दाङ । देउखुरीका बलरामपुर, श्यामरहवालगायतका अधिकाँश गाउँका किसानको मुख्य आम्दानीको बाटो ‘बगरखेती’बनेको छ । उनीहरुले करेला, बोडी, भिन्डी, काक्रा, खरबुजालगायतका बेमौसमी तरकारी उत्पादन गर्छन् । उनीहरु बगरमा गरिने बेमौसमी तरकारी खेतीबाट राम्रो आम्दानी हुने भएकोले परिवार धान्न सक्‍ने भएका छन् ।

लमही नगरपालिका-४ श्यामरहवा निवासी रामकुमारी चौधरी हिजोआज राप्ती नदिको बगरमा भेटिन्छन । राप्तीको बगरमा रोपेको तरकारी हुर्काउनदेखि फलेको तरकारीलाई बजारसम्म ल्याउने नै उनको दैनिक बनेको छ । थोरै जग्गामा तरकारी खेती गरेको बताउने चौधरीले राम्रो आम्दानी गर्ने गरेकी छिन । "थोरै जमिनमा तरकारी खेती गरे पनि उत्पादन राम्रो हुने गरेको छ", रामकुमारीले भनिन्, "यही तरकारी बेचेर घरपरिवार चलाउने गरेको छु ।" 

उत्पादन गरेको तरकारी बेच्नलाई लमहीसम्म आउने गरेको उनले बताइन् । तरकारी बेचेर आएको पैसाले दैनिकी चलाउने गरेको उनको भनाइ छ । उनले करेला, बोडी, भिन्डी, काक्रालगायतका तरकारी रोपेकी छिन । बेमौसमी तरकारी खेती गर्न सके बगरबाट राम्रो आम्दानी गर्न सकिने उनले बताइन् । 

त्यस्तै लमही नगरपालिका- ६ बलरामपुर निवासी खुमा घर्तीमगर तरकारीसँगै खरबुजा बेच्दै आएकी छिन । लमही-कोइलावास सडक खण्डको बलरामपुरमा करिब दुई महिनादेखि टहरा बनाएर उनले खरबुजासँगै बोडी, करेलालगायतका तरकारी बेच्दै आएको बताइन् । खरबुजा र तरकारी बेचेर राम्रो आम्दानी हुने गरेको खुमाले सुनाइन् ।

उनले दिनभर खरबुजालगायतका तरकारी बेचेर तीन हजारसम्म कमाई हुने गरेको बताइन् । "गतबर्ष एक दिनमा पाँच हजारसम्म बिक्रि हुने गरेको थियो", उनले भनिन्, "घर खर्चको मुख्य माध्यम नै बगर खेती भएको छ ।"

देउखुरीमा उनीहरुजस्तै धेरै किसानले बगरखेतीका माध्यमबाट घर व्यवहार चलाउने गरेका छन । विशेष गरेर राप्ती नदीको क्षेत्रमा कृषकले बगरखेती गर्दै आएका छन् ।