पोखरा । पछिल्ला दुई महिनायता गण्डकीमा (एकाधबाहेक) दैनिक हजार जनाको पनि स्वाब परीक्षण भएको छैन । स्वास्थ्य निर्देशनालयकै विज्ञप्तिको यो तथ्यांकले संक्रमणको दर भने निकै उच्च रहेको देखाउँछ ।

सोमबारकै तथ्यांकलाई हेर्ने हो भने गण्डकीमा ८७४ जनाको स्वाब परीक्षण गर्दा १२३ जनामा कोरोना भेटिएको छ । यो संख्या भनेको प्रत्येक एक सयजनाको परीक्षण गर्दा १४ जनालाई कोरोना पुष्टि भएको छ ।

आइतबार पछिल्लो समयकै धेरै एक हजार २३० जनाको स्वाब परीक्षण भएको छ । यस्तै, आइतबार नै ४३४ जना संक्रमति गण्डकीमा थपिएका छन् । यो तथ्यांक भनेको १०० जनामा ३४ जनालाई कोरोना पुष्टि भएको हो ।

शुक्रबार २८ प्रतिशत, बिहिबार १७, बुधबार ३२ प्रतिशतमा कोरोना पुष्टि भएको छ । पछिल्लो साताको मात्रै तथ्यांक हेर्ने हो भने गण्डकीमा प्रतिदिन स्वाव परिक्षण भएकामध्येमा २५ प्रतिशतमा कोरोना पुष्टि भएको छ ।

यो त भयो प्रदेशभरिको तथ्यांक । यही तथ्यांकलाई हेर्दा पछिल्लो साता पोखरा कोरोनाको हटस्पट नै बन्‍न पुगेको छ ।  सोमबार ७०, आइतबार २८३, शुक्रबार १८३ कोरोना संक्रमित कास्कीका मात्रै छन् । यो भने कुल प्रदेशभरिको ५० प्रतिशतभन्दा बढी हो ।

दसैं तिहारको मोबिलिटी पनि बढ्यो । अहिले क्‍वारेन्टिनमा बस्‍ने कुनै समय पाँच-छ हजार थिए । अहिले चार-पाँच सय मात्रै छन । त्यही भएर पनि कम भएको हो । अबको २०-२२ दिनमा झनै बढ्छ । अहिले झन्डै २ हजार एक्टिभ केस छन्, यो बढेर पाँच हजारसम्म पुग्‍न सक्छ ।

कोरोना संक्रमितको उपचारमा चुक्यो प्रदेशको अस्पताल

अर्कातर्फ कोरोनाका गम्भीर बिरामीको उपचार हुने पश्चिमाञ्चल क्षेत्रीय अस्पतालका ४० वटै बेड पछिल्लो सातादेखि भरिएका छन् । होम आइसोलेसनमा बसेका दुई जनाले घरमै ज्यान गुमाइसकेका छन भने हजारभन्दा बढी संक्रमित होम आइसोलेसनमा छन् । प्रदेश सरकार मातहतको संक्रामक तथा सरुवा रोग अस्पतालका तीनवटा आईसीयू बेड र दुईवटा भेन्टिलेटर जनशक्ति अभावमा थन्किएका छन् ।

एक निजी, एक संघ मातहतको पश्चिमाञ्चल क्षेत्रीय अस्पताल र प्रदेशको गरी तीनवटा ल्याबबाट कोरोना परीक्षण भइरहेको छ । तर, संख्या भने हजार कटेको छैन । प्रदेश स्वास्थ्य निर्देशनालयका निर्देशक डा. विनोदविन्दु शर्मा पनि परीक्षण कम भएको स्वीकार्छन ।

“कोरोनासम्बन्धी प्रोटोकल परिवर्तन भएको छ, अहिले लाक्षणिकको मात्र स्वाब परीक्षण गर्नेगरि निर्देशिका फेरिएको छ । त्यसकारण पनि संक्रमण घटेको हो,”उनले भने । कन्ट्याक्ट ट्रेसिङमा सबै पर्ने हुँदा सबैको परीक्षण गर्न नसकिने उनको भनाइ छ ।

यता परीक्षण घटेको तर संक्रमण बढेको बारेमा चाहिँ उनले देशभर नै संक्रमणको दर बढेको बताए । संक्रमण बढेतापनि सरकारले आइसियु र भेन्टिलेटरभन्दा पनि अक्सिजन बेडहरु थप्ने तयारी गरिरहेको जानकारी दिए ।

“लेखनाथको संक्रामक रोग अस्पतालमा आईसीयू बेडहरु तयार गर्ने क्रममा छौं । काठमाडौंबाट टिमहरु आउनुभएको छ । अहिले तीन वटा छन् । हामीले थप्दैछौँ । जनशक्ति पनि बढाउँदैछौं । एमजीडीपी डाक्टरहरु राख्छौं । पोखरा महानगरको टिम, पोखरा स्वास्थ्य विज्ञान प्रतिष्ठानका पदाधिकारीसँग पनि छलफल गरेका छौं । सुरुमा हामीले पनि आईसीयू भेन्टिलेटर भन्यौं । भेन्टिलेटरको वास्तै नगर्ने चाहीँ होइन । अहिले मान्छेलाई बचाउन प्रिभेन्सन भनेको चाहीँ अक्सिजन दिने हो । अहिलेको उपचार भनेकै अक्सिजन दिने हो । हाइ फ्लोको अक्सिजनको बेडहरु थप्ने भनेका छौँ । गण्डकी अस्पतालमा ५० देखि ७० र लेखनाथमा कम्तिमा ३५ बेड बनाउँछौँ, ” उनले भने ।

कर्मचारी थप गर्नको लागि यही हप्ता सूचना निकाल्ने, तालिमहरु दिने उनले बताए । “अहिले अन्तर्राष्ट्रिय मार्केटमा पनि उपकरण अभाव छ । गण्डकीमा पहिलोपटक हामीले तालिम दिएर २६ जनालाई तयार गरेका छौँ । आइसियु हेर्नेगरि एकसयजनाको नियुक्तीको सूचना निकाल्दैछौँ । संक्रमण त देशभरि नै बढेको छ,” शर्माले भने ।