एजेन्सी । अभिनेत्री प्रियंका चोपडा र चलचित्र निर्माता अनुराग कश्यप यस वर्षको टोरन्टो अन्तर्राष्ट्रिय फिल्म फेस्टिभल (टीआईएफएफ) मा दूत (ब्रान्ड एम्बेसडर) का रूपमा आमन्त्रित भएका छन् । ५० प्रख्यात चलचित्र निर्माता र कलाकारको सूचीमा उनीहरू पनि परेका हुन् ।
फिल्म फेस्टिभल सेप्टेम्बर १० देखि १९ सम्म सञ्चालन हुनेछ । कोरोना भाइरस महामारीका कारण पहिलोपटक डिजिटल स्क्रिनिङ र भर्चुअल रेड कार्पेट हुने आयोजकले विज्ञप्ति जारी गरी जनाएको छ । गालामा प्रियंका र अनुरागसहित ओस्कर विजेता तथा चर्चित अन्तर्राष्ट्रिय चलचित्र निर्माताहरू पनि सामेल हुनेछन् । यस ४५औं फिल्म फेस्टिभलमा पहिलो ५ दिन ५० फिल्म सामाजिक दूरी कायम गरी हलमै प्रदर्शन गरिने जनाइएको छ ।
फिजिकल स्क्रिनिङका लागि सम्बन्धित ठाउँको स्वास्थ्य अधिकारीहरूबाट स्वीकृति लिन आवश्यक भएको बताइएको छ । इतिहासमै पहिलोपटक टीआईएफएफले डिजिटल प्लेटफर्ममार्फत फेस्टिभल आयोजना गर्न लागिएको हो । अनलाइनमार्फतै चलचित्र प्रदर्शनी, बहस तथा अन्य कार्यक्रमहरू सञ्चालन हुनेछ, जसमा टोरोन्टोबाहेक आमदर्शकहरूले पनि हेर्न पाउनेछन् ।
फेस्टिभलको वार्षिक टीआईएफएफ ट्रिब्युट अवार्ड पनि भर्चुअली नै हुनेछ, जसमा फिल्म क्षेत्रमा उल्लेखनीय योगदान पुर्याएका व्यक्तिहरूलाई सम्मान गरिनेछ । कोरोना भाइरस महामारीका कारण रद्द भएका अन्तर्राष्ट्रिय फिल्म महोत्सवहरू अहिले अनलाइनमार्फत सञ्चालन हुन थालेका छन् । जसमा कान्स फिल्म फेस्टिभल पनि अनलाइनमार्फतै सञ्चालन भइरहेको छ । (इन्डियन एक्सप्रेस)
