जनकपुर । कोरोना भाइरस संक्रमित पुष्टि भएका युवक दुई साताअघि भारतबाट मध्यरात चोरबाटोबाट नेपाल प्रवेश गरेको बुझिएको छ । 

रौतहटको इशनाथ नगरपालिका ५ मोतिपुर घर भएका मुस्लिम समुदायका १९ वर्षीय ती युवक दुई साताअघिसम्म दिल्लीस्थित एक कारखानामा काम गर्थे । चैत १७ गतेदेखि इशनाथ नगरपालिकाकै औरैया टोलस्थित जनता माविमा सञ्चालित क्वारेन्टाइनमा रहेका उनको सोमबार संक्रमित पुष्टि भएलगत्तै स्थानीय प्रशासनले ‘ट्राभल हिस्ट्री ट्रेस’ गरेको छ । 

अनुसन्धानको क्रममा ती युवक चैत १६ गते मध्यराति चोरबाटो नेपाल पसेको देखिन आएको रौतहटका प्रमुख जिल्ला अधिकारी वासुदेव घिमिरेले जानकारी दिए । 

घिमिरेका अनुसार दिल्लीबाट चारजनाको समूहमा रहेका ती युवक चैत १४ गते बिहान मालबाहक ट्रक चढेर १६ गते बिहान बिहारको मोतिहारी आइपुगेको देखिन्छ । 

बिहारको पूर्वी चम्पारण जिल्लामा रहेको मोतिहारी नेपाल–भारत सीमादेखि करिब ४० किलोमिटर दूरीमा पर्छ । त्यहाँबाट पैदलै हिँडेका उनीहरू सोही दिन मध्यराति खेतैखेत हँुदै सीमा सुरक्षामा खटेका दुवै मुलुकका प्रहरीको आँखा छलेर नेपाल प्रवेश गरेका हुन् । मुलुक लकडाउनका बेला बाहिरबाट केही युवक टोलमा आएको खबर पाउनासाथ स्थानीय प्रशासनले १७ गते बिहानै उनीहरूलाई औरैयामा रहेको जनता मावि क्वारेन्टाइनमा राखियो ।

प्रशासनले ती युवकसँगै भारतबाट आउने सोही वडाका उमाकान्त साह, मोहमद इकलाख र वडा ६ का शिवनाथ महतोलाई पनि क्वारेन्टाइनमा राखेको छ । लगत्तै उनीहरूको थ्रोट स्वाब परीक्षणको लागि हेटौंडा पठाएकामा एकजनाको रिपोर्ट पोजेटिभ देखिएपछि गत चैत २८ गते पुनः जाँचका लागि टेकु अस्पताल पठाइयो । र, सोमबार त्यहाँको रिपोर्ट पनि पोजेटिभ देखिएको प्रदेश २ प्रहरी कार्यालयले जनाएको छ । अहिले उक्त क्वारेन्टाइनमा २८ जना बसिरहेको प्रदेश प्रहरी कार्यालयको भनाइ छ ।

यसबीच संक्रमित युवकलाई वीरगन्जस्थित आइसोलेसनमा भर्ना गर्ने र उनको परिवारका सबै सदस्यलाई क्वारेन्टाइन गर्ने काम भइरहेको जिल्ला प्रशासन कार्यालय, रौतहटले जनाएको छ । ती युवकको परिवारमा आमा, बाबु, दुई भाइ, एक बहिनी र पत्नी छन् । तर, पत्नी अर्कै गाउँमा रहेको माइतीमै बसिरहेकी छिन् । 

यता, गाउँमा रहेको क्वारेन्टाइनमा कोरोना संक्रमित रहेको खबर गाउँमा फैलिएसँगै स्थानीयमा त्रास बढेको छ । प्रहरीले क्वारेन्टाइन क्षेत्रलाई कडा सुरक्षाको घेरामा राखेको छ ।