काठमाडौं । आज कुकुर तिहार । सबै नेपालीका घर आँगनमा कुकुरलाई पूजा गरी मीठामीठा खानेकुरा खुवाउने गरिन्छ । 

आजको दिन कुकुरको पूजा नगरी खाए पाप लाग्‍ने भनाइ पनि छ । तर काठमाडौंमा एउटा यस्तो जोडी पनि छ जसले दैनिक रुपमा उपत्यकाका विभिन्‍न ठाउँमा पुगेर सडकमा बस्ने कुकुरहरुलाई खाना खुवाउने काम गर्छन् । त्यो पनि आफ्नै खर्चमा ।

कुकुर आज्ञाकारी, रक्षक र गुनिलो जनावर हो । भैरवको बहानसमेत रहेको कुकुरले कुनै पनि अपराधीहरुलाई सुँघेर पत्ता लगाउने काम गर्छ । त्यस्तै विनाशकारी प्राकृतिक प्रकोप तथा दैवी विपत्ति हुनुअघि कुकुरले सुँघेर वा भुकेर पूर्वसूचना समेत दिनेगर्छ । त्यसैले प्रत्येक वर्षको कृष्ण चतुर्दशीको दिन कुकुरको विशेष पूजा गर्ने गरिन्छ । यस दिन कुकुरलाई पूजा गरी विशेष प्रकारका खानेकुरा खान दिने चलन पनि छ । यस दिन आफ्नो घरमा पालिएका कुकुरबाहेक सडकमा बस्ने कुकुरहरुको समेत पूजा गरिन्छ ।

आजको दिनमा कुकुरलाई मीठा खानेकुरा खुवाइन्छ । अन्य दिनमा भने सडक कुकुरका लागि मानिसहरुले खासै महत्त्व दिँदैनन् । तर काठमाडौंमा धेरै समूह छन् जसले दैनिक रुपमा उपत्यकाका विभिन्‍न ठाउँमा पुगेर कुकुरहरुलाई खाना खुवाउने काम गर्छन् ।

यसै क्रममा काठमाडौंको चोभारमा रहेको स्‍नेहा केयर सेन्टरमा पनि धुमधामसँग कुकुर पूजा गरिएको छ । यो सेन्टरमा सडकमा रहेका कुकुरलाई आश्रय दिइन्छ । आज यहाँ रहेका कुकुरलाई माला लगाएर, मीठामीठा परिकार खुवाएर कुकुर तिहार मनाइएको छ । हेरौं थप तस्बिर :