काठमाडौं । लागूऔषध एम्फेटामाईन बनाउन प्रयोग हुने रसायन अन्तर्राष्ट्रिय लागूऔषध तस्करलाई निर्यात गरेको अभियोगमा पक्राउ परेका संघाई ग्रुपका रतन संघाईलाई प्रहरीले सार्वजनिक गरेको छ । 

प्रहरीको लागूऔषध नियन्त्रण ब्यूरोले आइतबार पत्रकार सम्मेलनमार्फत ४ सय ९२ किलो एम्फेटामाईन बनाउन प्रयोग हुने ‘केमिकल’सहित सार्वजनिक गरेको हो ।

संघाई ग्रुपले औषधी व्यवस्था विभागबाट करिव ४ वर्ष पहिला बाराको जितपुरमा आर्यान फर्मा ल्याब खोलेको र उक्त फर्मामार्फत विभिन्न देशमा लागूऔषधमा प्रयोग हुने ‘केमिकल’ तस्करी गर्ने गरेको ब्यूरोका डीआईजी जयबहादुर चन्दले बताए । 

संघाईको फर्मामा उत्पादन गरेको ४ सय ५२ किलो ‘प्रिकर्सर’ नामक सहायक रसायन ब्यूरोले ललितपुरस्थित रतन संघाईको प्लाष्टिक गोदाममा लुकाएर राखेको अवस्थामा फेला पारेको डीआईजी चन्दले बताए । 

ब्यूरोका अनुसार बरामद ‘केमिकल’ निर्यात गर्ने कम्पनी पवन संघाईको नाममा छ । उनले लामो समय देखि यसरी अवैध तरीकाले यो रसायन चीन, अष्ट्रेलिया, हुँदै बर्मा पुर्याउने गरेका थिए ।

संघाई गु्रपले यस्तो रसायन नेपालको काकडभिट्टा, सिक्कीम हँुदै चीन र अष्ट्रेलिया निर्यात गर्ने गरेको प्रहरी अनुसन्धानबाट खुलेको छ ।  उनीहरूले बर्मा पुर्याएको केमिकलबाट लागूऔषध एम्फेटामाईन बनाउने र उक्त लागूऔषध विश्वबजारमा फैलाउने गरेको प्रहरीको भनाई छ । 

डीआईजी चन्दले भने,“हामी अनुसन्धानको क्रममा छौं । लहरो तान्दा पहरो आउने अवस्था छ ।”

प्रहरीले पबन संघाईका भाई रतन संघाई, उनका सहयोगी बिरगंजका मोहीत घलान, दिलीप पण्डितलाई पनि सार्वजनिक गरेको छ ।  तर आर्यान फर्मा ल्याबका संचालक पबन संघाई भने फरार छन् । फरार संघाईको खोजी भईरहेको प्रहरीले जनाएको छ । 

संघाईको फर्मा ल्याबले गर्नै नहुने काम गरेको औषधी ब्यवस्था विभागका अधिकृत गोरख डीसीले बताए । “यस्तो खालका रसायान ल्याएर अन्य औषधी उत्पादन गर्ने अनुमति भए पनि यसरी विना लेवल यस्तो अवस्थामा औषध बनाएर विदेश सप्लाई गर्न मिल्दैन,” उनले भने,“अब संघाईको फर्मा र उनले उत्पादन गरेको सबै औषधीहरू बन्देज हुन्छन् ।” 

प्रहरीका अनुसार संघाईले सञ्चालन गरेको फर्माले यो वर्ष मात्र २० करोडको औषधी उत्पादन गर्ने ठेक्का पाएको छ । सरकारले उनको फर्मालाई उत्कृष्ट घोषणा समेत गरेको प्रहरीको भनाई छ ।