सिन्धुपाल्चोकको बाह्रबीसेमा गएको पहिरोमा परेका दुई जनाको शव फेला परेको छ भने २० जनाभन्दा बढी  बेपत्ता भएका छन् । बाह्रबीसेको जम्मु बजार पहिरोले बगाएको छ । काठमाडौं उपत्यकामा बाहिरी सम्पर्कमै नगएकाहरूमा समेत कोभिड — १९ को संक्रमण देखिन थालेको छ । मनसुनसँगै बाढी, पहिरो र डुबानको समस्या बढ्ने र मानवीय संकट उत्पन्न हुने निश्चितै छ । सरकारका मुखपत्रजस्ता भएकाले भारतीय पत्रकारहरूले नै ‘गोदी मिडिया’ भन्ने गरेका मूलतः हिन्दी टेलिभिजनहरूले नेपाल र विशेषगरी प्रधानमन्त्री केपी शर्मा ओलीविरुद्ध छुद्र विषवमन गरिरहेका छन् । यस्तोमा नेपालभित्र भने प्रधानमन्त्री तथा सत्तारुढ नेपाल कम्युनिस्ट पार्टी (नेकपा)का अध्यक्ष ओलीको राजीनामाको माग र इन्कारमा समय बर्बाद गरिएको छ । प्रधानमन्त्री ओली समर्थकहरूले संक्रमणको विस्तारमा ‘योगदान’ गर्नकै लागि उनको पक्षमा प्रदर्शन सुरु गरेका छन् । गैरजिम्मेवारीको पराकाष्ठा ! 

प्रधानमन्त्री ओली नेतृत्वको सरकारमाथि महामारीका बेला चिकित्सा सामग्री किन्दा पनि भ्रष्टाचार गरेको आरोप लागेको छ । कोभिड—१९ को संक्रमण प्रधानमन्त्री ओलीको दम्भ र सरकारी संयन्त्रको बदनियत र हेलचेक्य्राइँका कारण समुदायमा पुगेको संकेत देखिन थालेको छ । क्वारेन्टिनमा राखिएका व्यक्ति बिरामी भएर उपचार नपाई मरेका छन् । बन्दाबन्दीका कारण काम गर्न नपाएपछि चरम गरिबीमा रहेकाहरू भकाभक मरेका छन् । अर्थात्, विपक्षले मात्र हैन सत्ता पक्षले नै प्रधानमन्त्री ओलीको राजीनामा माग्नुपर्ने मनग्गे कारण उचित कारण थिए । तर, यस्ता कुनै कारण देखाएर सत्तारुढ दलका कार्यकारी अध्यक्षलगायतका नेताले प्रधानमन्त्रीको राजीनामा मागेका भने हैनन् । उनीहरू त प्रधानमन्त्री ओलीले सके दुवै पदबाट नभए पनि एउटा पदबाट त राजीनामा दिनुपर्ने रटमात्रै लगाइरहेका छन् । 

पछिल्लो समाचारअनुसार नेकपाका ‘भारण्ड’ अध्यक्षहरूबीच एक्लाएक्लै वार्ता भइरहेको छ । ओलीविरुद्धको विवादमा छलफल थालेको पार्टीको स्थायी कमिटीको बैठक भने सारिएको सारिएकै छ । कार्यकारी भनिएका अध्यक्ष पुष्पकमल दाहालले प्रधानमन्त्री ओलीले अध्यक्ष र प्रधानमन्त्रीमध्ये एउटा पद त छाड्नै पर्ने अडान राखेको र प्रधानमन्त्री ओलीले ‘प्रधानमन्त्री हुन अर्को संसदीय निर्वाचनबाट जनादेश ल्याउन र अध्यक्ष हुन महाधिवेशनसम्म पर्खन’ ओँठे जबाफ दिएर दाहालका कुनै माग नमान्ने स्पष्ट बताएको समाचार छ। शासन सञ्चालनमा असफलता र देशमा व्याप्त अराजकता तथा भ्रष्टाचारका कारण प्रधानमन्त्री ओलीले राजीनामा गर्नुपर्छ भनिएको भए दाहाललगायतका नेताको माग देश र जनताका पक्षमा हुन्थ्यो । यसैले जनताले भोग्नुपरेको संकटबाट ध्यान अन्तै लैजानमात्र नेकपाभित्र विवादको नाटक रचिएको त हैन भन्ने शंकासमेत गर्न थालिएको छ ।

प्रधानमन्त्री तथा नेकपाका अध्यक्ष केपी शर्मा ओलीलाई दुवै वा एउटा पदबाट हटाउनै पर्ने हो भने अर्को पक्षले संविधानसम्मत विधि अपनाउनु पथ्र्यो । अहिलेको नेकपा नेताहरूको शैली हेर्दा त यो सबै नौटंकी ओलीबाट अलि ठूलो भाग पाउन गरिएको मोलतोलजस्तोमात्र देखिन्छ । अध्यक्ष दाहाललगायतका जिम्मेवारी नभएकाहरू त सधैँ बैठकै बसिरहे पनि जनताका लागि केही फरक नपर्ला । तर, प्रधानमन्त्री ओलीले पद त्याग नगर्ने हो भने यस्ता अनावश्यक झ्याउलामा समय खेर फाल्न पाउँदैनन् । नेकपाका नेता गैरजिम्मेवार हुन पाउलान् तर प्रधानमन्त्रीलाई त्यो सुविधा हुँदैन । यसैले प्रधानमन्त्री ओलीले राजीनामा गर्ने हो भने तत्काल गरून् । हैन भने पार्टीको किचलोबाट बाहिर निस्केर देशका समस्यामा ध्यान दिऊन् ! देशको कार्यकारी प्रमुखले राष्ट्र नै संकटमा परेका बेला यसरी अरू मामिलामा अलमलिनु जनताप्रति विश्वासघात हो । प्रधानमन्त्री ओलीले दायित्वबोध गरून् !