नवलपुर । राजविराजमा मोर्चा र प्रहरीबीच हिंसात्मक झडपपछि रोकिएको एमाले सभा शुक्रबार हेटौँडाबाट सुरु भएर शनिबार नवलपुर पुगेको छ । हेटौँडाको हुप्राचौरबाट सुरु भएको र्याली चितवनको नारायणी तटमा पुगेर शनिबार सभामा परिणत भएको थियो ।

सभामा एमालेका शीर्षस्थ नेतृत्वले सम्बोधन गरेका थिए । सभालाई एमाले स्थायी कमिटी सदस्य एवम् चितवनबाट प्रतिनिधितित्व गर्ने सांसद् सुरेन्द्र पाण्डे, एमाले उपाध्यक्ष बामदेव गौतम, वरिष्ठ नेता माधव कुमार नेपाल र एमाले अध्यक्ष केपी शर्मा ओलीले सम्बोधन गरेका थिए ।

सभामा पुग्नुपूर्व मकवानपुरको मनहरी, लोथरलगायतका ठाउँमा बाटामा घरैपिच्छे घडा राखिएको थियो । राजमार्गको दुवैतर्फ एमाले कार्यकर्तामात्र होइन, उल्लेख्य सर्वसाधारणले पनि हात हल्लाएर र्यालीलाई स्वागत गरेको थियो ।

आमसभामा बढ्दो उपस्थिति
हेटौँमा अघिल्ला ९ सभाको तुलनामा  उल्लेख्य जनसमुदायको उपस्थिति थियो । तर, चितवनको त्यसको संख्या तेब्बरजस्तो थियो । र्यालीलाई स्वागत गर्न पर्सा, भरतपुरलगायतका सहरमा स्थानीय पार्टीले विभिन्न जाति समुदायको सांस्कृतिक पहिचान झल्कने झाँकी प्रस्तुत गरेको थियो । एमाले चितवनका अध्यक्ष कृष्णभक्त पोखरेलकाअनुसार चितवनमा बसोबास गर्ने कुमाल, थारू, दराई, लिम्बू, नेवार, गुरुङ, मगर, तामाङ, बाह्मणआदि समुदायको पहिचान झल्कने झाँकी प्रस्तुत गरिएको थियो ।

दुई महिनाको तयारी
२१ फागुनदेखि मेची–महाकाली अभियान सुरु गर्ने घोषणा पार्टीले गरेपछि चितवनको एमालेले पनि सोही मुताविक तयारी थालेको पोखरेल बताउँछन् ।
“पार्टीले अभियान घोषणा गरेपछि हामीले १३५ वटा मातहताका कमिटीहरू परिचालन गर्यौँ, करिब २ लाख पर्चा छापेर जिल्लाको ९५ प्रतिशत घरधुरीमा पुगेर अभियानमा सरिक हुन आह्वान गर्यौँ,” उनले प्रष्ट्याए । 

अभियानका क्रममा १७ किलोमिटर ढाक्नेगरी आठ हजार मोटर साइकल र राजमार्गको दायाँबायाँ, झाँकी र आमसभास्थलमा समेत गरी ५० हजार मानिस उतारिएको दाबी पोखरेलको छ ।

चितवनको प्रदर्शनले संविधान संशोधनको विपक्षमा र एमालेको राष्ट्रियताको पक्षमा जनमत खडा भएको दाबी उनको थियो । “चितवनको सभाबाट हामी निकै उत्साहित छौँ, बन्दको बीचमा पनि सहभागी भएर एमालेको राष्ट्रियता, सामाजिक सद्भाव र संविधान संशोधन आवश्यक छैन भन्ने सन्देश दिन सफल भएका छौँ,” उनले दाबी गरे ।

चितवनको सभाबाट एमाले नेतृत्वसमेत उत्साहित भएको छ । अध्यक्ष केपी शर्मा ओलीले कावासोतीको सभामा चितवनको सभा दशककै उत्कृष्ट भएको दाबी गरे । “चितवनको सभाले एमालेको पक्षमा जनलहर बढेको छ भन्ने प्रष्ट्याएको छ,” उनको भनाई थियो ।

कावासोतीमा पनि सहभागिता उल्लेख्य
नयाँ पुनःसंरचनामा नवलपरासी जिल्ला टुक्रिएर चार र पाँच प्रदेशमा परेको छ । नयाँ संरचनामा दाउन्ने पूर्व र गैँडाकोट पश्चिमको नवलपुर क्षेत्र प्रदेश नम्बर चारमा छ भने दाउन्ने पश्चिमको भाग प्रदेश नम्बर पाँचमा परेको छ । 

एमाले नवलपरासी इन्चार्ज तीलक महतले सभामा करिव २५ हजारको सहभागिता रहेको दाबी गरे । “आदिवासी जनजातिको बाहुल्यता रहेको क्षेत्रमा शनिबारको सभाले हामीलाई उत्साहित बनाएको छ, यसले एमालेको बढ्दो जनलहरलाई प्रष्ट्याउँछ,” उनको भनाई थियो । सय भन्दा बढी पार्टीका नेताहरू ३० समुह बनाएर घर दैलो गरेको उनको भनाई थियो ।

“सविधानमा उल्लिखित हक अधिकारका बारेमा हामीले जनतालाई बुझाउन सकेकै रहेनछाैँ, हामीले झन्डै महिनादिन लगाएर घर दैलो गर्यौँ, जनतालाई हाम्रा कुराहरू बडो प्रष्ट ढंगले बुझायौँ, जनतामा एमालको नीति र विचारले नयाँ उत्साह सञ्चार गरेको छ, उनको भनाई थियो ।

पहाडमा बढ्दो ‘सेन्टिमेन्ट’
राजविराज प्रकरणपछिको तीन सभाले पहाडमा एमालेप्रति सेन्टिमेन्ट बढेको देखिन्छ । हेटौँडा, नारायणी नदी किनार र कावासोतीमा भएको सभा त्यसैको प्रतिविम्ब भएको एमाले नेताहरूको बुझाई छ ।

“बन्दका बीच पनि एमालेको सभामा त्यत्रो उपस्थिति हुनु हाम्रा लागि सुखद् हो, चितवन र कावासोतीको सभाले एमालेको राष्ट्रियता, भौगोलिक अखण्डता र राष्ट्रिय स्वाधीनतको पक्षमा माहोल खडा गरेको छ,” महतले जानकारी दिए । एमालको कुरा जनतालाई प्रष्ट ढंगले बुझाउन अभियान फलदायी भएको उनको निष्कर्ष थियो ।

तस्बिर, रासस