काठमाडौं । काठमाडौं महानगरपालिकाले गत शुक्रबार साँझ कमलपोखरीमा दुईवटा डोजर चलाएर त्यहाँ रहेका प्रहरी बिट, राधेराधे सत्सर्ग मन्दिर भत्कायो । कमलपोखरी क्षेत्रमा रहेको संरचना हटाउनुअघि छलफल नगरेको भन्दै त्यस क्षेत्रका बासिन्दाले विरोध जनाएका छन् ।

कमलपोखरी स्पोर्टस् क्लबका अध्यक्ष भीमसेन मैनालीका अनुसार मन्दिर भत्किँदा पाँच करोडबराबरको क्षति भएको छ । उनले भने, ‘‘बिनाजानकारी मन्दिर भत्काइयो । मूर्ति निकाल्न दिइएन ।” मन्दिर भत्काउन आउँदा महानगरका नगर प्रहरी प्रमुख धनपति सापकोटालाई स्थानीयले सोध्दा माथिको आदेशअनुसार आएको बताएका थिए । स्थानीयले उनलाई भत्काउन लेखिएको लिखितपत्र मागेका थिए । त्यसबेला उनले भनेका थिए, ‘‘मेयर विद्यासुन्दर शाक्यले मौखिक रुपमा भत्काउने आदेश दिएपछि हामी आएका हौं । लिखितपत्र छैन्, मौखिक रुपमै आएका हौं ।” 

स्थानीय अरुणसिंह केसीले राधा-माधव समिति र स्पोर्टस् क्लबलाई जानकारी नदिइ मन्दिर भत्काइँदा विरोधमा उत्रेको जानकारी दिए । उनले भने, ‘‘राज्यका बर्दिधारी प्रहरीले विनासूचना स्थानीयको धार्मिक सांस्कृतिक रुपमा रहेको मन्दिर भत्काउनु यो गैरकानुनी हो । मन्दिरमा रहेका मूर्तिलगायत बहुमुल्य सामान हराएका छन् ।”

स्थानीय सुशन वैद्य पनि महानगरपालिकाले छापामार शैलीमा मन्दिर भत्काएको आरोप लगाए । यस्तै स्थानीय प्रमिला उपाध्यायले महानगरपालिकाले चौबीस घण्टाको समय दिएको भए सामान ओसार्न सकिने बताइन् । उनी भन्छिन्, ‘‘पोखरीका विषयमा महानगरपालिकासँग असहमति थियो । यसकै रिस देखाएका हुन् मेयरले । पोखरीको पानी नसुकाउन अनुरोध गर्दागर्दै माथिको आदेश भन्दै पानी सुकाइयो ।"

यस्तै माधव प्रचार समितिका कार्यवाहक अध्यक्ष कमल मिश्र कमलपोखरीलाई स्पोर्टस क्लब र मन्दिरले नहेरेको भए अहिलेसम्म भूमाफियाको कब्जामा परिसक्ने बताउँछन् । विनासूचना धार्मिक तथा सांस्कृतिक सम्पदामा गरिएको आक्रमणमा संलग्नमाथि कारबाही हुनुपर्ने स्थानीयको माग छ ।

स्थानीय बासिन्दाले महानगरपालिकाका मेयर विद्यासुन्दर शाक्यलाई विरोधपत्र बुझाउँदा मिलेर अगाडि बढ्ने बताएका छन् । अरु केही भनेका छैनन् । तर स्थानीय बासिन्दा भने विरोधमै छन् ।

काठमाडौं महानगरपालिकाका प्रवक्ता ईश्वरमान डंगोल भने पोखरीभित्र रहेका संरचनाले सौन्दर्य घटाएको बताउँछन् । उनी भन्छन्, ‘‘वरिपरिका संरचना भत्काउन एक वर्षअगाडि नै सहमति भएको थियो । पोखरीलाई पुरानै अवस्थामा लैजानुपर्नेछ । एक वर्षअगाडि भएको निर्णयअनुसारै काम अघि बढिरहेको छ । त्यतिबेलै भएको गुरुयोजनाअनुसार काम हुँदै गएकाले विरोधको औचित्य छैन ।”

संरक्षणकर्मीहरु भने महानगरपालिकाको गुरुयोजना नै गलत रहेको बताउँछन् । पोखरी संरक्षणकर्मी आलोकसिद्धि तुलाधर कंक्रिट प्रयोग गरिएको पोखरीमा पुरानो मौलिकता नष्ट हुने बताउँछन् । उनी भन्छन्, ‘‘जैविक तथा पर्यावरणीय सन्दर्भलाई ध्यान दिइएको छैन । काठमाडौंभरी मानिसलाई खुला क्षेत्र देखाउने ठाउँ छैन । कमलपोखरीलाई पनि यसरी नै कंक्रिटमय बनाइँदै छ । अहिले निर्माणका लागि ढुंगा, माटो, इँटा, फलामका रड असरल्ल छरिएका छन् ।”

काठमाडौं महानगरपालिकाका प्रमुख प्रशासकीय अधिकृत राजेश्वर ज्ञवालीले कमलपोखरीको संरक्षण गर्न गुरुयोजना बनाएर निर्माण कार्य भइरहेको बताए । उनले भने, ‘‘कमलपोखरीको जग्गामा अनधिकृत रूपमा बनाइएको स्पोर्ट्स क्लब र राधेराधेको भवन भत्काएका छौं, त्यसको विरोध गर्न उचित छैन । उक्त भवनहरू स्वीकृति नलिई बनाइएका हुन् । कमलपोखरीको जग्गामा बसिरहेका नेपाल प्रहरी र ट्राफिक प्रहरीले महानगरको अनुरोधमा छाडेका छन् । स्पोर्ट्स क्लब र राधेराधेको भवन अनधिकृत रूपमा निर्माण भएको सूचना तथा प्रतिवेदन महानगरपालिकाले प्राप्त गरेपछि भवन हटाइएको हो ।”