काठमाडौं । पाकिस्तानको केटु हिमालको सफल आरोहण गरी स्वदेश फर्किएका १० जना नेपाली आरोहीलाई भव्य स्वागत गरिएको छ ।

निर्मल पुर्जासहितको टोलीलाई मंगलबार बिहान त्रिभुवन अन्तर्राष्ट्रिय विमानस्थलमा स्वागत गरिएको हो । त्यसपछि टोलीलाई तीनकुने, नयाँबानेश्वर, माइतीघर, भद्रकाली, सुन्धारालगायतका स्थान परिक्रमा गराइयो । भृकुटीमण्डपस्थित नेपाल पर्यटन बोर्डमा कार्यक्रम आयोजना गरिएको छ । त्यहाँ उनीहरुलाई सम्मान गरिने जनाइएको छ ।

उनीहरुले जाडो मौसममा केटुको पहिलोपटक आरोहण गरेर विश्व कीर्तिमान कायम गरेका हुन् । १० नेपाली आरोही यही माघ ३ गते केटुको शिखरमा पुगेका थिए ।

निर्मल पुर्जाको नेतृत्वमा मिङ्मा डेभिड, मिङ्मा तेन्जी, मिङ्मा ग्याल्जी, गेल्जे शेर्पा, दावा तेम्बा शेर्पा, पेम छिरी शेर्पा, किलु पेम्बा शेर्पा, दावा तेन्जिङ शेर्पा र सोना शेर्पा सहभागी थिए ।

माउन्ट केटु विश्वको दोस्रो अग्लो हिमाल हो । केटु समुद्र सतहबाट आठ हजार ६११ मिटर उचाइमा रहेको छ ।