काठमाडौं । राजावादी समर्थकहरूको चैत १५ गतेको आगजनी र तोडफोडबाट क्षति पुगेको जडीबुटी उत्पादन तथा प्रशोधन कम्पनी लिमिटेडले अहिले सञ्चो उत्पादन गरेको छैन । कम्पनीले सञ्चो उत्पादन नगरेपछि बजारमा सञ्चो अभाव हुने हो कि भन्ने आशंका उब्जिएको छ । तर, कम्पनीसँग अहिले पनि दुई महिनालाई पुग्ने सञ्चो भण्डारण छ ।

जलेर नष्ट भएका फोहोरहरू सफा गरेपछि पुन: उत्पादन गर्ने तयारी भइरहेको जडीबुटी उत्पादन तथा प्रशोधन कम्पनीका उपप्रबन्धक तथा सूचना अधिकारी धर्मलाल नेपालले बताए । अहिले कम्पनीसँग दुई महिनाको माग धान्ने सञ्चो भण्डारण रहेको उनी बताउँछन् । 

“हामीसँग अहिले पनि दुई महिनालाई धान्ने सञ्चो हामीसँग स्टक छ । उत्पादन पनि चाँडै थाल्छौँ,” नेपालले बाह्रखरीसित भने, “हामीले केन्द्रीय कार्यालयबाट नै सञ्चो उत्पादन गर्ने तयारी गरिरहेका छौँ । सम्भव भएसम्म एक साताभित्र नै उत्पादन सुरु गर्छौं । बजारमा सञ्चो अभाव हुँदैन ।”

राजावादी समर्थकको आगजनी र तोडफोडबाट कम्पनीको करिब २८ करोड बराबरको क्षति भएको प्रारम्भिक अनुमान गरिएको छ । तर, यसको अध्ययन गर्नका लागि समिति गठन गरिएको छ । आधिकारिक क्षतिको विवरण भने समितिको प्रतिवेदनले देखाउनेछ ।  

आगजनी र तोडफोडबाट सञ्चो उत्पादन गर्ने भवन, ल्याब तथा मेसिन पूर्णरूपमा क्षति भएको सूचना अधिकारी नेपालले बताए । आगजनी र तोडफोडका कारण उत्पादन कम हुनसक्ने भनेर तामागढी शाखाबाट उत्पादन भइरहेको उनी बताउँछन् । 

सञ्चो नेपालीलाई नै केन्द्रित गरेर उत्पादन गरिएको नेपाल बताउँछन् । सञ्चो नेपालीहरूमा चर्चित छ ।

बाराको तामागढी, सुनसरीको तररा, मोरङको बेलबारी र कैलालीको टिकापुरमा शाखा कार्यालय छन् । तामाढीबाट मात्र सञ्चो उत्पादन हुँदै आएको छ । सञ्चोबाहेक अन्य जडिबुटी तेलहरू नियमित रूपमा उत्पादन हुँदै आएका छन् ।

कम्पनीमा २५८ जना कर्मचारी छन् । जसमा स्थायी ३८ जना छन् भने करारमा ३६ जना र अरू १८४ जना कार्यरत छन् । ०३७ पुस १७ गते जडीबुटीको खेती, तेल तथा औषधि उत्पादनका लागि यो कम्पनी स्थापना गरिएको थियो ।कम्पनीको अधिकृत पुँजी पाँच करोड रुपैयाँ छ । जारी पुँजी तीन करोड ८६ लाख रुपैयाँ र चुक्तापुँजी दुई करोड ७५ लाख रुपैयाँ छ ।

आर्थिक वर्ष ०७९/८० मा कम्पनीले दुई करोड ८४ लाख रुपैयाँ खुद नोक्सानी व्यहोरेको तथ्यांक संस्थानको वार्षिक स्थिति समीक्षा २०८१ मा उल्लेख छ । तर, आर्थिक वर्ष ०७९/८० सम्मको खुद नाफा २७ करोड सात लाख रुपैयाँ छ ।

कम्पनीको खुद सम्पत्ति (नेटवर्थ) ४१ करोड ४० लाख रुपैयाँ छ । कम्पनीले सरकारलाई बुझाउन १२ करोड ९३ लाख र ब्याज ६९ लाख रुपैयाँ छ । बैंक तथा वित्तीय संस्थालाई बुझाउनुपर्ने ऋणको सावाँ चार करोड ९३ लाख र ब्याज ६९ हजार रुपैयाँ छ ।