काठमाडौं । २० वर्ष अघि करिब ७७ सय मतका साथ नेपालगञ्ज नगरको प्रमुखमा निर्वाचित भएका धवल शमशेर राणा यसपटक पनि सोही नगरको प्रमुख पदमा जित नजिक छन् । ६२ हजार ३ सय ९७ मतदाता रहेको नेपालगञ्जमा ४५ हजार बढी मत खसेको छ । २३ वडा रहेको नेपालगञ्ज उपमहानगरमा १२ वडाको मत गणना सकिँदा राष्ट्रिय प्रजातन्त्र पार्टीका धवलशमशेर राणा ६ हजार ९ सय ८३ मतका साथ अग्रस्थानमा छन् । उनका प्रतिद्वन्द्वी नेपाली कांग्रेसका सुरेशकुमार कानोडिया ४ हजार २ सय ८९ मत ल्याएका छन् । र, उनी  २ हजार ६ सय ९४ मतका साथ पछि छन् ।

निर्वाचन भएका ३ सय ३४ तहमध्ये १ सय ६७ तहको नतिजा सार्वजनिक हुँदा राप्रपाले गाउँपालिका र नगरपालिकामा खातासमेत खोल्न सकेको छैन । पाँच नम्बर प्रदेशको आर्थिक केन्द्र नेपालगञ्जमा भने राप्रपाले राम्रै अग्रता लिइरहेको छ  । तर, नेपालगञ्जमा पार्टी भन्दा पनि व्यक्तिको लोकप्रियताका कारणले परिणाम राप्रपाको पक्षमा देखिएको बताइन्छ ।

हालसम्म कुन वडामा को ?
१२ वडामध्ये राप्रपा, एमाले र माओवादीले समान तीन/तीन वडा जितेका छन् भने कांग्रेसले दुई र संघीय समाजवादी फोरमले एक वडामा जित हासिल गरेका छन् । ४, ५ र ८ राप्रपा,  १, ६ र ९ एमाले, ३, ७ र २१ माओवादी, कांग्रेसले २ र २२ तथा २३ नम्बर वडामा संघीय समाजवादीले विजयको झन्डा फहराएका छन् ।
अहिले वडा नम्बर १० देखि २० सम्मको मतगणना भइरहेको छ ।

अरु उपमेयरलाई मेयरको चिन्ता धवललाई उपमेयरको
मेयर पदमा राप्रपाले अग्रता लिँदा उपमेयर पदमा भने नेपाली कांग्रेसकी उमा थापामगरले अग्रता लिएकी छन् । उनले ५ हजार ३ सय ६५ मत प्राप्त गर्दा राप्रपाकी रमा रानी गुप्ताले ५ हजार १ सय ४९ मत प्राप्त गरेकी छन् । हालसम्मको मत परिणामलाई हेर्ने हो भने मेयर पदका उमेदवारभन्दा उपमेयर पदका उमेदवार लोकप्रिय देखिएका छन् । मेयर पदमा उठेका नेकपा एमालेका समसुद्धिन सिद्धिकी भन्दा उपमेयर पदका उमेदवार शान्तीदेवी ढकाल लोकप्रिय देखिएकी छन् । सिद्धिकीले मेयरमा ३ हजार ८ सय ९३ मत प्राप्त गर्दा ढकालले ४ हजार १ सय ९६ मत ल्याएकी छन् ।

सांसदमा पराजित, मेयरमा पल्लाभारी
०७० सालको निर्वाचनमा धवल शमशेर संविधानसभा सदस्यको उमेदवार थिए । तर, उनी नेपाली कांग्रेसका तत्कालिन सभापति एवम् दिवंगत नेता सुशील कोइरालासँग १७ सय मतान्तरले पराजित भए । 

हाल सम्म उनी नेपालगञ्जबाट पाँचपटक चुनाव लडेका छन् । ०५४ सालमा मेयर बने । सांसद्मा भने उनी तिनैपटक पराजित भए । ०७० सालमा पनि नेपालगञ्जबासीले उनलाई मत दिन नखोजेका होइनन् । ‘प्रधानमन्त्री हुँदैछन्, नेपालगञ्जबासीले केही राहत महसुस गर्लान्’ भन्ने आशका कारण पनि उनी पछि परे ।

यसपटक उनी अघि लाग्नुको मुख्य कारण भनेको नेपालगञ्जमा सुशील कोइरालापछिका ‘हेवीवेट’ अन्य पार्टीमा नहुनु नै हो ।

भ्रष्टाचार गर्दिनँ, अरुको भर पर्दिनँ
नेपालगञ्ज उपमहानगरको यसपटकको निर्वाचनमा उनले नारै बनाए– भ्रष्टाचार गर्दिनँ । स्वच्छ छवीका नेताका रूपमा धवललाई नै लिन्छन् नेपालगञ्जबासी ।

स्थानीय पत्रकार कृष्ण अधिकारी भन्छन्, “नेपालगञ्जबासीले धवल शमशेरलाई भ्रष्टाचार विरोधी छवी बनाएका नेताका रूपमा चिन्छन् । उनले प्राप्त गरेको मतको बलियो आधार त्यही हो ।”

साढे दुई दशकदेखि नेपालगञ्जलाई केन्द्र बनाएर राजनीति गरेका धवलको यसपटकको जितको आधार भ्रष्टाचारविरुद्ध शून्य सहनशीलता नै भएको स्थानीयको ठम्याइ छ ।
त्यसका अतिरिक्त मेयर पदका १६ प्रत्यासीमध्ये उनी ‘हाइप्रोफाइल्’ हुन् । अरु उमेदवार विजयी भए भने पार्टीले घुमाउने हुन् कि, नगरको विकास निर्माणको नेतृत्वबाट पाखा लाग्ने हुन् कि भन्ने भय पनि मतदातालाई थियो । तर, धवलको हकमा त्यो लागु हुँदैन भन्ने विश्वास मतदातालाई छ । उनी राप्रपाका महामन्त्री हुन् । उनलाई घुमाउने त्यसभेगमा राप्रपाका हेवीवेट छैनन् । त्यसले पनि उनलाई पहिलो रोजाइ बनायो ।

हुन त त्यसठाउँबाट सुशील कोइरालाले पनि नजितेका होइनन् । देशको कार्यकारी प्रमुखसमेत बनेका कोइरालाले देशलाई संविधान दिए तर नेपालगञ्जबासीले केही पाएनन् । डुवान, ढल निकासको समस्या त दिनहुँ भोग्नुपथ्र्यो नै कुनै समय आर्थिक केन्द्र, कर्णालीको व्यापारको द्वार बनेको नेपालगञ्ज हेर्दाहेर्दै पछि पर्न थालेको स्थानीय महसुस गर्छन् । ‘राम्रो नेता नहुँदा नेपालगञ्ज पछि पर्‍यो । नेपालगञ्जलाई विकास गर्ने नेतै भएनन्,’ पछिल्लो समय नेपालगञ्जबासीको सामुहिक गुनासो बनेको थियो यो ।

त्यसकारण पनि धवल मतदाताको पहिलो रोजाइमा परेको आँकलन गर्न थालिएको छ ।

राजाको मन्त्रीसमेत खाएनन्
राजा ज्ञानेन्द्रका छोराको ससुरालीतर्फका नातेदार हुन् उनी । राजा ज्ञानेन्द्रले सत्ता हत्याएको बेला उनलाई मन्त्रीको प्रस्ताव पनि नआएको होइन । ‘टीके होइन जनताबाट चुनिएरै मन्त्री खान्छु’ भन्ने उनले ज्ञानेन्द्र नेतृत्वको मन्त्रिमण्डलमा उनी सहभागी भएनन् । त्यसैको छाप पनि यो निर्वाचनमा परेको आँकलन स्थानीयवासी गर्छन् ।

त्यसका अतिरिक्त उनले नेपालगञ्ज उममहानगरपालिका प्रमुखमा जितेँ भने तलब भत्ता लिन्न भनेर घोषणा गरेका छन् । एक त भ्रष्टाचार नगर्ने त्यसमाथि तलवभत्तासमेत नलिने प्रतिवद्धता व्यक्त गरेपछि मतदाताको आकर्षण उनी बनेको नेपालगञ्जबासी बताउँछन् ।