पोखरा । कास्कीको माछापुच्छ्रे गाउँपालिका वडा नं. १ का वडाध्यक्ष विरेन्द्र गुरुङलाई प्रहरीले नियन्त्रणमा लिएको छ । पक्राउ परेका वडाध्यक्षलाई गाउँपालिकाको कार्यालय तोडफोड गरेको आरोप लागेको छ । गुरुङसँगै स्थानीय विपुल क्षेत्री र वडा नं. २ का सदस्य गणेश आचार्यलाई पनि प्रहरीले नियन्त्रणमा लिएको हो ।

स्थानीय तहको चुनावमा कांग्रेसबाट निर्वाचित वडाध्यक्ष गुरुङले गत बुधबार गाउँपालिका भवनको बैठक कक्षमा रहेका सामग्रीहरु तोडफोड गरेको भन्दै गाउँपालिकाका उपप्रमुख कृष्णकुमारी दवाडीले प्रहरीमा उजुरी दिएकी थिइन् । उपप्रमुखको किटानी जाहेरीका आधारमा बगर प्रहरीले उनीहरुलाई पोखरास्थित जिरो किलोमिटरबाट नियन्त्रणमा लिएको हो ।

प्रहरीका अनुसार गाउँपालिका अध्यक्षमा कांग्रेसका तर्फबाट प्रत्यासी उम्मेदवार खुसीमान गुरुङको नाममा पनि किटानी जाहेरी परेको छ । अन्य ४०-५० जनाविरुद्ध प्रहरीमा जाहेरी परेको छ ।

 मागेको सूचना नदिएको भन्दै प्रत्यासी उम्मेदवार र निर्वाचित वडाध्यक्षसहितको समूहले कार्यालय तोडफोड गरेको जाहेरीमा उल्लेख छ । किटानी जाहेरीमा खुसीमानसहित कांग्रेसकातर्फबाट वडा नम्बर ८ का अध्यक्षका प्रत्यासी राम गुरुङ, वडा नम्बर १ का वीरेन्द्र गुरुङ, नेपाली कांग्रेस क्षेत्रीय सहसचिव राजाराम पौडेलसहित अन्य धेरै व्यक्तिका विरुद्धमा जाहेरी परेको कास्की प्रहरीले जनाएको छ । 

प्रहरीले किटानी गरिएको र अन्य संलग्नको पनि खोजी गरिरहेको छ । कास्की प्रहरी प्रमुख एसपी दानबहादुर कार्कीले भने, “सूचना माग्न जाँदा १५ मिनेट भनेर धेरै बेर कुराउनुभएछ, त्यसकारण झोँकमा कुर्चीटेबल तोडफोड गर्नुभएको रहेछ, प्लाष्टिकका कुर्चीहरु भाँचिएको र फलामे कुर्चीका कारण भुईं भत्किएको रहेछ, हामीकहाँ किटानी जाहेरी परेपछि पक्राउ गरेका हौँ ।”

यता गाउँपालिका अध्यक्ष भने चीन भ्रमणमा छन् । कार्यावाहक अध्यक्षको जिम्मेवारी कृष्णकुमारी दवाडीले सम्हालेकी छन् । कार्यावाहक अध्यक्ष दवाडी, प्रशासकीय अधिकृत नारायणप्रसाद सापकोटा र सूचना अधिकारी हरिलाल आचार्यसँगै छलफल चलिरहेका बेला कार्यालयमा तोडफोड भएको जनाईएको छ ।

रिहा गर्न कास्की कांग्रेसको माग

माछापुच्छ्रे गाउँपालिका वडा १ का वडाध्यक्ष वीरेन्द्र गुरुङ र तरुण दलका विपुल शर्मालाई पक्राउ गरिएकोमा नेपाली कांग्रेस कास्कीले गम्भीर ध्यानाकर्षण जनाएको छ । कास्की कांग्रेसका कार्यवाहक सभापति आइबहादुर गुरुङले मंगलबार जारी गरेको विज्ञप्तिमा पक्राउ गरिएकालाई तत्काल बिनाशर्त रिहा गर्न माग गरेका छन् ।

 वडाअध्यक्ष वीरेन्द्र गुरुङ, अध्यक्षका प्रत्यासि उम्मेद्वार खुशीमान गुरुङ, वडा नं. ८ का प्रत्यासी वडाध्यक्षका उम्मेद्वार रामबहादुर गुरुङ, नेपाली कांग्रेस क्षेत्र नं. ३ का सहसचिव राजाराम पौडेल सहित ४०-५० जनालाई गाउँपालिका तोडफोड गरेको आरोप लगाइएकोमा आपत्ति जनाइएको छ ।

‘माछापुच्छ्रे गाउँपालिकाका गतिविधिप्रति काँग्रेसका तर्फबाट ध्यानाकर्षण गराउदा बेवास्ता गरेपछि भदौ २५ गते सूचनाको हक सम्बन्धी संविधान प्रदत्त अधिकार प्रयोग गरी निवेदनसहित साथीहरु गाउँपालिका गएको’ विज्ञप्तिमा उल्लेख छ ।

 गाउँपालिकाका अध्यक्ष दुई महिनाका लागि विदेश भ्रमणमा रहेकाले कार्यवाहक अध्यक्षको जिम्मेवारीमा रहेकी उपाध्यक्षलाई सूचनाको लागि आएको जानकारी दिदा सभाहलमा बस्न भनेको र ३ घण्टा बढी कुर्दा पनि नआएपछि पुनः बोलाएर छलफल गरी सात दिनभित्र गाउँपालिकाका सम्पूर्ण सूचना उपलब्ध गराउने भनी सहमतिका साथ छलफल टुंगिएको विज्ञप्तिमा जनाइएको छ ।

तर, दुई दिनपछि एकाएक गाउँपालिका कार्यवाहक अध्यक्षको नामबाट माछापुच्छ्रे गाउँपालिकामा तोडफोड भएको भन्दै राजनीतिक प्रतिशोध लिइएकोप्रति विज्ञप्तिमा गम्भीर आपत्ति प्रकट गरिएको छ ।