हेटौँडा । हेटौँडमा शक्ति प्रदर्शन गर्दै एमाले अध्यक्ष केपी शर्मा ओलीले एमाले कुनै पनि हालतमा पछि नहट्ने उद्घोष गरेका छन् । सप्तरीको राजविराजमा हिंसात्मक झडपपछि रोकिएको मेची–महाकाली अभियान हेटौँडा भुटनदेवी स्कुलको प्राङ्गणबाट निरन्तरता दिँदै अध्यक्ष ओलीले भने, “एमाले पछि हट्दैन, मर्न परे एमाले र अध्यक्ष केपी ओली खुट्टा कमाउने मान्छे होइन ।” एमालेका नेता–कार्यकर्ताको हत्या गर्ने मधेसी मोर्चाका नीति महंगो पर्ने उनको भनाई थियो ।

सप्तरी घटना र राष्ट्रियता र लोकतन्त्रमाथिकै प्रहार भएको उनको निष्कर्ष थियो । उनले प्रष्ट्याए, “एमालेका नेता–कार्यकर्ताहरूलाई तराईमा मारेर राष्ट्रियता, निर्माण र एकताको अभियान समाप्त हुँदैन ।”

त्यति मात्र होइन कञ्चनपुरको प्रवास नगरपालिकामा भारतीय एसएसबीको गोली लागि गोविन्द गौतमको हत्या हुनु यसैको पटाक्षेप भएको अथ्र्याए । “कञ्चनपुर प्रकरण यसैको दृष्टान्त हो,” उनको भनाई थियो ।

उनले आफ्ना देशको नागरिक मारिँदासमेत सरकारले मुख नखोलेको भन्दै आश्चर्य व्यक्त गरे । “यो सरकार मुख खोल्दैन, आफ्ना नागरिक मारिँदासमेत कुनै चिन्ता छैन, सरकारको मात्रै चिन्ता छ,” उनले भने ।

उनले भारतलाई छिमेकीको व्यवहार गर्न आग्रह गरे । “नेपालमा पसेर सर्वसाधारणलाई कुटपीट गर्ने, आतंक मच्चाउने, गोली हान्ने अधिकार कसैलाई छैन, भारतले छिमेकीको व्यवहार गरोस्,” उनको अनुरोध थियो ।

“भारत नेपालको छिमेकी हो, मित्र हो । तर, मित्रले मित्रवत् व्यवहार गर्नुपर्छ । अलिकति ठूलो भयो भन्दैमा नेपालका सिमाना मिच्ने, नेपाली भूमिभित्र पसेर नेपाली नागरिकमाथि गोली चलाउने, अनेक काममा अर्घेल्याइँ गर्ने अहंकारबाट भारत मुक्त हुनुपर्छ,” उनले थपे ।

नेपाली भूमिमा आएर भारतीय सुरक्षाकर्मीले नेपालीको हत्या गर्दा पनि केही गर्न नसकेर सरकारले लाचारी देखाएको भन्दै सरकारको आलोचनासमेत गरे ।
सप्तरी घटनापछि तितर–वितर बनेका कार्यकर्तालाई काठमाडौंदेखि उतारेर एमालेले पुनः ¥याली आयोजना गरेको थियो । सभामा सहभागी हुन काठमाडौं, चितवन र बारा, पर्सादेखिका कार्यकर्ता हेटौँमा आएका थिए । अघिल्ला ९ सभामा भन्दा हेटौँडा सभामा उल्लेख्य सहभागिता रहेको थियो ।
अघिल्लो सभा भन्दा केही आक्रामक देखिएका अध्यक्ष ओलीले मधेसी मोर्चा र सरकारको कटाक्ष गर्न भ्याए । राजविराज सभामा एमालेलाई घेरा हालेर सामुहिक हत्या प्रयास गरिएको उनको जानकारी गराए ।

राजविराज प्रकरण एमाले नेताको हत्या गर्ने मनशायबाट प्रेरित आक्रमण भएको बताएका ओलीले संविधान संधोधनबारे खासै चर्चा गरेनन् ।

एमालेलाई सुरक्षा दिएवापत सुरक्षा अधिकारीलाई कारवाही !

राजविराज घटनामा एमालेलाई सुरक्षा दिएवापत सुरक्षा अधिकारीलाई कारवाही भएको महासचिव ईश्वर पोखरेलको भनाई थियो । राजविराज घटनामा गोली चलाएको भन्दै  प्रमुख जिल्ला अधिकारी र सशस्त्र र जनपथ प्रहरीका डीएसपी फिर्ता बोलाउने निर्णयप्रति उनले आपत्ती जनाएका हुन् ।
त्यस्तै उनले सप्तरी घटनाबाट एमाले विचलित नभएको बताए । संविधान संशोधनमार्फत हिन्दी भाषालाई कामकाजी भाषा बनाउन लागिएको भन्दै एमाले सोको विरोध गरेको बताए ।
हेटौँडा सभामा बरिष्ठ नेताद्वय झलनाथ खनाल, माधव नेपाल, वरिष्ठ उपाध्यक्ष बामदेव गौतम सहभागी थिए । अभियानअन्तर्गत शनिबार हेटौँडाबाट ¥याली सुरु हुनेछ । भरतपुर र कावासोतीमा सभापछि त्यहीँ बास बस्नेछ ।