बारा । बाराको फेटा गाउँपालिका–६ पुरैनियाका फैजुल हक मियाँ मंगलबार दिउँसो आँधीले भत्काएको आफ्नो घरको भग्नावशेषमा उदास भेटिए । नजिकै सत्तारुढ नेकपाका अध्यक्ष पुष्पकमल दहाल ‘प्रचण्ड’, नेपाली कांग्रेसका सभापति शेरबहादुर देउवा, राष्ट्रिय जनता पार्टीका नेता राजेन्द्र महतो लगायत भीआईपी हुरी प्रभावितलाई सान्त्वना दिन व्यस्त देखिन्थे ।
खुला खेतमा राहतको थुप्रो थियो । चामल, चिउरा, चाउचाउलगायत खानेकुरा माग्नेको तँछाडमछाड देखिन्थ्यो । केन्द्र, प्रदेश सरकारलगायत नेकपा, कांग्रेस पार्टीले पीडितका लागि विभिन्न राहत प्याकेज घोषणा गरेका थिए । तर फैजुलहक मियाँ न चामललगायत राहत माग्ने लाइनमा थिए, नत भीडभाडमा । उनी टोलाइरहेका थिए, वर्षौं पसिना बगाएर ठड्याएको घरको भग्नावशेषमा । 

उनको घरको छेवैबाटै गइरहेका राजपा राजेन्द्र महतोलाई कसैले भोजपुरी भाषमा सुनायो– उहाँ फैजुलहक मियाँकी श्रीमती मुस्तकीमा र बुहारी बिबियालाई हुरीले लग्यो । एकछिन महतोले फैजुलसँग कुराकानी गरे र सञ्चारकर्मीसँग प्रतिक्रिया दिँदै सरकारको आलोचना गर्न थाले । 

खुला आकाशमुनी भत्किएको घर अनि सपना सम्झेर फैजुलहक भक्कानिन थाले । एकछिनपछि गला अवरुद्ध पार्दै उनले भने, ‘‘हम बेपनाह हो गए, बिबी औंर बहुके सपना पूरा नही कर पाए ।’’

आइतबार साँझको विनासकारी हुरीले घरमा श्रीमती र बुहारीको ज्यान लैजाँदा फैजुलहक सर्लाही हरिपुरमा थिए । केही समयअघि पत्नी मुस्तकीमासँग कुराकानी भएको थियो । ‘‘खाना खानु, आफ्नो ख्याल राख्नु म केहीदिनमा घरमा आउँछु भनेको थिएँ,’’ पत्नीसँगको उनको त्यो संवाद नै अन्तिम हुन पुग्यो । 

‘‘साँझ ८ बजेको थियो होला, मलाई मौलानाले फोन गर्दै भने, तुम्हारा घर गिरगया, और तुम्हारी बिबी और बहु मरचुकी है । जल्दी घर आजाओ,’’ उनले त्यो क्षण सम्झिए । 

पहिले नै आफ्ना ६ छोरा र ३ छोरी गुमाएका फैजुलहकका लागि जीवनकै सबैभन्दा ठूलो बज्रपातको अन्तिम खबर थियो, आइतबार साँझको । भन्छन्, ‘‘८ सन्तान पहिल्यै गुमाएँ । हुरीले अन्तिम सपना पनि उडायो । म आफूलाई सम्हाल्न सकिरहेको छैन । २४ वर्षको छोरा रहिस मलेसियामा छ ।’’

आफ्नो भाग्य खुदाले नै लेखेको ठान्छन् फैजुलहक । उनी भन्छन्, ‘‘हामी बाउछोरा नै अभागी, न उसले आमा र पत्नीको अनुहार देख्न पायो नत मैले नै ।’’ फैजुलहकसँग पत्नी र बुहारीको तस्बिरसमेत छैन । घरसँगै भत्किएका छन्, फैजुलहकका सपना । छोरा मलेसिया गएको ११ महिनामात्रै भएको थियो । घरमा परेको विपत्तिपछि छोरा फर्किसकेका छन् । 

आँधीहुरीमै फेटा गाउँपालिका–१ भरवलियाका वीरजामहर चमार (५५) ले पत्नी वीदीयादेवी (५०) लाई गुमाए । भन्छन्, ‘‘एकाएक आएको आँधीले घरको सिँढी भाँचियो, ऊ सिँढीकै तल थिई, च्यापिएर ज्यानै फाली । बुढेसकालको सहारा नै टुट्यो ।’’ वीरजामहर चमार भत्किएको घर सरकारले बनाइदिए हुन्थ्यो भन्ने चाहना राख्छन् । भन्छन्, ‘‘भगवानले गरिबलाई नै दुःख दिँदो रहेछ ।’’ 

बारा र पर्सामा हावाहुरीका कारण हालसम्म २८ जनाको ज्यान गएको छ । सयौं घाइते छन् । सयौं घर भत्किएका छन् । कतिपयको छाना उडाएकाले घरको अन्नपात छोप्न पाएका छैनन् । घर, रुख, बिजुलीका पोल ढलेका छन् । स्थानीय गणेशराम चमार भन्छन्, ‘‘यस्तो अवस्थामा छौं कि घाइते, मृतकका आफन्तलाई समेत भेटेर सहानुभूति दिन सकिरहेका छैनौं । यस्तो विपत्ति दैवले कहिले कसैलाई नपारोस् ।’’ पुरैनियासहित फेटा, भरवलिया र चैनपुरमा आँधीले ठूलो क्षति पुर्याएको छ । गाउँमा भित्र्याउने बेला भएको गहुँ असिना पानीले नष्ट गरेको छ ।

तस्बिरः सौरभ रानाभाट