जनकपुर । एकपछि अर्को हुँदै दिनकै तीन जनासम्मको मृत्यु हुन थालेपछि महोत्तरीस्थित भंगहा नगरपालिकामा स्वास्थ्य क्षेत्रका सबै निकायको ध्यान केन्द्रित भएको छ । 

भंगहा नगरपालिका ७ मा दुई साता अगाडि एकजना अधवैशे पुरुषको अचानक मृत्यु भयो । त्यसको एक सातापछि थप एक जना र भोलिपल्ट एकै दिन अन्य दुई जनाको मृत्यु भएपछि स्थानीयमा त्रसित भएका थिए । घटना विवरण सञ्‍चामाध्यममा आएपछि जिल्ला अस्पताल, प्रदेश अस्पताल र सरुवा रोग नियन्त्रण महाशाखाको ध्यानाकर्षण भयो । पछिल्लो सातामात्रै थप आठ जनाको मृत्यु भयो । आइतबारसम्म यसरी मृत्यु हुनेको संख्या १२ पुगेको छ । 

“हिँडडुल गर्दागर्दै अचानक टाउको दुख्‍न थाल्ने, वान्ता हुने, पेट दुख्‍ने र केहीबेरपछि मृत्यु हुने”, यो अवधिमा ज्यान गुमाएका १२ जनामध्ये अधिकांस व्यक्तिमा देखिएकोबारे भंगहा ७ का वडाध्यक्ष वासुदेव सिंहले बाह्रखरीलाई बताए । उनका अनुसार सुरुमा आठ जनाको मृत्युपछि पोष्टमार्टम नगरिकनै अन्त्येष्टी गरिएको थियो । एकै प्रकारका लक्षण देखिने र केही दूरीकै अन्तरालमा धमाधम मानिसको मृत्यु हुन थालेपछि स्थानीय प्रशासनले चासो लियो र पछिल्लो चार जनाको पोष्टमार्टम गराइएको सिंहको भनाई छ । 

भंगहा ७ का तीन र सोही नगरपालिका वडा नम्बर ६ का एक जनाको आरडीटी, पीसीआर जाँच र पोष्टमार्टम गरिएको छ । तीमध्ये आइतबार मृत्यु भएका एकजनाको आरडीटी रिपोर्ट नेगेटिभ देखिएको छ भने पीसीआर रिपोर्ट आउन बाँकी छ । अन्य सबैको आरडीटी र पीसीआर रिपोर्ट नेगेटिभ आएको र मृत्युको कारण देखिन सक्ने पोष्टमार्टम रिपोर्ट आउन बाँकी रहेको नगर प्रमुख संजीव साहले जानकारी दिए । 

जिल्ला प्रहरी प्रमुख एसपी श्यामकृष्ण अधिकारीले शारीरिक रुपमा कमजोर रहेका र अत्यधिक मदिरा सेवन गर्ने व्यक्तिहरुको मृत्यु भएको देखिन्छ । यतिबेला खुल्ला मदिरा पूर्णरुपमा प्रतिबन्ध गरिसकिएको र स्थानीयमा पनि सचेतना आइसकेको आधारमा थप घटना हुने सम्भावना घटेको उनको दाबी छ । 

दुई हप्तामा १२ जनाको ज्यान गएकोमा भंगहा ७ का ७ जना, सोही नगरपालिका वडा नम्बर ६ का १ जना र बर्दिबास नगरपालिका १२ का ४ जनाको मृत्यु भएको हो । भंगहाको वडा नम्बर ६ र ७ तथा बर्दिबासको १२ नम्बर वडाको सीमा जोडिएको छ ।

आपसमा जोडिएका तीन बस्तीका दर्जन व्यक्तिको धमाधम मृत्यु हुन थालेपछि यतिबेला सरुवा रोग नियन्त्रण महाशाखा टेकु, वीपी कोइराला स्वास्थ्य विज्ञान केन्द्र धरान र प्रदेश २ स्वास्थ्य निर्देशनालयको साथै विश्व स्वास्थ्य संगठनको संयुक्त टोली परिचालन भएको छ । उक्त टोलीले घटनाको कारण खोज्‍न मृतकका परिवार, छिमेकी र स्थानीय स्वास्थ्यकर्मीहरुसँग सोधपुछ गरिरहेका छन् । उक्त टोलीले पनि शवको पोष्टमार्टम रिपोर्ट आएपछि मात्रै घटनाको कारण खुल्ने बताएको एसपी अधिकारी बताउँछन् । 

स्थानीयले भने विषाक्त मदिरा सेवन गरेको कारण उनीहरुको मृत्यु भएको अनुमान छ । दुई महिनाअघि यो ठाउँदेखि नजिकै पर्ने धनुषाको क्षिरेश्वरनाथ नगरपालिकामा विषाक्त मदिरा सेवन गर्ने करिब एक दर्जन सर्वसधारणको मृत्यु भएको थियो । उक्त घटनामा ज्यान गुमाउने परिवारहरुलाई प्रदेश २ सरकारले जनही तीन लाख रुपैयाँको दरले क्षतिपुर्ति उपलब्ध गराएको थियो । 

यसैबीच, एकपछि अर्को हुँदा दुई हप्तामै १२ जनाको ज्यान गएपछि प्रदेश २ सरकारले भंगहा ७ मा रहेको स्वास्थ्य चौकीलाई तत्काल स्तरोन्नतिगरी पाँच शय्याको अस्पताल सञ्चालन गर्ने तयारी गरेको छ । सामाजिक विकास मन्त्री नवलकिशोर साहले सोमबारै उक्त स्वास्थ्य चौकीमा पुगेर आवश्यक उपकरण र औषधी नगर प्रमुख संजीव साहलाई हस्तान्तरण गरेका छन् । जिल्ला अस्पतालबाट वेड पठाइसकिएको छ । बुधबारसम्म चिकित्सक लगायत आवश्यक जनशक्ति समेत परिचालन गरिसक्नेगरी तयारी भइरहेको मन्त्री साहले जनाए । 

यसअघि सोमबारै बिहान उक्त क्षेत्रका सांसद मञ्जु यादवको नेतृत्वमा गएको टोलीले मुख्यमन्त्री लालबाबु राउतलाई ज्ञापनपत्र बुझाउँदै मृतक परिवारहरुलाई उचित क्षतिपुर्ति र खुला मदिरा उत्पादन तथा बिक्री वितरण गर्नेहरुलाई कारवाहीको दायरामा ल्याउन माग गरेका थिए । 

उक्त टोलीमा धनुषाका सांसद शत्रुधन महतो र महोत्तरीका भरत साह तथा कौशलकुमार यादवलगायत उपस्थित थिए । ज्ञापनपत्र बुझेपछि मुख्यमन्त्री राउतले मृतक परिवारहलाई एक लाखको दरले क्षतिपुर्ति रकम उपलब्ध गराउने आश्वासन दिएको सांसद यादवले बताइन् ।