काठमाडौं । बझाङ १ को ‘क’मा नेकपा (एकीकृत समाजवादी)का दिलबहादुर सिंहसहित ८ उमेदवारको जमानत जफत भएको छ । 

निर्वाचन आयोगका अनुसार तीन दलबाहेक अरु दलले कूल सदर मतको १० प्रतिशत मत ल्याउन सकेका छैनन् । शनिबार भएको मतगणनाको परिणाम सोमबार दिउँसो घोषणा गरिएको छ । 

आयोगका अनुसार ६१ हजार ७४८ मतदाता रहेको उक्त क्षेत्रमा करिब ५० प्रतिशत मत खसेको थियो । जसमध्ये २९ हजार ७०५ मत सदर भएको छ ।  प्रदेशसभा सदस्य निर्वाचन ऐन २०७४ को धारा ७१ मा धरौटी जफतको व्यवस्था छ । 

जसमा कूल सदर मतको १० प्रतिशतभन्दा कम मत ल्याउने उमेदवारको धरौटी जफत हुने व्यवस्था गरिएको छ ।

“पहिलो हुने निर्वाचित हुने निर्वाचन प्रणाली अन्तर्गतको कुनै निर्वाचनमा मतदान गरिएको जम्मा सदर मतको दश प्रतिशतभन्दा कम सदर मत पाउने उमेदवारको धरौटी जफत हुनेछ । तर निर्वाचित उमेदवारको हकमा यो कुरा लागू हुने छैन,” धारा ७१ को उपधारा १ मा उल्लेख छ । 

बझाङ १ को कूल सदर मत अनुसार धरौटी जोगाउनका लागि उमेदवारले कूल २ हजार ९ सय बढी मत ल्याउनुपर्ने हुन्छ । 

कसले कति मत ल्याए ? 
बझाङ १ को ‘क’मा नेकपा एमाले निर्वाचित भएको छ । एमालेका दमन भण्डारी ११ हजार ६१३ मत ल्याएर निर्वाचित भएका हुन् ।  निकटतम प्रतिष्पर्धी कांग्रेसका सिंहले ११ हजार ३४६ मत पाएको आयोगले जनाएको छ । उनीहरुको मतान्तर २६७ रहेको छ । 

त्यस्तै, तेस्रो स्थानमा रहेका नेकपा (माओवादी केन्द्र) का जनक बुढाले ३ हजार ८३१ मत प्राप्त गरेका छन् ।

जसले जमानत जोगाउन सकेनन् 

मत परिणामको अन्तिम विवरण अनुसार एकीकृत समाजवादीका दिलबहादुर सिंहले २ हजार ५१४ मत प्राप्त गरेका छन् ।   एकीकृत समाजवादीले २५ सय मत कटाए पनि जमानत जोगाउनका लागि पर्याप्त भएन ।

राष्ट्रिय प्रजातन्त्र पार्टी (राप्रापा) का किशोर कुमार खड्काले २४२ मत पाएका छन् ।  जनता समाजवादी पार्टी (जसपा) का उमेदवार रामबहादुर जाग्रीले ४४ मत प्राप्त गरेका छन् ।  राष्ट्रिय मातृभूमि पार्टीका गजेन्द्र बहादुर थापाले ३५ मत ल्याएका छन् । 

संघीय लोकतान्त्रिक राष्ट्रियमञ्च दीपबहादुर खड्काले २८, जनमतका सुशीलादेवी विष्टले २६ मत ल्याएका छन् । नेपाल मजदुर किसान पार्टी (नेमकिपा) का खगेन्द्रबहादुर शाहीले २४ मत पाउँदा नेशनल रिपब्लिक नेपालका कमल घर्तीमगरले २ मत ल्याए । 

प्रदेशसभा निर्वाचनका लागि उमेदवारले पाँचहजार रुपैयाँ निर्वाचन अधिकृतको कार्यालयमा धरौटी राख्नुपर्ने व्यवस्था ऐनमा रहेको छ । कूल सदर मतको १० प्रतिशत कटाउन नसक्ने उमेदवारको उक्त जमानत जफत हुनेछ ।

इलाममा क–कसको होला ?

त्यस्तै इलाम–२ मा प्रतिनिधिसभा उपनिर्वाचनको मतगणना जारी छ । पछिल्लो तथ्यांकअनुसार एमालेका उमेदवार सुहाङ नेम्वाङको अग्रता कायम छ ।  यहाँ दोस्रो स्थानमा रहेका कांग्रेसका डम्बरबहादुर खड्का झण्डै पाँचहजार मतान्तरले पछि छन् । 

तेस्रो स्थानमा पहिचान पक्षधर डकेन्द्रसिंह थेगिमले कांग्रेसलाई पछ्याउँदा रास्वपाका मिलन लिम्बू भने धेरै पछि परेका छन् ।  एमालेका सुहाङले अहिलेसम्म १३ हजार ९०० मत पाउँदा कांग्रेसका खड्काले आठ हजार ९१४ मत पाएका छन् । 

थेगिमले आठ हजार २८५ मत ल्याउँदा रास्वपा लिम्बुको एक हजार ९४५ मत रहेको छ । इलाममा ६९ हजार २८७ मत खसेको थियो । यहाँ पनि कूल सदर मतको १० प्रतिशत नकटाउने उमेदवारको धरौटी जफत हुनेछ । प्रतिनिधिसभाका प्रत्यक्ष उमेदवारले दश हजार धरौटी जम्मा गर्नुपर्ने व्यवस्था रहेको छ ।