काठमाडौं । यो वर्ष ‘छक्का पञ्जा’ ले बक्सअफिस कलेक्सनमा अनपेक्षित सफल हात पारे पनि अन्य चलेका चलचित्रले पनि औषत व्यापार गरे । ‘गाजलु’, ‘जात्रा’ र ‘वीर विक्रम’, ‘पूरानो डुङगा’ ले राम्रै व्यापार गरे पनि अन्य चलचित्रले खासै कमाल देखाउन सकेनन् ।

‘लुट–२’

अब प्रदर्शोन्मुख केही चलचित्रलाई भने निकै आशाको नजरले हेरिएको छ । यही फागुन १३ प्रदर्शन हुन लागेको ‘लुट–२’ बहुप्रतीक्षित चलचित्र हो । निश्चल बस्नेत निर्देशित चलचित्र ‘लुट–२’ चार वर्षदेखि दर्शकले प्रतिक्षा गरेको फिल्म हो ।

चार वर्ष अगाडि बनेको ‘लुट’ ले चलचित्र उद्योगमा शंकटकाल लगाउने तयारी गरिरहेका बेला उक्त चलचित्रले ‘मौलिक पन बोकेको चलचित्र बने राम्रो व्यापार हुन्छ’ भन्ने नजीर बसाएको थियो । सोही चलचित्रको सिक्वेल लिएर निर्देशक बस्नेत चार वर्षपछि आउन लागेका हुन् । सौगात मल्ल, दयाहाङ राई, कर्मा शाक्य, सिर्जना सुब्बा, ऋचा शर्मालगायतका पूरानै कलाकारलाई लिएर बस्नेतले निर्देशन गरेको चलचित्रको  बक्स अफिस रेकर्ड राम्रो रहने अनुमान चलचित्रकर्मीहरूले गर्दै आएका छन् ।

‘लुट–२’ का निर्माता माधव वाग्लेले आफ्नो चलचित्रले ‘छक्का पञ्जा’ ले बनाएको १७ करोड कलेक्सनको रेकर्ड तोड्ने दाबी गर्दै आएका छन् ।

‘घामपानी’

डविङमा रहेको चलचित्र ‘घामपानी’ पनि दर्शकले प्रतिक्षा गरेको चलचित्र हो । आफैं चलचित्रको समीक्षा लेखिरहेका दीपेन्द्र लामाले घामपानीलाई निर्देशन गरेका हुन् । केकी अधिकारी र दयाहाङ राई स्टार चलचित्र घामपानीका लागि कालिप्रसाद बास्कोटाको ‘पन्छी’ बोलको गीत अघिल्लो हप्ता सार्वजनिक गरिएको थियो ।

अन्तरजातीय विवाहका ‘घामपानी’ को ‘लगलाइन’ हो । लामो समय चलचित्रकर्मसँग नजिक रहेर कलम चलाएका लामा स्वयमले भने कस्तो चलचित्र बनाए भन्ने धेरैले कूतुहलता छ । ‘घामपानी’ वैशाख १ गतेका लागि रिलिज डेट लिएको छ ।

‘लप्पन छप्पन’

चैत ११ गतेका लागि रिलिज डेट लिएको अर्को आशाको नजरले हेरिएको चलचित्र हो ‘लप्पन छप्पन’ । सौगता मल्ल, दयाहाङ राई, अर्पण थापा, वर्षा सिवाकोटी मुख्य भूमिकामा रहेको चलचित्र ‘लप्पन छप्पन’ लाई मुकुन्द भट्टले निर्देशन गरेका छन् । सस्पेन्स स्टोरी यो चलचित्रलाई दर्शकले कसरी हेर्ने हुन् चैतको दोस्रो सातामा थाहा हुनेछ तर दर्शकले पर्खिएको मध्येको एउटा चलचित्र भने हो ।

‘धनपति’

‘लुट’ को सिक्वेलपछि बहुप्रतीक्षित अर्को चलचित्रको नाम हो, ‘धनपति’ । ‘पशुपतिप्रसाद’का निर्देशक दीपेन्द्र के खनालले निर्देशन गरेको र खगेन्द्र लामिछानेको कथा रहेको ‘धनपति’ युनिटलाई ‘पशुपतिप्रसाद’ जत्तिकै स्तरीय चलचित्र दिनुपर्ने चुनौती छ । ‘सोसल ड्रा’मा भनिएको चलचित्रमा खनालले खगेन्द्रको अपोजिटमा सुरक्षा पन्तलाई लिएका छन् । असार २३ गतेलाई रिलिज डेट लिएको ‘धनपति’ सपना र अंहकारले मान्छेको भविश्य केन्द्रीय भाव हो ।

‘निरान्जना’

अहिलेका सफल मानिएका निर्देशक निश्चल बस्नेत र विकास आचार्यले संयुक्त रुपमा निर्माण गर्न लागेको चलचित्र ‘निरान्जना’ पनि राम्रो बन्छ भनेर दर्शकले अपेक्षा गरेको चलचित्र हो । ‘कमेडी जनरा’मा चलचित्र बनाउँदै आएका दीपक र कमेडीबाट अन्तिममा सेन्टिमेन्टलमा ‘यू–टर्न’ हुने आचार्यले संयुक्त रुपमा चलचित्र निर्माण गर्न लागेका हुन् ।

विकास आचार्यले आफूले निर्माण गर्न लागेको ‘निरान्जना’ संयुक्त रुपमा बनाउने भएपछि अहिले दीपकले स्क्रिप्ट रिराइट गरिरहेका छन् । निश्चल बस्नेत र उनकी श्रीमती स्वस्तिका खड्का पनि यो चलचित्रमा अभिनय गर्ने भएपछि दर्शकको रोजाइमा यो चलचित्र पनि परेको छ । भदौमा चलचित्र रिलिज गर्ने निर्माण पक्षले बताएको छ ।

‘मरो पैसा खै’

‘मरो पैसा खै’ पनि दर्शकले पर्खिएको अर्को चलचित्र हो । बलिउडका सफल चलचित्र ‘भुतनाथ’ निर्माण गरेका भारतीय निर्देशक विवेक शर्माले नेपाल आएर कस्तो चलचित्र बनाउँछन् ? नेपाली दर्शकले उत्सुक्ता देखाएका छन् । रोज राणाले निर्माण गर्न लागेको चलचित्र कमेडी जनराको नै हुने विकेकले बताएका छन् । ‘मरो पैसा खै’ पनि भदौमा रिलिज गर्ने तयारी गरिएको छ। तीन करोड बजेटमा निर्माण गर्न लागिएक यो चलचित्र नेपालकै विग बजेटको चलचित्र भएकाले पनि दर्शकका लागि प्रतीक्षाको चलचित्र बनेको छ ।

‘दर्पण छायाँ–२’

निर्देशक तुलसी घिमिरेको चलचित्र ‘दर्पण छायाँ–२’ पनि यो वर्ष आशाको नजरले हेरिएको चलचित्र हो । फागुन २७ गतेका लागि रिलिज डेट लिएको चलचित्र ‘दर्पण छायाँ–२’ घिमिरेको सफल चलचित्र ‘दर्पण छायाँ’ सिक्वेल हो । बीचमा उनले निर्देशन गरेका चलचित्र असफल भएपछि नयाँ पुस्तालाई समेत लक्षित गरेर निर्माण गरेका छन् । संगीत र प्रेमलाई फ्युजन गरेर निर्माण गरिएको यो चलचित्रमा निर्देशक घिमिरेले नयाँ कलाकार लिएका छन् । लामो समयपछि उनले बनाएको चलचित्र पनि अहिलेको प्रतीक्षितमध्येकै चलचित्र हो ।