काठमाडौं । हरेक वर्ष भाइटीकाका दिन खुल्ने बालगोपालेश्‍वर मन्दिर भूकम्पले क्षतिग्रस्त भएपछि पहिलोपटक खुला गरिएको छ । २०७२ सालको विनाशकारी भूकम्पले क्षतिग्रस्त रानीपोखरीकोबीचमा रहेको बालगोपालेश्वर मन्दिर ५ वर्षपछि आज खुला गरिएको हो ।

यो मन्दिर वर्षमा एकदिन मात्रै खुला हुने गर्छ । तर भूकम्पपछि भने ५ वर्षसम्म खुल्न सकेन । दिदीबहिनी नहुनेहरुले बालगोपालेश्वर मन्दिरमा टीका लगाउने चलन छ । आज भाइटीकाका दिनमा आफ्ना दाजुभाइ र दिदीबहिनी नभएकाहरु यहीं आएर बालगोपालेश्‍वर मन्दिरको दर्शन गरी टीका लगाउने गर्छन् ।

भूकम्पले मन्दिरमा क्षति पुगेपछि बन्द थियो । मन्दिरभित्रको मूर्तिलाई छाउनीस्थित संग्रहालयमा राखिएको थियो । अघिल्ला वर्षहरुमा भाइटीकाको दिन रानीपोखरीबाहिर मूर्ति राखेर पूजा गरिन्थ्यो । लामो समयपछि यो वर्ष भाइटीकाका दिन बालगोपालेश्वरको दर्शन गर्न पुगेका सर्वसाधारणहरु खुसी देखिन्छन् । पुनर्निर्माणअघिको भन्दा अहिलेको रानीपोखरी सफा रहेको उनीहरुको भनाइ छ ।

कोरोना संक्रमणको जोखिमका कारण स्वास्थ्य सुरक्षाका सम्पूर्ण उपाय अपनाएर दर्शनको व्यवस्था मिलाइएको छ । भिड व्यवस्थापनका लागि काठमाडौं महानगरपालिकाले स्वयंसेवक परिचालन गरेको छ । फरक समुदायअनुसार मंसिर १ र २ गते दुई दिन भाइटीका लगाउने भएकाले भोलि २ गते पनि मन्दिर खुला हुनेछन् । बिहान ५ देखि साँझ ५ बजेसम्म मन्दिर खुला हुने भएको छ । 

महानगरपालिकाले भिड कम गर्न टीका नलगाउनेहरुलाई अहिले नआउन पनि आग्रह गरेको छ । अवलोकनका लागि छिटै खुला गरिने महानगरपालिकाको भनाइ छ । राष्ट्रिय पुनर्निर्माण प्राधिकरणले २७ करोड रुपैयाँ खर्चेर कात्तिकमा रानीपोखरी पुनर्निर्माण पूरा गरेको थियो । राष्ट्रपति विद्यादेवी भण्डारीले गएको कात्तिक ५ गते रानीपोखरी उदघाटन गर्नुका साथै बालगोपालेश्वरको प्राणप्रतिष्ठा पूजा गरेकी थिइन् । विक्रम संवत् २०३५ पछि नियमित रुपमा रानीपोखरीभित्रको बालगोपालेश्वर मन्दिर भाइटीकाको दिन खुल्दै आएको छ ।

आफ्ना दाजुभाइ तथा दिदीबहिनी नहुनेहरु बालगोपालेश्‍वर दर्शनका लागि पुगेका थिए । हेरौं थप तस्बिर :