झापा । नेकपा एमालेको मेची–महाकाली अभियानमा उल्लेख्य युवापंक्तिको उपस्थिति देखिएको छ । साथै गाउँ–सहरका भित्रि भागबाट समेत सडकमा कार्यकर्ता उतारेर एमालेले अतिथिहरू, अभियानमा सहभागिहरूलाई राम्रै सत्कार गर्यो । अझ, बाटोमा उभिएर हात हल्लाउने झाँकी, आकर्षक लुगामा सजिएका बालबालिका, हातमा झन्डा बोकेका वयोवृद्धहरूले अभियानमा रौनक थपे । त्यसो त, ‘बाटोमा उभिएर एमाले पक्षमा तीनवटा नारा पनि नलगाउने के एमालेका कार्यकर्ता ?’ भन्ने पार्टी अध्यक्ष केपी शर्मा ओलीको उर्दीले पनि राम्रै काम गरेको देखियो ।
काँकडभिट्टाबाट सुरु भएको र्याली विर्तामोड आइपुग्दा बाटोमा पर्ने, धुलाबारी, धाइजन, चारआली, बुट्टाबारी र दमक आइपुग्दा चारपाने, दुर्गापुर, लक्ष्मीपुर, सुरुंगा, माइधार, झिलझिले, केर्खा, धरमपुर, पाडाजोगीलगायत दर्जन बढी ठाउँमा सय–दुईसय कार्यकर्ताले उभिएर स्वागतसत्कार गरेका थिए ।

भाषण कम, प्रचार बढी
अभियानबारे विभिन्न तहमा योजना बनाएको भए पनि यसको ‘मूल सेटिङ’ अध्यक्ष ओलीकै हो । प्रचार विभागका एक सदस्यका अनुसार अभियानका विषयमा दर्जनौँ पटक अनौपचारिक, औपचारिक मिटिङ बसेको छ । तर, योजना सबै अध्यक्षले नै बनाएका हुन् ।

अभियान अवधिमा भाषण निकै कम हुनेछ । भाषणले नेता थाक्ने र सहभागिलाई एकांकी अनुभूत गराउने ठानेर पनि त्यसो गराइएको हुनसक्छ । त्यस्तै अभियानको अर्को रोचक पक्ष वयोवृद्धहरूको सम्मान हो । विर्तामोडमा ३० बढी वयोवृद्धहरूलाई सम्मान गरिएको थियो । झापा विद्रोहताका आश्रय लिएका, आन्दोलनलाई प्रत्यक्ष र परोक्षरूपले सघाएका त्यस्ता ७० वर्ष कटेका वृद्धवृद्धाहरूलाई सम्मान गर्दा सहानुभूति बटुल्न सघाउ पुग्ने एमालेको आँकलन छ ।

फाुगन २१ अर्थात ४४ औँ सहिद स्मृति दिवस पनि भएकाले एमालेले सो अवसरमा सुखानीका सहिद परिवारलाई सम्झने मौका जुरायो एमालेले ।
काँकडभिट्टाको सभामा पार्टी महासचिव ईश्वर पोखरेल र पार्टी अध्यक्ष केपी ओलीले मन्तव्य राखेका थिए । त्यस्तै विर्तामोडको सभामा पार्टी वरिष्ठ नेता झलनाथ खनालले भाषण गरे । 
दमकको मुख्य वक्ता भने सुवास नेम्वाङ थिए ।
शनिबारको सभा दमक पुगेर बास बसेको छ  । “दमकमा करिब एक हजार जना सहभागि बास बसेका छन् । उहाँहरू स्थानीयहरूको घरमा बास बस्नुभएको छ, कतिपय माओवादी केन्द्र र कांग्रेसका नेता कार्यकर्ताका घरमा समेत बास बस्नुभएको छ । ‘यत्रो राम्रो अभियान चलाउनु भएको छ । हामीकहाँ एकछाक भात त खानुहोस् भनेर आग्रह गरेपछि केही साथीहरू कांग्रेस, माओवादी केन्द्रको नेता कार्यकर्ताका घरमा जानु भएको हो,” भट्टराईले अन्तिममा भने ।