धनगढी । सूदुरपश्चिमको उपमहानगरपालिका धनगढीमा चुनावी चटारो छाएको छ । निर्वाचन आउन पाँचदिन बाँकी रहँदा सबैजसो उमेदवारहरू घरदैलोमा व्यवस्त छन् भने शीर्ष नेता धनगढी ओरालेर आफ्नो पक्षमा मत माग्न उमेदवार लागि परेका छन् । मत परिणाम आफ्नो पक्षमा पार्न प्रमुख पार्टीका शीर्ष नेताहरू धनगढी आइपुगेका छन् । प्रधानमन्त्री शेरबहादुर देउवा चुनावी सभालाई सम्बोधन गर्न शुक्रबार धनगढी आइपुगे भने नेकपा माओवादी केन्द्रका अध्यक्ष पुष्पकमल दाहाल प्रचण्ड पनि धनगढी ओर्लिए । त्यस्तै चुनावी सभालाई सम्बोधन एमाले नेता माधवकुमार नेपाल पनि धनग।ढी आए । गौरीफन्टा नाकासँग जोडिएको र प्रवेशद्वारका रूपमा रहेको धनगढी उपमहानगरलाई आफ्नो पोल्टामा पार्न दलहरू अन्तिम कसरतमा छन् ।

नगरपालिकाको ढलनिकाश, डुवान नियन्त्रण, गौरिफन्टालाई अन्तर्राष्ट्रिय नाका बनाउने उनीहरूले प्रतिवद्धता व्यक्त गरेका छन  ।
मुख्य रूपमा कांग्रेस, एमाले, माओवादी केन्द्र, राप्रपाको चर्चा भए पनि धनगढी नगरपालिकामा स्वतन्त्र उमेदवार गोपाल हमाल गोपीको विशेष चर्चा छ । धनगढी उद्योग वाणिज्य महासंघको पूर्व अध्यक्षसमेत रहेका उनी सुन्दर सुदूरपश्चिम निर्माणका अभियन्ता पनि हुन् । 

पहिला सर्वदलीयमा बसेर भ्रष्टाचार अनियमिततालाई प्रश्रय दिएका । नगरको लागि केही योगदान दिन नसकेकाहरू महानगर हाँक्न कसिएकाले उनीहरूको विरूद्ध आफूले उमेदवारी दिएको उनको भनाइ छ ।

मुआब्जा वितरणदेखि गौरिफन्टा नाकालाई अन्तर्राष्ट्रिय नाका बनाउने आफ्नो एजेन्डा रहेको कांग्रेसका मेयर पदका उमेदवार नृप वड बताउँछन् । 
कांग्रेसका नगर सभापति रहेका वड व्यवस्थापिका–संसद्मा कांग्रेस ठूलो दल भएको र धनगढीको नगरक्षेत्रबाट नेपाली कांग्रेसले नै सांसद् जित्दैक आएकाले आफ्नो विजय सुनिश्चित भएको उनको दाबी छ । धनगढी नगर क्षेत्रमा केही दलितहरूको पनि बसोबास रहेको र आफूले सोही समुदायबाट पनि उमेदारी दिएकाले विजयको ढोका खुलेको तर्क गरे । यद्यपि सबै समुदायबाट भोट पाउने विश्वास उनको छ ।

निजी विद्यालयका सञ्चालक रहेका दुर्गा जोशी एमालेका तर्फबाट मेयरका उमेदवार हुन् । यसअघिको स्थानीय निकाय निर्वाचन पश्चात एमालेले विभिन्न विकासका कामको पहल गरेकाले एमालेको जित सुनिश्चित भएको उनको तर्क छ ।
त्यस्तै रामसमझ राना माओवादी केन्द्रका मेयरका उमेदवार हुन् । उनी धनगढी नगर क्षेत्रमा खासै क्रियाशील नरहेकाले प्रतिष्पर्धामा पुछारमा रहेको स्थानीयको विष्लेषण रहेको छ । “सिमान्त, उपेक्षित, उत्पीडितहरूको मुक्तिका लागि मैले उमेदवारी दिएको हुँ । र्षौंदेखि पछाडि रहेका समुदायको उत्थान नै मेरो प्रमुख एजेन्डा हो,” उनले भने ।

राष्ट्रिय प्रजातन्त्रपार्टीबाट धनगढीको मेयरमा विष्णुबहादुर साहुले उमेदवारी दिएका छन् ।

विगतको अवस्था
धनगढी नगरबाट ०४८ सालको संसदीय निर्वाचनमा कांग्रेसका उमेदवार टेकबहादुर चोखालले निर्वाचन जितेका थिए । ०४९ सालको स्थानीय निकाय निर्वाचनमा धनगढी नगरपालिकाबाट किशोर बलमे निर्वाचन जितेका थिए । ०५१ सालको मध्यावधी निर्वाचनमा एमालेका महेश्वर पाठकले जित हासिल गरेका थिए । ०५४ सालको निर्वाचनमा एमालेका खेमराज पाण्डेले मेयर जितेका थिए । ०५६ संसदीय निर्वाचनमा टेकबहादुर चोख्यालले नै जित हासिल गरेका थिए । ०६४ को पहिलो संविधानसभाको निर्वाचनमा  एमाओवादीबाट लीला भण्डारीले जितेका थिए । ०७०को निर्वाचनमा शेरबहादुर देउवाले करिब १६ हजार ९०० मत ल्याइ निर्वाचित भएका थिए । दुई क्षेत्रबाट चुनाव लडेका देउवाले उक्त क्षेत्र छोडेका थिए । उपनिर्वाचनमा कांग्रेसकै पुष्कर ओझाले १४ हजार मत ल्याएका थिए ।

७५ हजार ५३५ मतदाता रहेको धनगढी उपमहानगरपालिकामा १९ वडा रहेका छन् । करिब ३० प्रतिशत थारू मतदाता छन् भने बाँकी अन्य मतदाता रहेका छन् ।