाद, प्रतिष्पर्धी पार्टीको गठबन्धन पार्टी कमजोर बन्नुको कारक एमालेले औँल्याएको छ । एमाले सचिव एवम् एक नम्बर प्रदेशका संयोजकसमेत रहेका भीम आचार्य भन्छन्, “जनमतको हिसाबले एक नम्बर प्रदेशमा एमाले कमजोर त छैन तर, तहको हिसाबले एमाले पछि पर्‍ यो ।

किन त ? यसमा आचार्यले दुईवटा फ्याक्टर देखेका छन् । उनका अनुसार उमेदवार चयनमा पनि एमालेले बुद्धिमता पुर्‍याउन सकेन । त्यस्तै एमालेबिरुद्ध सबै दलको मोर्चाबन्दीले पनि राम्रै काम गर्‍यो ।

“एमालेलेलाई भएजति सबै शक्ति मिलेर एक्ल्याउने काम भयो । एमालेबाहेक सबै शक्ति एकातिर भए,” उनले भने ।

दुई तिहाइ तहमा जित्ने लक्ष्यकासाथ निर्वाचनमा होमिए पनि सोचेजति परिणाम नआउनु सोचनीय विषय भएको उनको ठम्याइ छ । मोरङ, सुनसरीमा पहिल्यैदेखि कमजोर भए पनि झापा एमालेको आधार क्षेत्र मानिन्थ्यो । एमाले त्यहीँ कमजोर देखिनु समीक्षाका विषय भएको उनको भनाइ छ । “तीन जिल्लाको मात्रै होइन समग्र प्रदेश नम्बर १ का १३ जिल्लाकै निर्वाचन परिणामका विषयमा हामी छलफल गर्छौं,” उनले भने ।