काठमाडौं । केहीदिन यता काठमाडौंसहित देशका मुख्य सहरमा वायु प्रदूषणको मात्रा बढेको छ । पश्चिमी वायू सक्रिय नहुनु र पानी नपरेका कारण वायु प्रदूषण बढेको वातावरण विभागले जनाएको छ । विभागमा प्रवक्ता ईन्दुविक्रम जोशीका अनुसार एयर क्वालिटी इन्डेक्स (एक्यूआई) आज ३०० भन्दा माथि छ । यो खतराको तहभन्दा माथि हो । 

जोशीले सकेसम्म घरबाहिर ननिस्कन र सवारी साधन पनि कम चलाउन आग्रह गरे । मर्निङ वाक र इभिनिङ वाकमा ननिस्किनु उत्तम हुने उनको भनाइ छ । साधारणतः एक्यूआई ५० रहनु राम्रो मानिन्छ । 

“हिजोको तुलनामा आज केही कम भएको छ । पश्चिमी वायू सक्रिय रुपमा नचलेसम्म र पानी नपरेसम्म सकेसम्म कोही पनि बाहिर ननिस्कएको राम्रो हुन्छ । जेष्ठ नागरिक र बालबालिकालाई झन छिटो असर गर्ने भएकाले सतर्क रहनुपर्छ,” प्रवक्ता जोशीले भने, “हामीले नेपालमा वायुमा प्रदुषणको मात्रा २०१६ बाट नाप्न थालेका हौं । हरेक वर्ष जाडो मौसममा प्रदूषण एकीकृत भएर बस्छ । तर, यो वर्ष हामीले मापन गर्न सुरु गरेयताकै सबैभन्दा धेरै हो ।”

प्रदूषणले काठमाडौं ढाकिएको नाङ्गो आँखाले पनि देख्न सकिन्छ । चन्द्रागीरी, स्वयम्भूलगायत अग्लो ठाउँबाट हेर्दा काठमाडौं प्रदूषणले ढाकेको देखिएको छ ।