पोखरा । चुनाव नजिकिँदै गर्दा उमेदवारहरुको घरदैलो कार्यक्रम पनि तीव्र बन्न थालेको छ । कास्की २ को उपनिर्वाचनमा २२ जनाको उमेदवार परेता पनि कार्यक्रम नै सार्वजनिक गरेर प्रचारमा जुट्नेमा चाहिँ सत्तारुढ नेकपा र प्रमुख प्रतिपक्षी दल नेपाली कांग्रेसका उमेदवार नै छन् । नेकपाले उपनिर्वाचनमा दिवंगत रवीन्द्रपत्नी विद्यालाई उमेदवार बनाएको छ भने कांग्रेसले पाका उमेदवार खेमराज पौडेललाई । यी दुई मुख्य प्रतिष्पर्धीबीच जित हात पार्न दुवै दलले सक्रियता बढाएका छन् ।

शनिबार मात्रै विद्याले निर्वाचन क्षेत्रका श्रमिकहरुसँग भेटघाट एवम् अन्तरक्रिया गरेकी छन् । भेटपश्चात उनले सरकारको सामाजिक सुरक्षा योजनाको बारेमा जानकारी गराउँदै श्रमिकहरुको सबलीकरण आफ्नो प्राथमिकतामा रहेको आश्वासन दिलाइन् । श्रमको सम्मान र श्रमबाट मात्रै समृद्ध नेपालको सम्भावना रहेको हुँदा श्रमिकहरुको हक अधिकारको निम्ती आफ्नो प्रतिबद्धता रहेको उनले बताइन् ।

नेकपाले १९ गते नै २ हजार ६ सय ४१ सदस्यीय परिचालन समिति गठन गरिसकेको छ । यस्तै, २६ वटा उपसमिति बनाएको थियो । संघीय समाजवादी पार्टीले ५ सय १ सदस्यीय प्रचार समिति गठन गरेको छ । यता, प्रमुख प्रतिपक्षी दल नेपाली कांग्रेसका उमेदवारको तयारी पनि कम भने छैन । उमेदवारी दिएपछि खेमराज पौडेलले आफ्ना क्षेत्रका क्रियाशील सदस्यसँग भेट गरिसकेका छन् । 

आइतबारदेखि निर्वाचन क्षेत्रभित्रका वडाहरुको घरदैलो सुरु गर्ने कांग्रेसको कार्यक्रम छ ।  सो अनुरुप आइतबार बिहान १०ः३० बजे पोखराको सिद्धार्थचोकबाट अभियान थालनी गर्ने भएको छ । शुक्रबार मात्रै कांग्रेसले चुनावकै लागि क्षेत्रीय भेलामार्फत् ३ हजार ५५१ सदस्यीय चुनाव प्रचारप्रसार समिति गठन गरेको छ ।

समितिको मूल संयोजकमा पार्टी सभापति कृष्ण केसी, उपसंयोजकद्वयमा क्षेत्रीय सभापति माधव बाँस्तोला मधु र नगर सभापति बजीरमान श्रेष्ठ छन् ।  आइतबार घरदैलो अभियान शुरु हुने वडा पोखरा–४ मा यज्ञबहादुर थापा, ८ मा तारानाथ रानाभाट र ९ मा शुक्रराज शर्मा संयोजक रहेका छन् । मूल समितिमा कास्की २ का क्षेत्रीय सभापति माधवप्रसाद बास्तोला (मधु) र पोखरा महानगरका सभापति बजिरमान श्रेष्ठ सहसंयोजक छन् । महानगरका ११ वडाभित्र आगामी चुनाव हुँदैछ । सबै वडामा कांग्रेसले प्रचार संयोजक तोकेको छ ।

पोखरा ४ मा पूर्वमन्त्री यज्ञबहादुर थापा संयोजक छन् भने ७ मा कास्की काँग्रेसका पूर्वसभापति शुक्रराज शर्मा, ८ मा पूर्वसभामुख तारानाथ रानाभाट, ९ मा वीरेन्द्रनारायण विजुक्छे, ११ मा पूर्व सांसद शारदा पौडेल, १५ मा राष्ट्रियसभा सदस्य बृन्दादेवी राना, १६ मा केन्द्रीय आमन्त्रित सदस्य तथा प्रदेश सांसद कुमार खड्काले चुनावी कार्यक्रमको नेतृत्व गर्नेछन् । 

“प्रचारका लागि ११ वटै इकाइमा हाई कमाण्डमा बनाएर पठाएका छौं । खटिएका प्रतिनिधिले कार्यालय उद्घाटन गर्ने र ४ नम्बर वडाबाट घरदैलो सुरु गर्ने कार्यक्रम छ,” सभापति केसीले भने । उनले जिम्मेवारीमा रहेका सबैलाई कार्यक्षेत्रमा गएर काम थाल्न आग्रह गरेका छन् ।

‘यसपटकको भोट झ्याप्पै तराजु’

साना दलहरुको प्रचारशैली भने अलिक भिन्न छ । साझा पार्टीले रजनी केसीलाई उम्मेदवार बनाएर सबैभन्दा पहिले चुनाव प्रचार थालनी गरेको थियो । सांगीतिक प्रचार गर्दै मतदातामाझ साझाले प्रचार गरेको छ । साझाको गीत छ, ‘यसपटकको भोट झ्याप्पै तराजु ।’

मातृभूमिको रक्षा गरौँ

यता, विवेकशील नेपाली दलको समर्थनमा मैदान उत्रिएकी जमुना शर्मा भने शनिबार मानवाधिकार चोकमा देखिइन् । उनको हातले नेपालको राष्ट्रिय झन्डा समातेको थियो, भने ‘मातृभूमिको रक्षा गरौँ’ लेखिएको पर्चा पनि ।  त्यहाँ उनी प्रचार गर्न भने आएकी होइनन् । अनसनरत डा. गोविन्द केसीको पक्षमा शान्तिपूर्ण प्रदर्शनमा उनी उपस्थित भइन् । विवेकशीलका कार्यकर्ताहरुसँगै उपस्थित शर्माले पर्चा, पम्प्लेट सहित केसीको पक्षमा प्रदर्शनमा सहभागी भएकी हुन् ।