काठमाडौं । दोस्रो चरणमा निर्वाचन भएका ३ सय ३४ तहमध्ये ३ सय १८ स्थानको मतपरिणाम सार्वजनिक भएको छ । जसमध्ये एमालेले १४२ तहमा जितेर पहिलो दल बनेको छ भने कांग्रेसले १ सय १७ तहमा जितेर दोस्रो स्थान कायम गरेको छ । तेस्रो स्थानमा रहेको माओवादी केन्द्रले ३८ स्थानमा मात्र विजय हासिल गरेको छ ।

चौँथो स्थानमा रहेको संघीय समाजवादी फोरमले ७ स्थानमा विजय हासिल गरेको छ भने पाँचौँमा नेपाल लोकतान्त्रिक पार्टी बनेको छ । उसले ६ तहमा जितेको छ । हालसम्म राष्ट्रिय प्रजातन्त्र पार्टीले ४ तहमा जितेको छ भने राष्ट्रिय जनमोर्चा पार्टीले दुई तह जित्दा स्वतन्त्रले तीन तहमा जितेको छ ।

यहाँ जितेनन् ठूला दलले !
दोस्रो चरणमा ३५ जिल्लामा निर्वाचन भयो । जसमा प्रदेश नम्बर १ मा १४, ५ मा १२ र ७ नम्बरका ९ जिल्लामा निर्वाचन भयो । जसमध्ये प्रदेश नम्बर १ का ५ जिल्लामा एमालेले बहुमत हासिल गर्‍यो । तर कांग्रेसले धनकुटा जिल्लाको एउटा तहमा पनि प्रमुख पद जित्न सकेन । सात तह रहेको धनकुटामा व्यवस्थापिका संसद्को ठूलो दल कांग्रेस मात्रै होइन माओवादी केन्द्रसमेत बढारियो । सातमा सातै तह हात लगायो एमालेले ।

प्रदेश नम्बर ५ का १२ जिल्लामध्ये कपिलवस्तु र बाँकेमा माओवादी केन्द्रले प्रमुख पद जित्न सकेन । ८ तह रहेको बाँकेको नेपालगञ्ज उपमहानगर राप्रपाको पोल्टामा प¥यो । त्यस जिल्लामा एमालेले ४ तह जितेर पहिलो भने भने संघीय समाजवादी फोरमले १ तहमा जित हात पार्‍यो ।

माओवादी केन्द्रका नेता गणेशमान पुन विजयी भएको क्षेत्र रुकुममा एमाले कांग्रेस दुवै ‘निल’ भए, एक तह पनि जित्न सकेनन् । 

गुल्मीमा ७ तह, पाल्पामा ६ तह,  रुपन्देहीमा ७ तह, दाङमा ६ तह, बाँकेमा ४ तह जितेर जिल्लागत रूपमा एमाले अग्रस्थानमा देखियो भने रोल्पामा माओवादी केन्द्रले ७ तह जित्दा एमाले २ र कांग्रेस एक तहमा सीमित भए ।

तुलनात्मक रूपमा एमाले बलियो मानिएको ७ नम्बर प्रदेशमा माओवादी केन्द्र कमजोर भएन । इज्जत जोगायो । ३८ तहमा जितेको माओवादी केन्द्रले ५ नम्बर प्रदेशमा मात्रै १९ स्थान जित्यो ।

यता ७ नम्बर प्रदेशको बाजुरा र बझाङमा पनि माओवादी केन्द्र शून्य भयो ।

कांग्रेसलाई सात नम्बर प्रदेशमा बलियो मानिएको थियो । त्यसो त बहालवाला प्रधानमन्त्रीको गृहप्रदेशसमेत हो त्यो । तर, त्यहाँपनि एमालेले कांग्रेसकै हाराहारीमा जित हासिल गर्यो । कांग्रेस एमालेले बराबर ३७ स्थान जितेका छन् भने माओवादी केन्द्र ९ तहमा सीमित भएको छ । कैलालीमा हालसम्म एमालेले ७० प्रतिशत जितेको छ भने बझाङमा ७५ प्रतिशतको हाराहारीमा एमालेले जित्यो । ७ तहमध्ये ४ स्थान जितेर जिल्लाबासीले कांग्रेस सभापति एवम् प्रधानमन्त्री शेरबहादुर देउवाको इज्जत कायम राखिदिए । एमाले उपाध्यक्ष भीम रावलको जिल्लामा एमाले नै पछि पर्ने अवस्था आयो ।

९ तह रहेको अछाममा कांग्रेसले ५ तह जित्यो भने एमाले र माओवादी केन्द्रले दुई÷दुई स्थान जित हात पारे । पहिलो चरणमा निर्वाचन भएका जिल्लामध्ये माओवादी केन्द्र काठमाडौं, भक्तपुर, दोलखा, कास्की, पर्वत, स्याङ्जा, मनाङ, मुस्ताङ, दैलेख र मुगुमा शून्य तहमा चित्त बुझाउनुपर्यो । त्यसैगरी रुकुममा कांग्रेस र एमाले तथा गोरखामा एमालेले कुनै पनि तह जित्न सकेन ।