काठमाडौं । अब्दुल्ला खान १४ वर्षका पुगे । दरबारमार्गबाट कृष्ण पाउरोटीतर्फ जाने बाटोको पेटीमै सानो पसल पनि उनले थापेका छन् । 

उनको  पसलमा बिस्कुट, चकलेट, चुरोट, गुट्खा पाइन्छ । केही दिनअघि सम्म उनी बाटोमा ५/१० रुपैयाँ मागेर आफ्नो दैनिकी चलाउँथे । आफूले मागेर बचाएको तथा आमाबाट पाएको झन्डै १२ हजार रुपैयाँले उनको पसल खुलेको हो । 

"सानोमा घण्टाघरबाहिर मगेर बस्थें । पछि ठमेल, दरबारमार्गलगायत ठाउँमा मागेर हिँड्न थाले," उनले भने, "अहिले पसल हालेर दिनमा ८००-९०० रुपैयाँ कमाउने भएको छु ।"

अलिअलि पैसा कमाउने भए पनि उनलाई पढ्न मन छैन । तर बहिनीलाई पढाउने धोको रहेको अब्दुल्ला बताउँछन् । "अब स्कुल गएर मलाई पढ्न त मन छैन तर दुईवटा भाइ र एउटा बहिनीलाई पढाउने मन भने छ," उनले सुनाए । उनले आफूले सामान्य कखरा जाने पनि भाइबहिनी पढाउन पाए भविष्य सहज हुन्थ्यो कि भन्दै आशा पनि देखाए । 

अब्दुल्लाहले पसलबाट केही रकम जोरजाम गर्न सके गाडी चलाउन सिक्ने र त्यसैबाट केही पैसा कमाउने धोको रहेको पनि सुनाए । हेरौं तिनै परिश्रमी अब्दुल्लाहका थप तस्बिर :